• Асасий мақалилар
• 18 Сәуір, 2019

Қазақстан – Өзбәкстан: стратегиялик шерикләр, қериндаш әлләр

Қазақстан Җумһурийитиниң Президенти Қасым-Жомарт Тоқаев Өзбәкстан Җумһурийитидә дөләт сәпиридә болуп, мәмликәт Президенти Шавкәт Мирзияев билән учрашти вә Қазақстанниң Өзбәкстандики Жилиниң тәнтәнилик ечилиш мәрасимиға қатнашти. Дөләт рәһбири Өзбәкстанға Шавкәт Мирзияевниң тәкливигә бенаән кәлди. Бу Қасым-Жомарт Тоқаевниң Қазақстан Җумһурийитиниң Президенти сүпитидә әмәлгә ашурған иккинчи чәтәллик вә биринчи дөләт сәпиридур. Қасым-Жомарт Тоқаевниң дөләт сәпириниң программиси Көксарай резиденциясидики тәнтәнилик учришиш мәрасимидин башланди. Андин тар вә кәңәйтилгән тәркиптики музакириләр башланди. Учришишниң башлинишида Президент Қасым-Жомарт Тоқаев Шавкәт Мирзияевқа сәмимий қобул қилғанлиғи һәм меһриванлиғи үчүн миннәтдарлиқ билдүрүп, дөләт сәпириниң муһим әһмийәткә егә екәнлигини тәкитлиди. – Тунҗа Президент – Елбасы Нурсултан Әбишоғли Назарбаев мустәһкәм вә уйғун иккитәрәплимә мунасивәтләрниң вуҗутқа келишигә чоң һәссә қошти. Сизму, Президент сүпитидә, Қазақстан - Өзбәкстан һәмкарлиғини наһайити жуқури дәриҗигә елип чиқтиңиз, – деди Дөләт рәһбири. Тоқаев шундақла Шавкәт Мирзияевқа Нурсултан Назарбаевниң салимини вә сәмимий тиләклирини йәткүзди. Қазақстан Җумһурийитиниң Президенти иккитәрәплимә өзара һәрикәтниң дәриҗисини жуқури баһалиди вә мунасивәтләрниң варислиқлиғини һәм жуқури жошқунлуғини сақлап қелишниң өзиниң вәзиписи екәнлигини тәкитлиди. – Шәхсән өзәм Қазақстан - Өзбәкстан һәмкарлиғиниң һеч бир тосалғулуқларсиз тәрәққий етиши үчүн мүмкин болған һәммә нәрсини қилимән, – дәп билдүрди Қазақстан Президенти. Өз новитидә Шавкәт Мирзияев Қасым-Жомарт Тоқаевни Қазақстан Җумһурийити Президенти лавазимиға киришкини билән тәбрикләп, қәдәм тәшрип қилғини үчүн миннәтдарлиқ билдүрди. – Мән Қазақстанниң Тунҗа Президенти Нурсултан Әбишоғли Назарбаевниң ролини алаһидә тәкитлимәкчимән. Униң күч чиқириши түпәйли биз өзара мунасивәтләрниң жуқури дәриҗисини қолға кәлтүрдуқ. Сиз министр, Премьер-министр, Сенат рәиси болғандиму мунасивәтлиримизниң яхшилинишиға күч чиқарған едиңиз, – дәп тәкитлиди Шавкәт Мирзияев. Музакириләр давамида тәрәпләр иккитәрәплимә мунасивәтләрни мустәһкәмләш истиқбалини муһакимә қилди, түрлүк саһалардики өзара һәрикәтниң муһим йөнилишлирини қарап чиқти, регионлуқ һәм хәлиқара күн тәртивиниң муһим мәсилилири бойичә пикирләшти. Учришиш вақтида Президентлар иккитәрәплимә һәм хәлиқара өзара һәрикәтниң, җүмлидин БМТ, ИҺТ, Хәлиқара Арал деңизини қутулдуруш фонди вә башқа қурулумлар даирисидики өзара һәрикәтниң муһим мәсилилири бойичә мәнпийәтләр билән мәвқәләрниң мас келидиғанлиғини тәстиқлиди. Шундақла бехәтәрликни тәминләшниң, һоқуқ қоғдаш органлири, мәхсус хизмәтләр вә мудапиә идарилири йөнилиши бойичә өзара һәрикәтниң, йолувчилар вә жүк тошушни, өзара содини көпәйтишниң, санаәт кооперациясини җанландурушниң түрлүк мәсилилирини муһакимә қилди. Қазақстан вә Өзбәкстан һәмкарлиғиниң асасий утуқлири вә истиқбали Президентларниң Бирләшкән билдүрүшидә өз әксини тапти. Музакириләр йәкүни бойичә шәртнамә-һоқуқ асасини кәңәйткән биртүркүм иккитәрәплимә келишимләр имзаланди. Қасым-Жомарт Тоқаев Ташкәнттә Мустәқиллик монументиға гүлләрни қойди. Кейин Узбекистон Хәлиқара форумлар сарийида Қазақстанниң Өзбәкстандики Жилиниң тәнтәнилик ечилишиға қатнашти. Мәрасим башлиништин авал Қасым-Жомарт Тоқаев билән Шавкәт Мирзияев “Улуқ даланиң мираси” көргәзмисини көздин кәчүрди. Көргәзмә экспозициясигә Қазақстан Җумһурийитиниң Миллий музейи фондидин қедимий Қазақстан сәнъитиниң надир әсәрлири, шундақла Ишиктә қорғинидин тепилған Алтун адәм қоюлған. Тәнтәнилик мәрасим аяқлашқандин кейин Қазақстан сәнъәт маһирлириниң вә иҗадий яшлириниң гала-концерти болуп өтти. Узбекистон сарийиға жиғилған икки миңға йеқин адәм Димаш Қудайбергенниң, Әлибек Днишевниң, Айман Мусахожаеваниң, Майра Мухамедқизиниң, Медет Шотабаевниң, Нурлан Бекмухамбетовниң, Мария Мудрякниң, Әлишер Каримовниң кәспий маһаритигә алқиш билдүрди. Сәнъәт маһирлири өзбәкстанлиқ тамашибинларниң диққитигә “Биржан-Сара” оперисидин үзүндиләрни, “Астана Балет” театри, “Салтанат” дөләт уссул ансамбли, Қ.Ғоҗамияров намидики җумһурийәтлик дөләт академиялик Уйғур музыкилиқ комедия театри вә җумһурийәтлик дөләт академиялик Корей музыкилиқ комедия театри артистлириниң иҗрасидики хореографиялик композицияләрни һавалә қилди.