• Асасий мақалилар
• 18 Сәуір, 2019

Бехәтәрлик Кеңишиниң мәҗлиси

Қазақстан Җумһурийитиниң Тунҗа Президенти – Елбасы Нурсултан Назарбаевниң рәислигидә Бехәтәрлик Кеңишиниң мәҗлиси болуп өтти. Мәҗлистә мәмликәтниң иҗтимаий-ихтисадий тәрәққияти вә экологиялик бехәтәрликни тәминләш мәсилилири муһакимә қилинди. Нурсултан Назарбаев мәҗлисни ечип, йүз бәргән сәясий вақиәләрниң дуния җамаәтчилигиниң чоң қизиқишни һасил қилғанлиғини тәкитлиди. – Мән тарихимизниң мошу һәл қилғучи пәйтидә қазақстанлиқларниң даналиқ вә бирлик көрсәткәнлигигә сәмимий миннәтдарлиқ билдүрмәкчимән. Мошу барлиқ күнләрдә дөләт вә җәмийәт әрбаплиридин, ишләпчиқириш коллективлиридин мениң намимға нурғунлиған хәтләр, телеграммилар келип чүшүватиду. Чәт әл дөләтләрниң һәм хәлиқара тәшкилатларниң рәһбәрлири телефон арқилиқ хәвәрлишип, қоллап-қувәтләватиду вә мақуллаватиду, – деди Елбасы. Қазақстанниң Тунҗа Президенти дөләтниң мәмликәтниң гүллинишигә вә турақлиқ тәрәққиятиға қаритилған йолиниң буниңдин кейинму сақлинидиғанлиғиға ишәндүрди. – Биз мошу барлиқ синақлардин мунасип өтүп, пүткүл дунияда билидиған вә һөрмәтләйдиған утуқлуқ мәмликәтни қурдуқ. Заманивий Қазақстанниң асасини салғучи сүпитидә мени дөлитимизниң келәчигигә вә гражданларниң паравәнлигигә алаһидә әһмийәт беримән. Мениң барлиқ иш-һәрикитим вә қәдимим шуниңға қаритилған, – дәп тәкитлиди Нурсултан Назарбаев. Бехәтәрлик Кеңишиниң рәиси Қазақстан хәлқиниң мәнпийәтлиридә стратегиялик программиларни буниңдин кейинму әмәлгә ашурушниң муһим екәнлигини атап көрсәтти. – Программиларниң мунтәзим рәвиштә орунлиниши тәрәққиятимизниң асасий шәрти болуп һесаплиниду. Биз адәмләрни турушлуқ өй, иш, сүпәтлик медицина хизмити вә билим билән тәминләш, шундақла муһтаҗ болуватқанларға ярдәм қилиш ишини давамлаштурушимиз керәк. Мошуниң һәммиси – парлақ келәчәккә селинған инвестиция, – деди Елбасы. Қазақстанниң Тунҗа Президенти бүгүнки таңда мәмликәтниң ихтисатни техиму өстүрүш вә аләмшумул синақ-ховупларни йеңиш үчүн яхши имканийәтләргә егә екәнлигини қәйт қилди. Мәҗлистә шундақла Премьер-министрниң орунбасари – малийә министри Әлихан Смайиловниң вә энергетика министри Қанат Бозымбаевниң докладлири тиңшалди. Елбасы докладчиларниң сөзлиригә изаһәт берип, регионларда экологиялик әһвални лазимлиқ дәриҗидә назарәт қилишни тәминләшниң вә мошу саһада қанун нормилириға хилаплиқ қилишларниң алдини елишниң зөрүр екәнлигини атап көрситип, бу чариләрниң, биринчи новәттә, аһалиниң турмуш сүпитини ашурушқа қаритилғанлиғини тәкитлиди. Мәҗлис йәкүни бойичә Һөкүмәткә, вилайәтләр, Нур-Султан, Алмута вә Чимкәнт шәһәрлириниң һакимлириға ениқ тапшурмилар берилди.