• «Уйғур авазиниң» сәйилгаһи
• 30 Мамыр, 2019

Бәхит чүшәнчиси һәққидә

Бәхит чүшәнчиси наһайити кәң мәзмунға егә. Бәзиләр җапа-мәшәқәт арқилиқ қол йәткүзгән утуғини бәхит дәп билсә, айримлири җапа чәкмәй һалавәткә еришишни бәхит дәп һесаплайду. Гайилири аилә хатириҗәмлигини, бәзибирлири хизмитидә еришкән муваппәққийәтлирини бәхит санайду. Бирмунчә адәмләр есил кийим-кечәк вә зебу-зенәтни, һашамәтлик өй билән қиммәт машинини бәхит дәп билиду. Инсанниң дунияқариши, билим қурулмиси, мәдәнийәт сапаси, турмуш адити, мүҗәз-хулқи вә яшаш шараити охшимиғанлиқтин, уларниң бәхит һәққидә чүшәнчисиму бир-биридин кәскин пәриқлиниду. Бәхитниң өлчәм бирлиги болмайду. Шуниң үчүн адәмләрниң бәхит туйғуси, бәхит қариши һәм бәхит чүшәнчиси һәрхил болиду. Бәхит — қол билән тутқили, көз билән көргили болмайдиған, лекин һәрким өз көзқариши бойичә өлчәйдиған, дунияқариши бойичә һис қилидиған ички сезим. Бәхит — адәмләрниң арзу-истәклириниң висал дилбири. Җапаға чидап, алға интилишму бәхиткә еришишниң бир амилидур. Яшашниң мәхсити — һәқиқий бәхиткә еришиш. Адәмдә бәхит туйғуси болғандила, униң бәхиткә еришиш имканийити туғулиду. Бәзиләр бәхитниң ичидә турупму, өзиниң бәхитлик екәнлигини һис қилалмайду, бәхит әтрапида пәрванидәк айлинип жүрсиму, уни сезәлмәйду. Адәм үчүн өмүр сүрүшниң өзи бир бәхит. Һаяттин ибарәт бу қиммәтлик пурсәтни қәдирләп, һалал тәр төкүп тиришқандила, һәқиқий бәхитниң пәйзини сүргили болиду. Әмгәк, худди дунияни яратқандәкла, бәхитниму яритиду. Әмгәксиз бәхит болмайду. Һәрким бәхит йолини өзи таллайду вә униңға пәқәт әҗир-меһнәт арқилиқла еришәләйду.