• Йеңилиқлар
  • 30 Мамыр, 2019

Тәрәққиятниң йеңи үлгилирини издәп

Алмутида муһим дуниявий проблемиларни вә Шәриқ һәм Ғәрип оттурисидики өзара һәрикәтни муһакимә қилиш бойичә надир диалог мәйданлириниң бири болған XVI Евразия медиафоруми болуп өтти. Медиафорумни ечиш мәрасими Қазақстан Президенти Қасым-Жомарт Тоқаевниң тәбрик сөзи билән башланди. Уни әхбарат вә җәмийәтлик тәрәққият министри Дәурен Абаев оқуп бәрди. “Бу мәйдан буниңдин 15 жилдин ошуқ вақит илгири пәйда болуп, униңда журналистлар кәңдаирилик муһим мәсилиләр бойичә пикир елишиватиду. Жилдин-жилға медиафорумда хәлиқара вә регионал күн тәртивиниң әң өткүр, муһим проблемилири муһакимә қилинмақта. Силәргә мәлумки, һазир Қазақстан өз тәрәққиятиниң муһим дәвригә қәдәм ташлиди: 9-июньда муддитидин илгири Президент сайлими өтиду. Бу вақиә һазирниң өзидила хәлиқара бирләшминиң диққитини җәлип қиливатиду. Мән әмәлдики Қазақстан Президенти сүпитидә адил, адаләтлик вә демократик сайлам өткүзүлүшиниң тәрәпдари. Шуңлашқа хәлиқара байқиғучилар вә аммивий әхбарат васитилири делегациялириниң қатнишишини қоллап-қувәтләймән”, дейилиду Дөләт рәһбириниң тәбрик сөзидә. Мәлумки, йеңи рәқәмлик һәққанийәт — бу қетимқи форумниң мәркизий мавзулириниң бири болди. Дуния адәмләрни әхбаратниң рухсәтсиз тарқитилишидин һимайә қилиш мәсилилиригә чоңқур тәшвиш билдүрүватиду, сайламларға вә сәясий җәриянларға рәқәмлик технологияләрни пайдиланған һалда арилишиш проблемилири актив муһакимә қилинмақта. Иҗтимаий институтлар Интернетниң вә иҗтимаий тармақларниң болупму өсүватқан әвлатқа сәлбий тәсир қилишиға тәшвишләнмәктә. Адәмләр йеңи һадисиләр билән ховупларға қарши туруш чарилиригә муһтаҗ болуватиду. Әйнә шуниңға бағлиқ Қазақстан Президенти журналистлар бирләшмисини асаслиқ җавап елиш мәхситидә мошу җәриянларни җиддий үгинип муһакимә қилишқа чақирди вә уларға үнүмлүк иш, қоюлған мәхсәтләрни қолға кәлтүрүштә утуқ-муваппәқийәт тилиди. Дәурен Абаев медиафорумни уюштурғучиларға униң жуқури дәриҗидә өтүватқанлиғи үчүн миннәтдарлиқ билдүрди. Медиафорумниң мәхсус меһмини, Әрмәнстан Президенти Армен Саркисян өз сөзидә ЕАМФ Тәшкилий комитетиниң рәиси Дариға Назарбаеваға миннәтдарлиқ билдүрди. – Сизни вә кәсипдашлириңизни пәқәт журналистлар арисидила әмәс, бәлки пүткүл Евразия кәңлигидә тәсиргә егә медиафорум охшаш әҗайип институт билән тәбрикләймән, – дәп тәкитлиди әрмәнстанлиқ меһман. – Евразия дегинимиз немә? Бу бирлири йоқап кәткән, бәзилири болса, улуқ дөләтләргә айланған түрлүк цивилизацияләрниң улуқ тарихи. Евразия – бу Ипәк йоли, Гумилев философияси, Нурсултан Назарбаевниң 1994-жили МДУда қилған доклади вә көплигән сәясий әрбапларниң мошу идеяни қоллап-қувәтлиши. Әгәр Евразия тоғрилиқ гәп қилидиған болсақ, сөз, биринчи новәттә, Қазақстан тоғрилиқ болуши керәк, чүнки бу мәмликәт һәм сәясий, һәм ихтисадий җәһәттин униң мәркизидә туруватиду. Һазирқи Евразия ихтисадий иттипақиға айланған ихтисадий һәмкарлиқ идеясиниң Қазақстанда вуҗутқа келиши тәсадипи әмәс. Армен Саркисян буниңдин 10 вә 20 жилдин кейинму медиафорумға қатнишиш хаһишини билдүрди, чүнки инсанийәт алдида туруватқан вәзипиләр дайим өзгириватиду. – Дунияда өзгәрмәйдиған бирла нәрсә бар – дунияниң турақлиқ әмәслиги, – дәп Әрмәнстан Президенти өз сөзини философиялик роһта тамамлиди. МДҺ Парламентларара ассамблеясиниң рәиси, Россия Федерацияси Федерал жиғини Федерация Кеңишиниң рәиси Валентина Матвиенкому ЕАМФ қатнашқучилириға тәбрикнамә әвәтти. “Медиафорумниң һәр жили Евразия интеграциясиниң тәшәббускари вә илһамчиси болуп һесаплинидиған нәқ Қазақстанда өтүши тәсадипи әмәс, – дейилиду мураҗиәттә. – 2018-жили декабрьда қобул қилинған Евразия ихтисадий иттипақи даирисидә интеграциялик җәриянларни техиму тәрәққий әткүзүш тоғрилиқ декларациядә бирләшмә қатнашқучилири ЕАИИни ташқи шерикләр билән өзара пайдилиқ, тәң һоқуқлуқ һәмкарлиқ үчүн очуқ болған вә өзара һәрикәтниң йеңи шәкиллирини вуҗутқа кәлтүридиған һазирқи дуния тәрәққиятиниң әң әһмийәтлик мәркәзлириниң бири сүпитидә шәкилләндүрүш бойичә улуғвар вәзипини қойди. Евразия медиафоруминиң мошу вәзипини әмәлгә ашурушниң нәтиҗидарлиқ васитилириниң бири болуп һесаплинидиғанлиғиға камил ишинимән”. Форум қатнашқучилириға шундақла Алмута шәһириниң һакими Бауыржан Байбекму мураҗиәт қилди. – Иллиқ меһмандостлуғимизни һис қилип, шәһиримизниң әҗайип тәбиити һәм диққәткә сазавәр җайлиридин бәһир елишиңларни, миллий мәдәнийитимиз тоғрилиқ көпирәк билишиңларни тиләймән, – дәп өз тилигини билдүрди шәһәр һакими. Әнъәнә бойичә Евразия медиафорумиға чоң аммивий әхбарат васитилириниң вәкиллири, сәясәт, ихтисат, илим-пән, мәдәнийәт вә башқа саһалардики абройлуқ экспертлар жиғилди. Мәсилән, медиафорумға Әрмәнстан президентидин ташқири, Эстонияниң сабиқ президенти Тоомас Хендрик Ильвес, Мәркизий разведка башқармисиниң сабиқ рәһбири Джеймс Вулси вә башқиму бирқатар сәясәтчиләр, журналистлар қатнашти. Улар дуния тәрәққиятиниң йеңи үлгилирини издәш, истимал боһрини, масс-медианиң рәқәмлик реаллиғи, аләмшумул ишәнчә боһрини, милләтчиликниң вә популизмниң өсүшиниң көрүнүшлири охшаш мәсилиләрни муһакимә қилди. XVІ Евразия медиафорумиға қатнашқучилар ахирида әнҗуман ишини йәкүнләп, форумниң өзиниң асасий мәхситигә толуқ йәткәнлигини, йәни Қазақстан, Евразия вә пүткүл дуния тәрәққиятиниң әң өткүр мәсилилири бойичә пикир елишишниң орун алғанлиғини йәкдиллиқ билән тәкитлиди вә тәшкилий комитет рәиси Дариға Назарбаеваға чоң миннәтдарлиқ билдүрди.

57 рет

көрсетілді

0

пікір
Алдыңғы мақала Тәрәққиятниң асасий амиллири
Келесі мақала Яш математиклар бәйгигә чүшти

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

18 Қараша, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы