• Асасий мақалилар
• 05 Маусым, 2019

Президент Җамбул вә Атырав вилайәтлиридә болди

Қазақстан Президенти Қасым-Жомарт Тоқаев Җамбул вә Атырав вилайәтлирини зиярәт қилди. Дөләт рәһбириниң иш бабидики сәпири “Казфосфат” ҖЧЙниң минерал оғутлар заводини зиярәт қилиштин башланди. Президентқа регион рәһбири Асқар Мырзахметов вә Тараз шәһириниң һакими Қайрат Досаев һәмра болди. Миңдин ошуқ мутәхәссис ишләватқан кархана мәһсулатиниң базири иштик — йеза егилигидә қоллиниливатқан оғут көп жиллардин буян АҚШ, Япония, Хитай, Россия, Бирләшкән Әрәп Әмирликлири вә Европа иттипақи әллиридә кәң тәләп қилинмақта. Бу йәрдә Қасым-Жомарт Тоқаевқа минерал оғутларни ишләпчиқиришниң вә экспорт көләмини көпәйтишниң технологиялик схемиси тоғрилиқ әхбарат берилди. Қазақстан Президенти иш бабидики сәпири давамида буниңдин бирнәччә жил илгири террорлуқ һәрикәтни әмәлгә ашурмақчи болған җинайәтчини тутуш вақтида паҗиәлик һалак болған таразлиқ полиция хадими Ғазиз Байтасовниң аилисидә меһманда болди. Мәлумки, униңға хизмәт борчини өтәш вақтида қәһриманлиқ, җанпидалиқ вә әрлик көрсәткәнлиги үчүн Хәлиқ Қәһримани унвани берилгән еди. Андин кейин Дөләт рәһбири “Қедимий Тараз” тарихий-мәдәний мәркизидә болди. Президент бу йәрдә регионда жүргүзүлгән археологиялик қезиш ишлири вақтида тепилған баһалиқ артефактлар билән тонушти. Шундақла Дөләт рәһбиригә җумһурийәтлик әһмийәткә егә тарихий ядикарлиқ тоғрилиқ сөзләп бәрди вә һазир қурулуш ишлири башланған “Шахристан — қедимий Тараз” тарихий-мәдәний комплексиниң макетини көрсәтти. Қедимий Таразниң тарихини үгиниш давамлишиду. Биз бу ишта һәрқачан ярдәм қилимиз. Бу йөнилиштә нурғунлиған хәлиқара дәриҗидики экспертлар бар. Бизниң университетлиримиз туристик бизнес бойичә мутәхәссисләрни тәйярлашни башлиши зөрүр, — дәп тәкитлиди Қасым-Жомарт Тоқаев. Дөләт рәһбири Таразда шундақла Җамбул вилайитиниң җамаәтчилиги — ветеранлар, иҗадий зиялилар, җәмийәтлик тәшкилатларниң вә яшларниң вәкиллири билән учрашти. Учришиш давамида мәмликәт Президенти вилайәтниң чоң ихтисадий ихтидариға егә екәнлигини тәкитләп, һәл қилиш лазим болған проблемиларға тохталди. Вилайәттә мәмликәт бойичә әң төвән оттура иш һәққи — 112 миң тәңгә, — деди Қасым-Жомарт Тоқаев. — 1-июньдин башлап бюджет саһасиниң төвән һәқ төлинидиған хадимлириниң иш һәққи ашурулди. Бу башланмидин вилайәт карханилириму чәттә қалмаслиғи керәк. Барлиқ дәриҗиләрдики һакимларға әслитип өткүм келидуки, силәрниң асасий вәзипәңлар — аһалиниң ишқа орунлишишини тәминләш. Иш орунлирини вуҗутқа кәлтүрүштә бизнес муһим роль ойнайду, шуңлашқа йәрлик тиҗарәтчиләрни қоллап-қувәтләшни давамлаштуруш керәк. Қасым-Жомарт Тоқаев регионниң санаәт ихтидаридин кәң пайдилинишқа вә индустриялик лайиһиләрни әмәлгә ашуруш даирисидә заманивий технологиялик ишләпчиқириш орунлирини вуҗутқа кәлтүрүшкә алаһидә диққәт бөлүшкә чақирди. Президент шундақла регионда йеза егилиги саһасида әмгәк үнүминиң төвән екәнлигиниң байқиливатқанлиғини тәкитлиди. — Йәрлик һакимийәт аграр секториниң мутәхәссислири билән зич өзара алақида ишлиши керәк. Вилайәттә йеза егилиги мәһсулатини йетиштүрүшни көпәйтиш үчүн имканийәт бар. Һөкүмәт келәр жилдин тартип чәт әлдин кәлтүрүлүватқан қәнт хамәшиясиға баж селиғини җарий қилиш қарарини қобул қилди. Әйнә шуниңға бағлиқ вилайәт һакимиға қәнт қизилчисиниң вә мевә-көктат мәһсулатиниң мәйданини кәңәйтишни, шундақла мәһсулатни қайта ишләш карханилириниң қувитини көпәйтишни тапшуримән, — дәп тәкитлиди Қасым-Жомарт Тоқаев. Президент шундақла вилайәтниң жуқури туристик ихтидарға егә екәнлигигә диққәт ағдурди вә саһани җошқун тәрәққий әткүзүшниң зөрүр екәнлигини атап көрсәтти. Дөләт рәһбири шундақла коррупция проблемилириғиму тохталди. Биз коррупцияни түп-йилтизидин йоқатқичә униңға қарши күришимиз. Миллий ихтисатниң тәрәққий етиши вә хәлиқниң паравәнлиги уттур шуниңға бағлиқ. Һакимларға алаһидә җавапкәрлик жүклиниду. Бу ишқа регион вәкиллири паал қатнишиши керәк. Коррупциягә қарши күришиш — мениң Президент лавазимидики асасий мәхсәтлиримниң бири, — дәп тәкитлиди Қасым-Жомарт Тоқаев. Қазақстан Президенти шундақла мәдәнийәт, саламәтликни сақлаш саһалириға, турушлуқ өй, йол қурулуши, йеза территориялири, алақә вә башқа мәсилиләргә диққәт ағдурди. Учришиш ахирида бәш җамбуллуққа Қазақстан Җумһурийити Президентиниң Тәшәккүрнамилири тапшурулди. Дөләт рәһбири Җамбул вилайитигә қилған сәпирини Тараз шәһиридики “Әулие ата” хәлиқара аэропортини зиярәт қилиш билән тамамлиди. Бу йәрдә Президентқа аэропорт ихтидариниң өсүши, йеңи регионларара вә хәлиқара рейсларниң ечилиши, умумән, мәзкүр объектниң мәмликитимизниң заманивий һава портлириниң бири сүпитидә тәрәққий етиши тоғрилиқ доклад қилди. *** Шу күни Президент Қасым-Жомарт Тоқаев Атырав вилайитигә иш бабидики сәпәр билән кәлди. Дөләт рәһбири регионға келиши билән “Болашақ” нефть вә газни қайта ишләш заводиниң ишләпчиқириш объектлириниң үстидин учуп өтти. Президентқа нефть-газ саһасиниң һазирқи әһвали вә тәрәққият истиқбали тоғрилиқ әхбарат бәрди, нефтьни қайта ишләш вә турақлаштуруш, суюқлитилған газ елиш вә тазилаш, таза гуңгут чиқириш, нефть мәһсулатлирини сақлаш вә тошуш бойичә технологиялик җәриянлар билән тонуштурди. Қасым-Жомарт Тоқаев ишләпчиқириш орниниң Атырав шәһиридин анчә жирақ әмәслигини (у Мақат наһийәсигә орунлашқан) тәкитләп, әтрап муһитни қоғдашқа алаһидә диққәт бөлүшкә чақирди. Дөләт рәһбири униңдин ташқири Қазақстан гражданлириниң әмгәк һоқуқлириға риайә қилишниң муһим екәнлигигә алаһидә тохталди. Қасым-Жомарт Тоқаев шу күни Атыравдики APEC PetroTechnic Алий колледжини зиярәт қилип, оқуш корпусини, лабораторияләрни, ишханиларни, китапхана вә ятақханини көздин кәчүрди. Президент колледж оқуғучилири вә педагоглар коллективи билән болған сөһбәттә чоң хәлиқара нефть-газ компаниялири үчүн мутәхәссисләрни чәт әлдә әмәс, бәлки Қазақстанда тәйярлашниң муһим екәнлигини тәкитлиди. Дөләт рәһбири Атыравда вилайәтлик мәслиһәтниң депутатлири, җәмийәтлик кеңәшниң әзалири, иҗадий вә педагог зиялиларниң, ветеранлар, кәспий иттипақ һәм яшлар тәшкилатлириниң вәкиллири, дөләт хизмәтчилири билән учрашти. Атырав вилайити — бай мәдәний вә инсаний ихтидарға егә регион. Регионниң муваппәқийәтлири йәрлик турғунлар турмушиниң сүпитини вә дарамитини ашурушқа ярдәм қилиши керәк. Һакимийәт, Һөкүмәт, бизнес — биз һәммимиз шуниңға диққәт бөлүшимиз шәрт, — деди Президент учришиш қатнашқучилириға мураҗиәт қилип. Президент өз сөзидә аһали паравәнлигиниң өсүшини тәминләшниң вә елимиз ишләпчиқиришини тәрәққий әткүзүш үчүн нефть-газ секториниң ихтидарини толуқ пайдилинишниң зөрүр екәнлигигә чоң диққәт ағдурди. Қасым-Жомарт Тоқаев Һөкүмәткә мәһсулат сетивелишта вә чоң лайиһиләр бойичә хизмәт көрситиштә йәрлик үлүшни көпәйтиш, чәтәллик һәм елимиз хадимлириға охшаш һәқ төлинишини тәминләш бойичә системилиқ ишни уюштурушни тапшурди. Биз гражданлиримизниң сүпәтлик билим вә хелә жуқури иш һәққи елиши үчүн шараит яритишимиз керәк. Мениң елимиз тиҗарәтчилиригә мураҗиәт қилғум келиду. Ядиңларда болсунки, дөләтниң вә һәрқандақ компанияниң әң чоң байлиғи — бу адәмләр. Әң муһими, йеңи иш орунлирини вуҗутқа кәлтүрүш, иш һәққини ашуруш керәк, — дәп тәкитлиди Дөләт рәһбири. Қасым-Жомарт Тоқаев шундақла турушлуқ өй мәсилисини вә экологиялик проблемиларни һәл қилишниң, транспорт инфрақурулумини яхшилашниң зөрүр екәнлигини атап көрсәтти. Президент униңдин ташқири мәмликәт бюждетини шәкилләндүрүштә трансфертларни адаләтлик тәхсим қилиш вә коррупциягә қарши күришиш мәсилилиригә тохталди. Учришиш ахирида вилайәтниң иҗтимаий-ихтисадий тәрәққиятиға чоң һәссә қошқан бир топ шәхсләргә Президент Тәшәккүрнамиси тапшурулди.