• Яшлар жили
• 12 Маусым, 2019

Ғалиплар мукапатланди

Рашидәм РӘҺМАНОВА, «Уйғур авази» Һәртәрәплимә билимлик вә мәдәнийәтлик әвлат тәрбийиләш – җәмийитимизниң алдиға қойған әң муһим мәхсәтлириниң бири. Мошу йосунда Әмгәкчиқазақ наһийәсидә нурғунлиған ишлар әмәлгә ашурулмақта. Наһийә һакими Бинали Ысқақниң билим саһасиға көрситиватқан ғәмхорлуғиниму атап өткән орунлуқ. Ахирқи 6-7 жилдин бери Бинәли Әбдиқаппасоғли маарип саһасини қоллап-қувәтләш үчүн йәрлик бюджеттин мәбләғ бөлүп, мәктәп оқуғучилириниң билим сүпитини көтиришкә һәртәрәплимә мүмкинчиликләрни яритип бериватиду. Җүмлидин йеңи мәктәпләрниң сани өсүп, үч сменилиқ мәктәпләр азайди. Бала бағчилири көпләп селиниватиду. Йеқинда наһийәниң Достлуқ йезисидики Алтынбике Бертаева намидики оттура мәктәптә уюштурулған «Қабилийәтлик балилар слети» бу сөзүмизниң ярқин испатидур. У күни җумһурийәтлик көрүкләрдә ғалип чиққан 110 бала зор алқишлар билән мәйданға тәклип қилинди. – Елбасы Нурсултан Назарбаев 2019-жилни «Яшлар жили» дәп елан қилишиниң зор әһмийити бар. Келәчәк – яшларниң қолида! Билимлик, қабилийәтлик яшлар «Мәңгүлүк әлниң» мәхситини әмәлгә ашуралайду. Елбасы яшларниң һәртәрәплимә билим елиши үчүн нурғун күч чиқарди. «Булақ көрсәң, көзини ач» демәкчи, яш әвлатни оқушқа, билим елишқа дәвәт қилиш – заман тәливи. Келәчәк әвлатниң риқабәткә қабил болуп йетилиши үчүн уларниң бойидики көплигән талант вә қабилийәтлирини тәрәққий әткүзүш керәк. Бу хисләтләрни байқап, униңға тоғра йол көрситиш, әлвәттә, устазниң борчи. Қабилийәтлик балиларға ғәмхорлуқ көрситиш интайин муһим. Мошу йосунда Алтынбике Бертаева намидики оттура мәктәпниң устазлири еринмәй әмгәк қиливатиду. Һәрхил байқашларда ғалип чиққан оқуғучилиримизниң утуқлири – устазлиримиз әмгигиниң нәтиҗиси, улар бизниң пәхримиз, – деди слетни ачқан мәктәп мудири Жанар Муқалиева. Андин қабилийәтлик балиларни Әмгәкчиқазақ наһийәлик маарип бөлүминиң вәкили Айжан Төртаева тәбрикләп, наһийәлик маарип бөлүминиң башлиғи Бәтес Аманованиң иллиқ салимини йәткүзди. Бийил наһийәдин 187 бала җумһурийәтлик көрүккә қатнишип, униң 50 пайизи наһийәлик басқучта мукапатлиқ орунлардин көрүнди. 28 бала вилайәткә йолланма алди. Униң 70 пайизи җумһурийәттә өзиниң тәлийини синиди. Хәлиқара, җумһурийәтлик, вилайәтлик вә наһийәлик олимпиадиларға бийил наһийәдин 800 оқуғучи қатнишип, униң тәңдин толиси І, ІІ вә ІІІ орунларни егилиди. Җумһурийәтлик байқашта мукапатлиқ орунларға еришкән балиларниң арисида А.Бертаева намидики мәктәпниң икки оқуғучиси бар. Слет давамида Қаратуруқ йеза округиниң һакими Ермек Самсыбеков, А.Саттаров намидики мәктәпниң мудири Чимәнгүл Амилова, ата-анилар комитетиниң рәиси Райхан Әлиқулова вә башқилар өзлириниң иллиқ ләвзини билдүрди. Андин Нурлан Тингалов, Сабина Мәсимҗан, Руслан Үсәнов вә Румиләм Турғанҗан кәби оқуғучилар қазақ, рус, инглиз вә уйғур тиллирида слет иштракчилириға салам йоллап, мәктәпниң тарихи вә утуқлири һәққидә сөзләп бәрди. Ахирида көплигән оқуғучилар билән устазлар һәрхил мукапатлар билән тәғдирләнди. Җүмлидин 10-синип оқуғучиси Гүлнисәм Яқупова Қазақстан Җумһурийити Билим вә пән министрлигиниң ІІІ дәриҗилиқ дипломиға, 9-синип оқуғучиси Альбина Қойшыбай Алмута вилайәтлик Билим башқармисиниң ІІІ дәриҗилик дипломиға, Үмүтҗан Аюпов Алмута вилайәтлик Билим башқармисиниң тәшәккүрнамисигә егә болди. Слетниң тәнтәнилик қисимидин кейин меһманлар «Электронлуқ китапхана», «Ұрпақ тәрбиесі» вә «Рухани жаңғыру» булуңлирини зиярәт қилип, «Заманивий устазлар бөлүминиң» тәнтәнилик ечилишиға қатнашти. Әмгәкчиқазақ наһийәси.