• 9-май – Ғалибийәт күни
  • 15 Мамыр, 2019

Москвадин кәлгән хәт

Йеқинда дадам рәмитиниң һөҗҗәтлирини қарап олтирип, арисидин Кеңәш Иттипақи вақтида почта арқилиқ әвәтилидиған конвертқа көзүм чүшти. Ечип қарисам, рус тилида йезилған хәт екән. У Москва шәһиридин кәпту. Дадам – көрнәклик шаир һәм устаз Мәшүр Җәлилов – һаят чеғида Кәтмән йезисиниң турғунлириға ярдәм қолини көп сунидиған. Бу қетимму бизниң өйниң адресиға кәлгән хәткиму биринчи болуп җавап язған дадам болуши мүмкин дегән ойға кәлдим. Хәт йезимизниң турғуни, уруш ветерани Сонур Мәмировниң намиға қаритилип йезилипту. Хәттә: «Биз үчүн қиммәтлик Сонур Мәмиров! 634- мәктәп оқуғучилири билән устазлири сизни Йеңи жил мәйримиңиз билән тәбрикләйду. Сизгә һәм йеқинлириңизға утуқ, саламәтлик тиләймиз. Мошу жил сизгә көп хошаллиқларни елип кәлсун. Сизниң язған хетиңизни алдуқ. Өзиңиз тоғрилиқ язғанлириңизни оқуп чиқтуқ. Бешиңиздин өткән ишларниң һәммисини йезип йәткүзүш оңай әмәс. Уруш жүрүватқан пәйттә техиму мүмкин әмәс. «Һаят үчүн» дегән дивизионлуқ китапта сизниң дүшмәнниң арқа тәрипидин һуҗум қилғанлиғиңиз тоғрилиқ йезилған. Униңда Холма шәһириниң йенидики Сутоки йезисида болған шиддәтлик уруш тәсвирләнгән. Җәңгивар топни Волгапкин исимлиқ офицер башқурған екән. У һелиму һаят. Москваниң әтрапида яшайду. Сизниң есиңиздиму шу җәң? Һуҗумға қатнашқучиларни издәштүрүштә бизгә 1073-полкниң комиссари Логвиненко Петр Васильевич ярдәмләшти. Кейинирәк у дивизияниң рәһбири болди. Һазир у полковник унвани билән һөрмәтлик дәм елишта. Биз униңға сизниң сүритиңизни көрсәткәндә: «Тонуш вә йеқимлиқ чирайғу» деди. Һәқиқәтән, 25 жил өтти, адәмләрму өзгирип қалди. Бирақ командир өз солдатлирини техи әстин чиқармапту. Бизгә өзиңизниң есидә қалған вақиәләр тоғрисида йезип әвәтсиңиз. Сизниң язған хәтлириңизни оқуғучиларға оқуп беримиз. Сүритиңизниму мәктивимизниң һәрбир оқуғучиси ениқ тонуйду. Сиздин йәнила йеңилиқлар билән, Сутоки йезиси үчүн болған җәңләр тоғрилиқ һекайилириңизни күтимиз. Һазирқи макан-җайимни әвәттим. Москва шәһири И-81, Шокальский проезди 17 кв. 36 Кулишова Людмила Васильевна. Йәнә бир қетим сизгә мошу жили яхшилиқ елип келишини тиләймиз», дәп йезилипту. 1970-жили йезилған бу хәт мениң қолумға чүшкинигә бәк хурсән болдум. Хәтни оқуп чиқип, есимгә дадамниң, «Москвадин хәт кәлди. Сонур акиниң исми әбәдийләштүрүлүп, Москвадики бир пионерлар отряди Сонур Мәмиров намида атилипту» , дегән сөзлири ядимға кәлди. Кәтмәнлик уйғур җәңчисиниң жирақ Россиядиму нами қалди. Жутумиздики кочиларниң бири Сонур Мәмиров намида атилиду. Демәк, униң исми миннәтдар әвлатлири қәлбидә мәңгү яшайду дегән сөз. Гүлмира ҖӘЛИЛОВА, М.Җәлилов намидики Кәтмән оттура мәктивиниң муәллими. Уйғур наһийәси.

34 рет

көрсетілді

0

пікір
Алдыңғы мақала Ғалибийәт мәйрими: қәйәрдә қандақ нишанланди?

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

16 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы