• 9-июнь – Қазақстан Җумһурийити Президентиниң сайлими күни
• 18 Сәуір, 2019

Әһмийити зор сәясий өзгириш

Елбасы Нурсултан Назарбаевниң Қазақстан дөлитини қуруштики ролиниң алаһидә екәнлигини һәммимиз яхши билимиз. Йәтмиш жил һөкүм сүргән Кеңәш Иттипақи ғулиғандин кейин йүз бәргән вақиәләр техи ядимиздин чиққини йоқ. Биз, қазақстанлиқлар, әйнә шу тарихий өзгиришләрниң гувачиси һәм беваситә қатнашқучиси болдуқ. У пәйтләрдә “Қазақстан” дегән дөләтни һеч ким билмәтти. Елимизниң Тунҗа Президентиниң дана сәясити түпәйли ихтисадимиз тәрәққий әтти, дунияға тонулди.Һазир бизни дуния җамаәтчилиги демократиялик, сүръәтлик тәрәққий етиватқан дөләт сүпитидә етирап қилиду. Мана, ахирқи пәйтләрдә елимиздә сәясий өзгиришләр йүз бериватиду. Мошу өзгиришләрниң тәшәббускари Нурсултан Назарбаев болди вә у Қазақстанниң демократиялик принципларниң тәрәпдари екәнлигини йәнә бир қетим дәлиллиди. Елбасы Конституциягә мувапиқ һакимийәтни Сенат Рәисигә тапшурди. Бу муһим қарар. Чүнки, Қасым-Жомарт Тоқаев – Қазақстандила әмәс, дунияға тонулған сәясәтчи. Бирнәччә тилни билиду, хәлиқ ичидә абройи жуқури. Мениң пикримчә, дөләт рәһбирини хәлиқниң сайлиши – демократияниң яққал көрүнүши болидиғини ениқ. Шу сәвәптин Президент Қ.Тоқаев сайламни муддитидин илгири өткүзүш тоғрилиқ қарар қобул қилди. Дөләт рәһбири дуния җамаәтчилигигә сайламниң ашкарә, қанунға мувапиқ өтидиғанлиғиға капаләт бәрди. Мәзкүр сайламниң ички ихтисадимизғиму, ташқи сәяситимиз үчүнму иҗабий тәсир қилидиғинини яхши чүшинишимиз һаҗәт. Шуңлашқа вәтәндашлирим мәзкүр сәясий вақиәгә бепәрва қаримай, җавапкәрликни чүшинип, өзлириниң ихтияри билән Президентни таллайду дәп ойлаймән. Асанәли ӘШИМОВ, СССР хәлиқ артисти, Қазақстанниң Әмгәк Қәһримани.