• Мәнавият
  • 25 Сәуір, 2019

Әдәбиятчилар рәғбәтләндүрүлди

Шәмшидин АЮПОВ, “Уйғур авази” Өткән җүмә күни Қазақстан Язғучилар иттипақиниң Әдәбиятчилар өйидә жил йәкүнигә беғишланған мәҗлис болуп өтти. Униңға Язғучилар иттипақи башқармисиниң вәкиллири, иттипақ әзалири, зиялилар, аммивий әхбарат васитилириниң вәкиллири қатнашти. Мәзкүр жиғинға Алмута шәһиридә истиқамәт қиливатқан бир топ уйғур язғучилириму иштрак қилди. Мәҗлисни Қазақстан Язғучилар иттипақи башқармисиниң рәиси, көрнәклик шаир Улуқбек Есдаулет киришмә сөз билән ачти. У Язғучилар иттипақиниң кейинки вақитларда елип бериватқан паалийитигә тәпсилий тохталди. Жиғинда қазақ әдәбиятиниң проза саһаси бойичә Қуандық Түменбай, поэзия бойичә Нуржан Қуантайулы, әдәбий тәнқит бойичә Жанғара Дәдебаев, тәрҗимә бойичә Заманбек Әбдешев, балилар әдәбияти бойичә Арасанбай Ерестенов доклад қилди. Мәзкүр жиғинда қазақ әдәбиятидин ташқири рус, немис вә уйғур әдәбиятлири бойичиму һесаватлар берилди. 2018-жили уйғур әдәбияти бойичә нәшир қилинған әсәрләр бойичә филология пәнлириниң намзити, Қазақстан Язғучилар иттипақиниң әзаси Рәхмәтҗан Йүсүпов доклад қилди. У уйғур язғучилириниң поэзия, проза, драматургия, балилар әдәбияти вә рус, қазақ тиллирида нәшир қилинған әсәрләр бойичә мәлумат бәрди. Докладчи болупму Вильям Молотов, Зухра Исидуллаева, Абдулҗан Азнибақиев, Альбина Әмәтова қатарлиқ яш иҗаткарларниң йоруқ көргән топламлириға, шундақла «Мир» нәшрият өйи тәрипидин нәшир қилинған жигирмидин ошуқ яш иҗаткарларниң әсәрлирини өз ичигә алған «Арзу булақлири» намлиқ шеирлар топлимини тилға елип, яшларниң йәткән утуқлирини алаһидә тәкитлиди. Буниңдин ташқири докладчи тонулған язғучи Алимҗан Бавдиновниң “Бири кам дуния” романи, «Қәшқәрдә мәшъәл» драмиси вә бирқатар һекайилиридин тәркип тапқан «Бири кам дуния» китави, язғучи Абдувәли Садировниң «Виккингларниң уйғур падишаси» намлиқ романи, пешқәдәм язғучи вә драматург Әхмәтҗан Һашириниң 80 яшлиқ тәвәллудиға беғишланған «Чарбағ» пьесилар топлими вә әдәбий тәрҗимиләр үстидә әтраплиқ тохталди. Әдәбий жил йәкүни чиқирилғандин кейин 2017 — 2018-жиллар бойичә хәлиқара «Алаш» мукапитиниң саһиблири аталди. Мәзкүр мукапатқа еришкән 19 адәмниң ичидә Уйғур әдәбияти кеңишиниң рәиси, шаирә вә алимә Патигүл Мәхсәтоваму болди. Пурсәттин пайдилинип, биз Патигүл Мәсимқизини ушбу мукапити билән сәмимий тәбрикләп, иҗадийитигә утуқ тиләймиз.

25 рет

көрсетілді

0

пікір
Алдыңғы мақала Китап муәллипи билән учрашти
Келесі мақала Кегәндики яш иҗаткарларниң форуми

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *