• Йеңилиқлар
• 18 Сәуір, 2019

Мәнивий йеңилаш нәтиҗилири

Дөләт кативи Марат Тәжинниң рәислигидә Қазақстан Җумһурийитиниң Президенти йенидики “Рухани жаңғыру” программисини әмәлгә ашуруш бойичә миллий комиссияниң мәҗлиси болуп өтти. Мәлумки, Дөләт рәһбири Қасым-Жомарт Тоқаевниң Пәрмани билән “Рухани жаңғыру” программисини әмәлгә ашуруш бойичә миллий комиссия тәркиви йеңилинип, Қазақстан Җумһурийитиниң Дөләт кативи Марат Тәжин униң рәиси болуп тайинланған еди. Комиссия мәҗлисидә “Рухани жаңғыру” программисини әмәлгә ашурушниң вә Елбасыниң “Улуқ даланиң йәттә қири” сәрләвһилик мақалисида бәлгүләнгән вәзипиләрни һәл қилиш йәкүни, шундақла йеңи лайиһиләрни әмәлгә ашуруш бойичә планлар муһакимә қилинди. Марат Тәжинниң мәҗлисни ечип тәкитлишичә, өткән икки жилда җәмийәтлик вә тарихий аң-сезимни йеңилашни мәхсәт қилған чоң ишниң әмәлгә ашурулғанлиғини тәкитлиди. Мәсилән, латин һәрипи асасидики қазақ алфавити тәстиқләнди. “Туған жер” лайиһиси даирисидә меценатларниң мәблиғи һесавиға 27 мәктәп, 115 балилар бағчиси, 479 иҗтимаий инфрақурулум объекти селинди. Елимиз тарихида дәсләпки қетим ихтисат, социология, сәясәтшунаслиқ, психология, фолософия, антропология вә башқа пән саһалири бойичә 48 әң яхши дәрислик чәтәл тиллиридин қазақ тилиға тәрҗимә қилинди. 2019 – 2020-жилларда мәмликәтниң гуманитарлиқ билим фонди йәнә 30 китап билән толуқтурулиду. Шундақла бийил заманивий Қазақстан язғучи-шаирлири әсәрлириниң антологияси инглиз, француз, әрәп, испан, рус, хитай охшаш БМТниң алтә тилида нәшир қилиниду. Шундақла “Қазақстанниң муқәддәс җайлири” лайиһиси утуқлуқ әмәлгә ашурулуватиду: 28 тарихий объект реставрация қилинди, йеңи “Бозок”, “Ботай”, “Сарайшық” музей-қоруқлири барлиққа кәлди. Елбасыниң “Улуқ даланиң йәттә қири” мақалиси даирисидики лайиһиләр әмәлгә ашурулуватиду. Комиссия мәҗлисидә Қазақстан Җумһурийити Президентиниң Мәмурийити Дөләт назарити вә тәшкилий-территориялик ишлар бөлүминиң башлиғи Нурлан Сауранбаев, Wіkіbіlіm җәмийәтлик фонди васийлиқ кеңишиниң рәиси, Миллий тәрҗимә бөлүминиң рәһбири Рауан Кенжеханулы, Қазақстан Җумһурийити Президентиниң Мәмурийити Ички сәясәт бөлүминиң башлиғи Аида Балаева, Нур-Султан шәһириниң һакими Бақыт Султанов, мәдәнийәт вә спорт, пән вә билим, әхбарат вә җәмийәтлик тәрәққият министрлири – Арыстанбек Мухамедиулы, Күләш Шәмшидинова, Дәурен Абаев сөзгә чиқип, әмәлгә ашурулған ишларниң нәтиҗилири вә келәчәккә бәлгүләнгән планлар тоғрилиқ тәпсилий әхбарат бәрди. Мәҗлис йәкүнини чиқарған дөләт кативи Марат Тәжин “Рухани жаңғыру” программисини әмәлгә ашуруш ишини җанландурушниң зөрүр екәнлигини алаһидә тәкитлиди вә бирқатар тапшурмиларни бәрди. Уларниң орунлинишини Қазақстан Җумһурийитиниң Президенти Мәмурийитиниң тегишлик бөлүмлири вә Миллий комиссия турақлиқ назарәт қилидиған болиду.