- Шеирлар
- 03 Шілде, 2019
Қәләм билән тәң жүрәк жиғлайду
Қанмидим яшлиғим өтти шунчә тез,
Шатлиқ һәм қайғуниң шаһиди болуп.
Утуқтин қанчә рәт сөйүнгиним раст,
Әләмдин төкүлгән яшларни көрүп.
***
Адәмләр нәгиду алдирар дайим,
Өзичә җәннәтни тапқуси келәр.
Бәзиниң қолида һәммә тәл туруп,
Шүкри йоқ нәпсидин җәбрида жүрәр.
***
Пулуң бар сөз алдиң топлар алдидин,
Алимму алдиңда сүкүтчан дайим.
Рәсвалиқ қилсаңму көрмәс һеч киши,
Дайим чирайлиқ көрүнәр қәддиң.
***
Көп болди һәқиқәт көрүнмәс пәқәт
Аҗизға болмиди һеч йәрдин шәпқәт.
Һәйранмән тәмтирәр кордур һәқиқәт
Нәп бәрсәң сән үчүн сөзләйду әбәт.
***
Һәқиқәт бар деди кимду хурсинип,
Мән дедим: «Өлди у қәбридә чирип»,
Деди у: «Үмүт бар келиду қайтип»,
Мән дедим: «Көргичә кетимиз қерип».
***
Нәс бассун чинлиқни дәссәп жүргәнни,
Әҗирсиз нан тиләп, итни сөйгәнни.
Бир башақ болсиму миннәттин әла,
Хар қилсун уялмай алқан яйғанни.
***
Бай болуш алдида турар мәшәқәт,
Җасарәт болсила баш егәр күлпәт.
Алладин кәлгәнгә һечбир амал йоқ,
Билгинки, тән сақлиқ — алтундин қиммәт.
***
Яхшилар аз әмәс, бирақ күчи йоқ.
Яманға кар қилмас нәпрәт билән доқ.
Нә билсун тоқ қосақ йоқниң дәрдини,
Қумлуқниң әһвалин карван биләр хоп.
***
Һошуңни йоқатма шөһрәтлириңгә,
Һосулсиз кеп кетәр жилларму тола.
Әй, инсан, ойланғин он бәши айдиң,
Һә, бүгүн жиғлаттиң, әтә мән тойда.
***
Хошамәт күлисән ярашмисиму,
Жиртқучниң бурнини силап тохтимай.
Сән үчүн жиғлиған қамча йәр дайим,
Җүҗини қирисән тухумда қоймай.
***
Әй, әқил, мән әмәс демә башқини
Сәл кәлсә, өйүңгә болар ташқини.
Қирларни көтәргин хошнаң билән тәң,
Баладур барчигә мундин қачқини.
***
Баланиң кәлмиши пәйлиңгә бақар,
Яхшиниң сөзлири һәммигә яқар.
Бар әйип адәм һеч көрмәс өзини,
Әқиллик чирақни кечидә яқар.
***
Мәҗнунтал чачлири йәргә тегипту
Төгиниң алдиға тошқан берипту.
Тошқанни төгә дәп көрсәткини ким?
Қорққандин төгиму бәдәр қечипту.
***
Қар боран-шувурған урсиму мәйли,
Қариғай — дәрәқтур егилмәйдиған.
Мәҗнунтал — назуклуқ рәмзи әсли,
Мөкүнсәң ичигә көрүнмәйдиған.
***
Сундурмаң чинини һәргиз кона дәп,
Кериги болиду сунғанда йеңи.
Нә керәк тиккәнгә қилип шикайәт,
Йәйдиған йериңиз — униң мевиси,
***
Дунияни чашқанлар қаплиди дәйду,
Ач болса мөшүкниң, йоқар төшүги.
Қарғуниң узун йол меңиши чағлиқ,
Астида болмиса садиқ ешиги.
***
Әқилсиз деңизға чүшти палақсиз,
Охшаштур урушта — қалди ярақсиз.
Чамиси йетәрму қирғақни көрмәй,
Бенадин сәкригән өләр қанатсиз.
***
Ләгләкчи шамалниң чиқишиға бақ,
Қумлуқта өскини тоғрақтур-янтақ.
Охшиған тамақни анаңдин сора,
Көп аңла, алдирап чиқарма чатақ.
***
Қуръан бар, адәм аз қуръанға лайиқ,
Мусулман болғиним болди налайиқ.
«Палани җәннәткә кириду» десә,
Билгинки, шу җәннәт бизгила лайиқ.
***
Бәзидә көрисән тәхтираванда
Кочида нан тиләп жүргән саилни.
Зинданда пушайман қилур бәзән шаһ,
Дунияда пүтмәстин техи армини.
***
Чаңқиған сәп салмас чачсаңму алтун,
Йүз яшқа һәмминиң бардур йәткүси.
«Ач жиртқуч адәмни йемәйду» десә,
Очуқла болмамду сөзниң ялғини.
***
Көчәт тик вә лекин шуни унтума,
Су билән көкләйду барчә зираәт.
Оғлуңни яхшиға қилмисаң илпәт,
Аз өтмәй шуниңдин чекисән һәсрәт.
***
Һақарәт нә һаҗәт маңмиса ешәк,
Гәп униң әслидә қашаңлиғида.
Һорунға қалған иш, һечқачан пүтмәс,
Чачсаңлар охшамду етизда буғдай?
***
Көрүнгән дүшмән һеч қорқунуч салмас,
Ямини йениңда көрүнмигини.
Иланни көргәндә шүркинәр адәм,
Бешиңға баладур адәмниң тили.
***
Муң билән нахшини ейтип келимән,
Чүшәнмәй адәмләр маңа қаришар.
Қериндаш мениңдин дүшмәнгә йеқин,
Бәргидәк болмиғач мениңдә тоғач.
***
Болди қил, һәқиқәт, әзмә жүрәкни,
Отундәк яқмиғин арзу тиләкни.
Алланиң қудрити барчигә айдиң,
Сундурар сунмиған тағдәк терәкни.
Дилшат ПАЗИЛ.
Алмута шәһири.
205 рет
көрсетілді0
пікір