• Асасий мақалилар
• 06 Мамыр, 2019

Дөләт мукапатлирини тапшурди

Вәтән һимайичилири күни вә Ғалибийәт күни һарписида Президент Қасым-Жомарт Тоқаев Ақордида дөләт мукапатлирини тапшурди. – Дөләт мукапатлирини тапшурушниң шанлиқ сәнәләр – Вәтән һимайичилири күни вә Ғалибийәт күни һарписида өтүватқанлиғи алаһидә рәмзгә егә. Мошу май күнлиридә биз фашизм үстидин ғалип чиққан атилиримизниң өлмәс җасаритини әскә алимиз. Уларниң мислисиз қәһриманлиғи вә сунмас ирадиси бизниң йеримиздә течлиқ вә хатирҗәмликни сақлап қелишқа имканийәт бәрди, – дәп билдүрди Қасым-Жомарт Тоқаев. Мәрасимға шундақла Асқар Мамин, Дариға Назарбаева, Марат Тәжин, Нурлан Ниғматулин, Қалмуханбет Қасымов, Кәрим Мәсимов, Алик Шпекбаев вә Ерлан Турғумбаев қатнашти. Мукапатланғанлар арисида 26 адәм бар – улар “Данқ”, “Айбын”, “Құрмет” орденлири, шундақла “Ерлігі үшін” вә “Жауынгерлік ерлігі үшін” медальлири билән тәғдирләнди. Бу күни шундақла бир топ офицерларға мәхсус унванлар, класслиқ дәриҗиләр берилди. Президент мәрасимға қатнашқучиларни Вәтән һимайичилири күни вә Ғалибийәт мәйрими билән тәбрикләп, һәрбий хизмәтчиләр билән мәхсус дөләт органлири хадимлириниң Қазақстан Җумһурийитиниң бехәтәрлигини тәминләшкә қошуватқан һәссисини алаһидә тәкитлиди. – Әҗдатлиримиз вәсийәт қилған ана йәрни қоғдаш – бизниң умумий борчимиз. Шуниңға ишәнчим камилки, силәргә охшаш әр жүрәк адәмләр Вәтән бехәтәрлиги күзитидә туруватқанда, биз мәмликитимизниң парлақ келәчигигә ишәшлик болалаймиз, – деди Қасым-Жомарт Тоқаев. Дөләт рәһбири Қазақстан Җумһурийитиниң Тунҗа Президенти – Елбасы Нурсултан Назарбаевниң һәрқачан бехәтәрликни тәминләшни дөлитимизниң ички вә ташқи сәясәт системисида асасий орунға қоюп кәлгәнлигини тәкитлиди. Қасым-Жомарт Тоқаев генераллар билән офицерларға мураҗиәт қилип, алий һәрбий вә мәхсус унванларниң тапшурулуши уларниң әмгигиниң мунасип баһаланғанлиғи болуп һесаплинидиғанлиғини тәкитлиди. Мәрасим давамида Қазақстан Җумһурийитиниң Баш прокурори Ғизат Нурдәулетовқа вә Қазақстан Җумһурийити Баш прокурориниң орунбасари Марат Ахметжановқа 2 класслиқ дөләт юстиция мәслиһәтчиси класслиқ дәриҗиси; Қазақстан Җумһурийитиниң Дөләт хизмити вә коррупциягә қарши туруш агентлиғиниң рәиси Алик Шпекбаевқа вә ички ишлар министри Ерлан Турғумбаевқа полиция генерал-лейтенанти мәхсус унвани; “Қураллиқ Күчләрниң ветеранлири” җумһурийәтлик җәмийәтлик бирләшмиси Мәркизий кеңишиниң рәиси Мухтар Алтынбаевқа генерал-лейтенант һәрбий унвани; Әзимхан Жүсиповқа Дөләт күзити хизмитиниң генерал-майори мәхсус унвани; Қазақстан Җумһурийити Миллий бехәтәрлик комитети рәисиниң орунбасари Дәулет Ерғожинға, Т.Әлимжановқа, Миллий бехәтәрлик комитети Ақтөбә вилайити бойичә департаментиниң башлиғи Марат Ирменовқа, Миллий бехәтәрлик комитетиниң департамент башлиғи Асхат Төлеуовқа, Б.Уәлиниязовқа миллий бехәтәрлик генерал-майори мәхсус унвани; Қазақстан Җумһурийитиниң “Сырбар” Ташқи разведка хизмити мудириниң орунбасари Бақытжан Найзабековқа ташқи разведкиниң генерал-майори мәхсус унвани; Қазақстан Җумһурийитиниң Дөләт хизмити вә коррупциягә қарши туруш агентлиғиниң Миллий коррупциягә қарши туруш бюросиниң рәһбири Қайрат Сунтаевқа 3-дәриҗилик алий квалификациялик класси; А.Халықовқа генерал-лейтенант һәрбий унвани, М.Аймашевқа, А.Ашировқа, Ф.Баденовқа, А.Жумағалиевқа, Т.Қайырбековқа, Т.Муратбаевқа, А.Мустабековқа генерал-майор һәрбий унвани; Қазақстан Җумһурийити Қураллиқ Күчлири Һәрбий-деңиз күчлириниң баш қомандани Сәкен Бекжановқа контр-адмирал һәрбий унвани; Қазақстан Җумһурийитиниң Баш прокуратуриси Һоқуқ статистикиси вә мәхсус һесап комитетиниң рәиси Қайрат Жақыпбаевқа, Алмута шәһириниң прокурори Берик Жүйриктаевқа, Қарағанда вилайитиниң прокурори Марат Сәксембаевқа 3-класслиқ дөләт юстиция мәслиһәтчиси класслиқ дәриҗиси; Түркстан вилайәтлик Полиция департаментиниң башлиғи Қайрат Далбековқа, А.Дүсембаевқа полиция генерал-майори мәхсус унвани берилди.