- Йеңилиқлар
- 28 Қыркүйек, 2012
Бу қетим Аватта учраштуқ
Йеқинда биз, Уйғур наһийәлик «Бағвәнләр жәмийитиниң» әзалири, Ават йезисида жиғилдуқ. Биз бир йәргә җәм болғанда әң муһим мәсиләрни муһакимә қилип, уни һәл қилиш йоллирини издәймиз. Аваттиму нәқ шундақ болди. Алди билән биз күн тәртивидики икки мәсилини һәл қиливелишқа тириштуқ. Уларниң биринчиси – хәлқимизниң бағвәнлик әнъәнилирини тикләш, иккинчиси — дөләтниң маарип саһасидики тәшәббуслирини әмәлгә ашурушқа һәмкарлишиш.
Сәпдишимиз Уйғун Арзиев Таҗикстанда бағвәнләргә беғишлинип өткән хәлиқара әнҗуманға қатнишип кәлгән еди. У бизгә қизиқарлиқ нәрсиләрни ейтип бәрди. Бүгүн таҗик хәлқи МДҺ җумһурийәтлири бойичә бағвәнчиликниң алдини бәрмәй келиветипту. Өрүкни қурутуш бойичә йеңи технологиягә көчүп, чоң утуқларға йетиветипту. Шуңлашқа қурутқан өрүк қақлирини чәт әлләргә көпләп чиқиридекән. Уйғун Арзиевниң пикричә, Қазақстанда бағвәнчиликни тәрәққий әткүзүш үчүн барлиқ шараит моҗут. Һәтта таҗик деханлиридин озуп кетишкиму болиду. Униң үчүн биз, Уйғур наһийәлик бағвәнләр җәмийитиниң әзалири, бу ишта наһайити тиришчанлиқ көрситишимиз лазим. Буни һәммә бағвәнләр чоңқур һис қилмақта. Бу йосунда, өрүкниң миллий сортлирини йетилдүрүшни ойлаватимиз. Бүгүнки күндә көплигән бағвәнлиримиз көчәтни тоғра улаш, путаш, олтарғузуш, пәрвиш қилиш һәм дорилаш бойичә хелила мәлуматларға егә. Улар бир-биригә ярдәм берип, пайдилиқ мәслиһәтлири билән ортақлашмақта. Хошал болидиған йери, өз ара тәҗрибә алмаштуруш ишиму күчәйди. Һәтта биз тәрәпкә чәт әлләрдинму нурғунлиған мутәхәссисләр кәлмәктә. Ахирқи жилларда бағвәнләрниң сепи икки һәссигә көпәйди. Шу арқилиқ биз наһийәдики бирқатар иҗтимаий мәсилиләрниң йешилишигә түрткә болуватимиз.
Биз наһийә бойичә миллий маарип саһасини риваҗландурушқиму алаһидә көңүл бөлүватимиз. Келәчәктә бу паалийәтлиримиз техиму күчийиду. Униңға ишәнчим камил. Биз «Уйғур мәктәплирини қоллаш фонди» рәһбәрлигиниң миллий маарип бойичә тәшәббуслирини наһайити орунлуқ дәп һесайлаймиз. Аваттики баш қошушта биз дөләтниң 2012 — 2016-жиллириға бәлгүләнгән маарип саһаси бойичә миллий плани билән әтраплиқ тонуштуқ. Президентимиз мәзкүр планни әмәлгә ашуруш үчүн һәммә күчләрни бир йәргә топлашниң муһимлиғини әскәртип, бу алийҗанап паалийәткә җәмийәтлик тәшкилатларниң иштрак қилишини тәвсийә қилған екән. Қисқиси, биз Президентимизниң маарип саһасини йеңилаш сәяситини қоллап-қувәтләш мәхситидә Ғалжат, Чоң Ақсу, Түгмән, Чонҗа, Ширин, Ават охшаш көплигән йезилардики уйғур мәктәплиригә мәхсус хираҗәт бөлдуқ. Униңдин башқа яхши оқуватқан қабилийәтлик балилар вә чоң утуқларни қазиниватқан муәллим-устазлар үчүн алаһидә мукапатларни җарий қилдуқ.
Бу хил паалийитимиз келәчәктә йәниму давам қилидиған болиду.
Арупҗан МӘҖИТОВ.
Уйғур наһийәси.
572 рет
көрсетілді0
пікір
