• Әхбаратлар еқими
• 18 Сәуір, 2019

«Йениңда жүриду яхши адәм»

Бәхтишат СОПИЕВ «Уйғур авази» Йеқинда Довун йезисидики оттура мәктәптә әйнә шундақ мавзуда мәрасим уюштурулуп, униңға яқа жутларда киндик қени төкүлгән йериниң ғеми билән яшаватқан биртоп довунлуқлар тәклип қилинди. – Тунҗа Президентимиз өзиниң «Мәнивий йеңилиниш – келәчәккә нишан» мақалисида қәйт қилған «Йениңда жүриду яхши адәм» дегән сөзниң мәнасиға анчә чөкүп кәтмәймиз. Мустәқиллик жиллири өзиниң әмгиги, билими, сәнъити билән утуққа йәткән инсанлар наһайити көп. Өз новитидә, уларниму туғулған йеригә туғини тикти, дәп ейталаймиз. Ундақ адәмләр довунлуқлурниң арисидиму бар, – дәп мәрасимни ачқан риясәтчи сәһнә төригә өзлириниң кәң хәйрихаһлиқ паалийити билән тонулған инсанлар Гүлҗаһан Муратова билән Нурмәһәммәт Палтахуновни тәклип қилди. Алди билән риясәтчиләр Гүлҗаһан Муратовани көпчиликкә тонуштурди. Ихтисадий боһранчилиқ йүз бәргән жиллири йезиға биринчиләрдин ярдәмгә кәлгән Гүлҗаһан ана болди. У һазирму хәйрихаһлиқ паалийитини тохтатқини йоқ. Пәқәт туғулған йеригила әмәс, һәрхил милләт вәкиллири яшаватқан наһийә, шәһәрләргиму қол учини созмақта. Кичигидин һаятниң иссиқ-соғини бешидин кәчүргән анимизниң «сениң-мениң» демәйдиған яхши адити бар. Булту у Алмутида һәрхил милләт вәкиллирдин тәркип тапқан тоққуз көп балилиқ ялғуз анини өз һимайисигә алди. Буниңдин наһайити тәсирләнгән Довун оттура мәктивиниң устазлири «Тоққуз тәғдир» намлиқ сәһнилик көрүнүш тәйярлапту. Буни көрүп Гүлҗаһан ана көзлиригә яш алди. Йәнә бир мәрт-мәрданә инсан Нурмәһәммәт Палтахунов бу күнләрдә өзиниң йәтмиш яшлиғини нишанлаватиду. Шуңлашқа болса керәк, униңға соғиларму көп болди. Чүнки у өз вақтида йезидики мәктәпниң қурулушиға, мечитниң қәд көтиришигә күч салған инсанларниң бири. Шуниң билән биллә балиларниң оқуп, билим елишиғиму шараит яратмақта. Һәр жили яхши оқуғанларға стипендия төләп, тәтилдә дәм елишқа апириду. Бу күни оқуғучилар һамийиға атап шеирларни оқуди, нахшиларни ейтти вә сәһнә көрүнүшлирини намайиш қилди. Жутдашлири болса, ат миндүрди. Бу күни наһийәлик «Или вадиси» — «Іле шуғыласы» гезитиниң баш муһәррири, журналист Абдуманап Аблизовқиму һөрмәт көрситилди. Адәттә, у мундақ мәрасимларға өзиниң һәҗвий шеирлирини йезип келип көпчиликниң көңлини алатти. Бу қетим уни оқуғучилар өзлириниң шеирлири арқилиқ хошал қилди. Тиҗарәтчи Асийәм Асимовағиму оқуғучилар өзлириниң изгү-тиләклирини изһар қилди. Нахша-саз, һәзил-күлкә билән давамлишиватқан мәрасимни Уйғур наһийәлик мәслиһәтниң кативи Нурәким Есжан йәкүнлиди. – Мән өзәмниң әмгәк паалийитимни мошу йезидин башлиған , – деди натиқ. – Уйғурлар билән йеқиндин арилаштим. Пешқәдәм устаз Һемитахун ака Тохтасунов мәсләкдишим болди. Униң оғли Владимир Һемитахуноғли билән биллә ишлидим. Уларму туғулған йеригә аз тәр төкмиди. Әнди бүгүнки учришишниң сәвәпкарлириға тохтилидиған болсам, һәр иккилиси наһийәмизниң иҗтимаий-ихтисадий тәрәққиятиға өзлириниң бир кишилик һәссисини қошуп кәлмәктә. Улар туғулған йеригә туғуни аллиқачан тикип болди. Яхши адәмләр йенимизда жүриду. Пурсәттин пайдилинип, Нурмәһәммәт акини «Уйғур наһийәсиниң Пәхрий граждини» аталғанлиғи билән тәбрикләймән. Уйғур наһийәси