• Әхбаратлар еқими
• 19 Маусым, 2019

Яшлар форуми өтти

Өткән җүмә күни Алмутидики “Достлуқ өйидә” «Жаңа толқын 100+» җумһурийәтлик яшлар форуми өтти. Униңға ҚХА Рәисиниң орунбасари — Қазақстан Җумһурийити Президенти Мәмурийити ҚХА Кативатиниң рәһбири Ж.Түймебаев, Әхбарат вә җәмийәтлик тәрәққият министрлигиниң Яшлар вә аилә иши бойичә комитетиниң рәиси М.Қожахмет, «Қазақстанниң 100 йеңи исми» лайиһисиниң ғалиплири вә елимизниң барлиқ регионлиридин паалийәтчан яшлар иштрак қилди. Йолдаш МОЛОТОВ, «Уйғур авази» Форумниң модератори — ҚХА «Жаңғыру жолы» җумһурийәтлик яшлар бирләшмисиниң рәиси М.Спотакай мәзкүр чарә-тәдбирниң мәхсити вә меһманлирини тонуштурғандин кейин Жансейит Түймебаевқа сөз бәрди. Мана, биз 12-июнь күни елимизниң тарихидики йәнә бир муһим вақиәниң гувачиси болдуқ, — деди Жансейит Қансеитулы өз сөзидә. — Елимизниң пайтәхти Нур-Султанда Конституция вә барлиқ демократик нормиларға мувапиқ өткән сайламниң йәкүни бойичә сайланған президентниң лавазимиға рәсмий киришиш тәнтәниси өтти. Президент Қасым-Жомарт Тоқаев тәнтәнидә сөзлигән нутқида яшлар мәсилисигә алаһидә тохталди. У: «Яш әвлатқа алаһидә мураҗиәт қилғум келиду. Силәр Қазақстан тарихида һәл қилғучи роль ойнайсиләр, тәрәққиятниң һәрикәткә кәлтүргүчи күчи болисиләр. Елбасы 2019-жилни “Яшлар жили” дәп елан қилди. Шуниңға мувапиқ «Жастар — ел тірегі» мәхсус лайиһиси өз ишини башлиди. Мениң вәзипәм — силәрниң өзәңларниң чоң арминиңларни әмәлгә ашурушиңлар вә шәхсий «утуқ тарихиңларни» вуҗутқа кәлтүрүшиңлар үчүн барлиқ имканийәтни яритиш. Яш талантлиқ башқурғучиларни дөләт хизмитиниң барлиқ дәриҗисигә илгирилитиш үчүн «Президентниң кадрлар резерви» шәкиллиниду. Бизниң яшлар мәхсәтчан, әмгәкчан, иҗаткар, шуңлашқа Қазақстанниң келәчиги ишәшлик қолда» деди. Демәк, Президент яшларға ишиниду вә чоң җавапкәрликни жүкләватиду. Бүгүн силәрниң араңларда «Қазақстанниң 100 йеңи исми» лайиһисиниң ғалиплири олтириду. Улар пәқәт өзлириниң әмгиги түпәйли утуққа йәткәнләр. Мошу форумдиму яшлар өз лайиһилирини тонуштуриду. Бу лайиһиләрниңму рояпқа чиқидиғанлиғиға ишинимән. Шуниңдин кейин Ж.Түймебаев «Қазақстанниң 100 йеңи исми» лайиһисиниң ғалиплири Белла Газдиеваға, Айсулу Ерниязоваға, Эльчин Хамедовқа Пәхрий ярлиқларни тапшурди. Андин форсайт-мәйдан шәклидә өткән бәс-муназириләрдә Атырав вилайитидин кәлгән Т.Розметова, Шималий Қазақстан вилайитидин кәлгән Р.Орынбасарова, Қостанайдин кәлгән Р.Мурзағалиев, Нур-Султан шәһиридин кәлгән Н.Карагеур вә башқилар яшларни волонтерлиқ, җәмийәтлик ишларға җәлип қилиш бойичә өз лайиһилирини тәклип қилди.