• Сәнъәт
• 05 Маусым, 2019

«Аманнисаханниң» Узунағаштиму «қизлири» бар

Бәхтишат СОПИЕВ, «Уйғур авази» Бу уссул ансамбли 2010-жили Алмутидики «Достлуқ» мәһәллисидә қурулған еди. Мәликә Розахунова рәһбәрлигидики ансамбль қизлири өзлириниң әвришим уссуллири арқилиқ бирдинла тамашибинларни мәһлия қиливалди. Көплигән мәрасимларда өзлириниң талантини намайиш қилип келиватқан уссул шәйдалириға кәспий уссулчиларниңму иҗабий баһасини бәргәнлигиниң талай қетим гувачиси болған едуқ. Чоңлиримиз «Аманнисаханниң» өмри узақ болсун» дегән дуалирини беришти. Аз вақитниң ичидә мәзкүр иҗадий коллектив җумһурийәтлик, хәлиқара конкурсларға иштрак қилип, алдинқи орунлардин көрүнди. 2012-жили болса, өзлириниң һесават концертини бәрди. Концерт көпчиликниң көңлидикидәк болди. Һәрбир уссулни тамашибинлар гүлдирас чаваклар билән қарши алди. Концерттин кейин сөзгә чиққучилар «Аманнисаханға» шан-шөһрәт елип кәлгән икки Мәликәгә өзлириниң миннәтдарлиғини изһар қилди. Чүнки уларсиз яш талантларни мундақ чоң сәһниләрдә көрүш мүмкин әмәс еди. Уларниң бири — балетмейстер, бири — хореограф. — Биринчидин, мән бизни дайим қоллап-қувәтләватқан ата-аниларға рәхмитимни ейтмақчимән, — дәйду ансамбльниң балетмейстри Мәликә Розахунова. — Чүнки һазир мәбләғсиз хәлиқара конкурсларға қатнишиш оңай әмәс. Пәрзәнтлириниң келәчигини ойлайдиған сәнъәтхумар инсанларға миннәтдарлиғим чәксиз. Хореограф Мәликә Мамутова болса, күндин-күнгә уссулчилар сепиниң өсүватқанлиғиға бәк хошал. — «Уйғурниң бир қолида — һосул, бир қолида — уссул» дәп дана хәлқимиз бекар ейтмиған екән. Тиришчан хәлқимиз бар, демәк, мәдәнийитимиз һечқачан йоқимайду. Һазир башқа шәһәр, наһийәләрдин бизниң ансамбльниң әзаси болушиға хаһишини билдүрүватқанлар наһайити көп, — дәйду Мәликә биз билән болған сөһбәттә. Шуңлашқа Мәликә җай-җайларда мәзкүр уссул ансамбльниң шөбилирини қурушқа күч чиқириватиду. Әйнә шундақ шөбиләрниң бири Җамбул наһийәсиниң Узунағаш йезисида барлиққа кәлди. Амира Бектемирова, Розгүл Пәрһатова, Карина Адеева, Алинур Исрайилова, Гүлһаят Саттарова, Сабина Турдиева, Рамина Сидиқова вә Амина Сидиқовани узунағашлиқларниң «Аманнисаханниң» қизлири» дәп атиши тәсадипи әмәс. Улар һәқиқий мәнасида уссулға иштияқ бағлиған қизлар. Йеқинда улар «Lіttle star» намлиқ 6-җумһурийәтлик көпжанрлиқ конкурсқа иштрак қилип, лауреат аталди. Уссулчиларни бу хошаллиғи билән Җамбул наһийәсиниң баш жигитбеши Мәхсүт Нәзәров келип тәбриклиди. — Яшлар жилиға мунасивәтлик тәвәмиздә келәчәк әвладимиз спорт вә сәнъәттә хелә утуқларни қолға кәлтүрмәктә, — дәйду баш жигитбеши хошаллиғини биз билән бөлүшүп. — Кәлгүсидә яшлиримизни башқа саһаларда көрүшниму үмүт қилимиз. «Аманнисаханға» ақ йол!