• Әхбаратлар еқими
• 30 Мамыр, 2019

Җошқун тәрәққият үчүн имканийәтләр

Дөләт рәһбири Қасым-Жомарт Тоқаев Ақтөбә вилайитидә иш бабидики сәпәрдә болди. Президент Елбасы Нур-Султан, Алмута вә Чимкәнттин кейин Қазақстанниң төртинчи чоң индустриал мәркизи дәп атиған регионниң иҗтимаий-ихтисадий тәрәққияти, шундақла дөләт программилириниң вә бирқатар чоң инновациялик лайиһиләрниң әмәлгә ашурулушиниң кетип бериши билән тонушти. “Green Capital Kazakhstan” ҖЧЙниң йеңи чоң теплица комплекси иш бабидики сәпәр программисидики биринчи объект болди, теплица жилиға үч миң тонниға йеқин көктат йетиштүриду. Қасым-Жомарт Тоқаев йетиштүрүлүватқан мәһсулат түрлири билән тонушти вә йеңи иш орунлирини вуҗутқа кәлтүрүш һәм аһалиниң паравәнлигини ашуруш үчүн шундақ инвестициялик лайиһиләрни ишқа қошушниң муһим екәнлигини тәкитлиди. Андин кейин Қасым-Жомарт Тоқаев Ақтөбә Индустриал зонисиниң паалийити билән тонушти. Дөләт рәһбиригә керамика-гранит вә керамика плиткисини ишләп чиқиридиған “Зерде-Керамика Ақтөбә” ҖЧЙ заводи қурулушиниң кетип бериши тоғрилиқ әхбарат берилди. Мәзкүр инвестициялик лайиһиниң умумий баһаси 9,2 миллиард тәңгини тәшкил қилиду. Президентқа Дөләт индустриялик-инновациялик тәрәққият программмисини әмәлгә ашуруш, санаәтни йеңилаш вә кичик һәм оттура тиҗарәтни тәрәққий әткүзүш тоғрилиқ доклад қилинди. Қасым-Жомарт Тоқаевқа шундақла “СНПС-Ақтөбемунайгаз-акционерлиқ җәмийитиниң нефть чиқириш компанияси вә “ARM WIND” ҖЧЙниң шамал электр станциясини селиш карханиси охшаш вилайәтниң чоң санаәт объектлириниң паалийити тоғрилиқ әхбарат берилди. “ТНК “Казхром” акционерлиқ җәмийитиниң Ақтөбә ферроеритмилар заводи Дөләт рәһбири зиярәт қилған новәттики объект болди. Бу йәрдә Президент технологиялик җәриян вә Қазақстан металлургиясиниң йетәкчиси карханилириниң бириниң ишләпчиқириш көрсәткүчлири билән тонушти. Қасым-Жомарт Тоқаев иш бабидики сәпири даирисидә Алмута декларациясиниң 40 жиллиғиға вә Ақтөбиниң 150 жиллиғиға беғишланған “Аһали саламәтлигини сақлаш: сәясәт, илим-пән, билим дәсләпки медицина-санитарлиқ ярдәм әмәлияти” хәлиқара илмий-әмәлий конференцияниң ишиға қатнашти. Президентқа Ақтөбә вилайитиниң мисалида медицинилиқ кластерни вуҗутқа кәлтүрүш тәҗрибиси вә регионлуқ саламәтликни сақлаш саһасида кластерлиқ яндишишни қоллиниш истиқбали тоғрилиқ әхбарат бәрди. Қасым-Жомарт Тоқаев форум қатнашқучилириға мураҗиәт қилип, милләт саламәтлигиниң дөләтниң асасий байлиғи екәнлигини тәкитлиди. – Елбасыниң тапшурмиси бойичә қурулған Ақтөбә медицина мәркизи елимиз медицина саһасини тәрәққий әткүзүшкә чоң һәссә қошуватиду. Бүгүнки таңда регион турғунлири бу йәрдә нейрохирургия, балилар кардиологияси, трансплантология саһалирида сүпәтлик хизмәткә егә болуватиду. Барлиқ вилайәтләр мана шундақ дәриҗигә интилиши керәк. Буниң үчүн тегишлик иқтидар бар, – деди Президент. Қазақстан Президенти өз сөзидә саламәтликни сақлаш инфрақурулумини йеңилаш, давалаш хизмитиниң вә дора-дәрмәкләрниң сүпитини яхшилаш, елимиз медицина пәнини тәрәққий әткүзүш, шундақла саһани рәқәмләштүрүш бойичә көрүлүватқан чариләргә тәпсилий тохтилип өтти. Президент шу күни вилайәт җамаәтчилигиниң вәкиллири билән учрашти. Дөләт рәһбири уларни Ақтөбә шәһириниң 150 жиллиқ юбилейи билән тәбрикләп, Ақтөбә вилайитиниң күчлүк санаәт, логистикилиқ вә транзит иқтидариға егә екәнлигини тәкитлиди. – Регионда җошқун тәрәққият үчүн барлиқ имканийәтләр бар. Йәрлик тиҗарәтчиләрниң активлиғини тәкитләп өтүш керәк, “Туған жер” программиси даирисидә вилайәттә 1 400 ошуқ лайиһә әмәлгә ашурулди. Униңдин ташқири чәт әл инвесторлири иҗтимаий объектлар қурулушиға паал қатнишиватиду, – деди Қасым-Жомарт Тоқаев. Шуниң билән биллә Қазақстан Президенти аһали турмушиниң сүпитини яхшилашниң вә ихтисадий өсүшни тәминләшниң Һөкүмәт һәм һакимларниң асасий вәзипилири екәнлигини атап көрсәтти. Учришишта регионниң һәл қилинмайватқан проблемилириғиму чоң диққәт бөлүнди. Қасым-Жомарт Тоқаев чарә-тәдбир ахирида регион вә мәмликәтниң тәрәққиятиға салмақлиқ һәссә қошқан бир топ ақтөбиликләргә тәшәккүрнамиләр тапшурди.