• Әхбаратлар еқими
• 18 Сәуір, 2019

Президент Маңғыстав вилайитидә болди

Қазақстан Җумһурийитиниң Президенти Қасым-Жомарт Тоқаев Маңғыстав вилайитидә иш бабидики сәпәрдә болуп, бирқатар объектларни зиярәт қилди. Дөләт рәһбири Ақтавда Тиҗарәтчиләргә хизмәт қилиш мәркизиниң иши билән тонушти. Бу йәрдә “Атамекен” Миллий тиҗарәтчиләр палатиси башқармисиниң рәиси Аблай Мырзахметов Президентқа мәмликәттики биринчи “Һөкүмәт бизнес үчүн” лайиһисини тонуштурди. Мәзкүр лайиһиниң асасий мәхсити – “бир деризә” принципи бойичә бизнесни қоллап-қувәтләш вә тәрәққий әткүзүш бойичә мәркәзләштүрүлгән ярдәм қилиштин ибарәт. – Тиҗарәтчиләргә бир мәркәздин хизмәт қилиш шараити яритилди, – деди Аблай Мырзахметов. – Әнди бизнесменларниң салаһийәтлик ярдәм сорап кимгә мураҗиәт қилишни билиши муһим пәйт болуп һесаплиниду. “Һөкүмәт бизнес үчүн” лайиһисиниң имканийәтлири түпәйли биз тиҗарәтчиләр үчүн бирпүтүн мәркәзни вуҗутқа кәлтүримиз вә бу мәмликәт ихтисадиға иҗабий тәсир қилиду. Истиқбалда “Атамекен” Миллий тиҗарәтчиләр палатисиниң мутәхәссислири бу тәҗрибини барлиқ регионларға тарқитишни планлаватиду. Қазақстан Президенти Қасым-Жомарт Тоқаев Тиҗарәтчиләргә хизмәт қилиш мәркизини зиярәт қилиш вақтида “Бастау Бизнес” лайиһиси даирисидә өз ишини ачқан тиҗарәтчиләр билән учришип сөһбәтләшти. Шундақла Қасым-Жомарт Тоқаевқа балиларни қошумчә оқутуш мәркизи, басмихана, гөзәллик салони охшаш хизмәт түрлирини өз ичигә алған йәнә бирнәччә лайиһә тонуштурулди. Дөләт рәһбири андин кейин 2-Ақтав шәһәрлик шипаханиси йенидики йеңи давалаш амбулаториясини зиярәт қилип, терапия, күндүзки станционар кабинетлирини, шипаханиниң тез медицинилиқ ярдәм станциясини көздин кәчүрди. 2018-жили Ш.Есенов намидики Каспий дөләт технологияләр вә инжиниринг университети йенида Бәшинчи Каспий саммити келишиминиң йәкүни бойичә қурулған Деңиз академияси Президент зиярәт қилған йәнә бир объект болди. Дөләт рәһбири академияниң мәшиқлиниш синиплирини, дәсләпки медицинилиқ ярдәм қилиш бойичә оқуш кабинетлирини көздин кәчүрди. Қасым-Жомарт Тоқаев студентлар вә оқутқучилар тәркиви билән болған нарәсмий сөһбәт давамида заманивий үлгиләргә мувапиқ келидиған сүпәтлик мәхсус билим елишниң муһим екәнлигини тәкитлиди. Өз новитидә студентлар Қазақстан Президентиға яш әвлат проблемилириға алаһидә диққәт бөлүнүватқанлиғи вә Яшлар жили даирисидә дөләт тәрипидин қоллап-қувәтләш көрситиливатқанлиғи үчүн миннәтдарлиқ билдүрди. Униңдин ташқири Дөләт рәһбиригә университет паалийити тоғрилиқ әхбарат, шу җүмлидин һазир 1 200 пидаийни бирләштүридиған “Җәмийәткә хизмәт қилиш֊” программиси тонуштурулди. Дөләт рәһбири Ақтавда шундақла “Ақтав хәлиқара деңиз сода портиниң” МК” акционерлиқ җәмийитини зиярәт қилди. Бу йәрдә Президентқа Ақтав Деңиз портиниң паалийити, Каспий деңизида жүк тошуш көләмини көпәйтиш истиқбали, шундақла шәһәрниң курорт зонисиниң инфрақурулумни тәрәққий әткүзүш тоғрилиқ әхбарат берилди. Қазақстан Президенти униңдин ташқири “Маңғыстав” ракета-артиллерия кораблини көздин кәчүрди, шундақла Қазақстан Җумһурийити Мудапиә министрлиги Һәрбий деңиз күчлириниң қаримиғидики һәрбий техника, қурал-ярақ үлгилири билән тонушти. Қасым-Жомарт Тоқаев Маңғыставға қилған иш бабидики сәпириниң ахирида регион җамаәтчилиги билән учрашти. Униңға вилайәтлик мәслиһәт депутатлири, ветеранлар кеңишиниң әзалири, һөкүмәтлик әмәс секторниң вә тиҗарәтчиләр бирләшмисиниң вәкиллири, шундақла илмий һәм иҗадий зиялиларниң вәкиллири, яшлар қатнашти. Дөләт рәһбири өз сөзидә Маңғыстав вилайитигә қилған сәпириниң муһим әһмийәткә егә екәнлигини тәкитләп, маңғыставлиқларниң тарихниң әң җавапкәрлик пәйтлиридә һәрқачан мәмликәт рәһбәрлигини қоллап кәлгәнлигини алаһидә тилға алди. Қасым-Жомарт Тоқаев Қазақстанниң мустәқиллик жиллирида Тунҗа Президент–Елбасы Нурсултан Әбишоғли Назарбаевниң рәһбәрлигидә қолға кәлтүргән утуқлириға айрим тохтилип өтти. –Силәргә мәлумки, Елбасы тарихий қарар қобул қилди вә Қазақстан өз тәрәққиятиниң йеңи басқучиға қәдәм ташлиди. Биз Нурсултан Әбишоғли Назарбаев бәлгүләп бәргән стратегиялик мәхсәтләр билән вәзипиләргә қарап сүръәтлик илгириләшни давамлаштуримиз.Биз мустәқиллик жиллирида һакимийәт варислиғиниң турақлиқ системисини вуҗутқа кәлтүрдуқ. Техиму тәрәққий етиш–бу алдимизда туруватқан һаятий муһим вәзипә,–деди Қазақстан Президенти. Дөләт рәһбири шундақла ихтисадий өсүшни тәминләшниң, йеңи иш орунлирини вуҗутқа кәлтүрүшниң, тапавәтни ашурушниң вә аһалиниң турмуш сүпитини яхшилашниң зөрүр екәнлигини атап көрсәтти. –Пәқәт нефть саһасиғила үмүт қилип яшашқа болмайду. Һазирқи дунияда бу әқилгә мувапиқ кәлмәйду. Ихтисадий өсүш вә регионларниң паравәнлиги–бу инвестицияләр. Бизниң әркин ихтисадий зонилиримиз, җүмлидин «Ақтав деңиз порти» әркин ихтисадий зониси мәптункар инвестициялик иқтидарға егә. Шундақла туризмни тәрәққий әткүзүш мәмликәт алдида чоң истиқбал ачиду, бу саһада Маңғыстав бирқатар җиддий әвзәлликләргә егә,–дәп билдүрди Дөләт рәһбири. Қазақстан Президенти учришиш давамида Һөкүмәткә, министрликләргә, һакимийәтләргә тәрәққият институтлириға миллий ихтисатниң өсүшини вә қазақстанлиқларниң паравәнлигини тәминләшкә, коррупциягә қарши турушқа, кадрларни таллаш системисини мукәммәлләштүрүшкә вә җәмийәт билән нәтиҗидарлиқ алақини орнитишқа қаритилған ениқ һәм әмәлий чариләрни көрүшни тапшурди. Қасым-Жомарт Тоқаев учришиш йәкүнини чиқирип, регион аһалисиға муддитидин илгири Президент сайлимини өткүзүш тоғрилиқ қарарини қоллап-қувәтлигәнлиги үчүн миннәтдарлиқ билдүрди вә утуқ-муваппәқийәт һәм гүллиниш тилиди. Дөләт рәһбири иш бабидики сәпири вақтида шундақла «Шопан ата» вә «Бекет ата» йәр асти мечитлирини зиярәт қилип, хасийәтлик әҗдатлар роһиға тазим қилди.