• Әхбаратлар еқими
  • 10 Шілде, 2019

Чонҗиға газ кирди

Елбасы-Тунҗа Президент Нурсултан Әбишоғли Назарбаев өзиниң «Бәш иҗтимаий тәшәббусида» турғунларни газ билән тәминләш мәсилисигә алаһидә көңүл бөлүп, бүгүнки күндә қазақстанлиқларниң 50 пайизи газ билән тәминлинип, җумһурийәт бойичә 9 вилайәткә газ трубилири тартилғанлиғини тәкитлигән еди. Әнди Президент Қасым-Жомарт Тоқаев Президентлиқ лавазимиға киришиш тәнтәнисидики сөзидә алға сүргән он йөнилишниң биридә регионларни тәрәққий әткүзүшниң йеңи программиси тоғрилиқ ейтқан еди. Шу программа асасида мана әнди газ Уйғур наһийәсигиму кәлди. Өткән һәптидә мошу йеңилиққа беғишлинип, наһийә мәркизи Чонҗа йезисида өткән тәнтәнигә Алмута вилайитиниң һакими Амандық Батталов қатнашти. Сабирәм ӘНВӘРОВА, “Уйғур авази” Буниңдин бир нәччә жил илгири наһийәни газ билән тәминләш үчүн 10,0 миллиард тәңгә миқдарида инвестиция җәлип қилинип, биринчи новәттә, наһийә мәркизи һесаплинидиған Чонҗа йезисиға газ киргүзүш мәсилиси қолға елинди. Бүгүнки күнгә қәдәр «Азия Газ Шонжы» җавапкәрчилиги чәкләнгән йолдашлиғи наһийәни толуқ газ билән тәминләш үчүн умумий узунлуғи 154 миң метр трубиларни орнатти. Пәқәт Чонҗа йезисини газ билән тәминләш үчүн 214,4 чақирим һәр хил қисимлиқ газ трубилирини, 23 данә газ таритиш шкафи билән 2 данә газ таритиш пунктини орнитиш реҗиләнгән болса, бүгүнки күндә уларниң пайиз қурулуш-монтаж ишлири аяқлишип, 3500 турғун өй билән иҗтимаий объектларға газ киргүзүш қолға елинди. Тәнтәнилик мәрасимда вилайәт һакими Амандық Батталов өз сөзини елимиздики ахирқи йеңилиқлардин башлап, наһийәдики йеза егилиги, туризм саһалириниң тәрәққиятиға вә наһийәниң ахирқи 3-4 жилдики көрсәтмилиригә қисқичә тохталди. Җүмлидин, Президент тапшурмисиға бенаән, йезиларни газ билән тәминләш мәхситидә җиддий иш елип бериливатқанлиғини тилға елип, шуниң бир нәтиҗиси сүпитидә Уйғур наһийәсигә газ киргәнлигини вә бүгүнки күндә Алмута вилайити бойичә газ билән тәминләнгән аһалилиқ пунктларниң көрсәткүчи 30 пайизға йәткәнлигини қәйт қилди. Кейин сөз алған «Азия Газ Шонжы» ҖЧЙ баш мудири Роман Наханов газ киргүзүш ишлириниң жүргүзүлүшигә тохтилип, дәсләпки күнниң өзидә 42 өйгә газ қошулғанлиғини, алдики вақитта чонҗилиқларниң түгәл газ билән тәминлинидиғанлиғини ейтти. Андин минбәргә көтирилгән Алмута вилайәтлик мәслиһәтниң депутати Ызғарбек Бектурсынов наһийә хәлқи намидин вилайәт һакимиға миннәтдарлиғини изһар қилди. Шуниңдин кейин вилайәт һакими Амандық Баталов билән «Азия Газ Шонжы» ҖЧЙ баш мудири Роман Наханов тәнтәнилик түрдә Чонҗиға газ киргүзүлгәнлигиниң бәлгүси сүпитидә «һаварәң отни» яқти. Андин вилайәт һакиминиң рәһбәрлигидики бир топ шәхсләр Улуқ Вәтән урушиниң ветерани Абдуҗелил Шариповниң босуғисидин атлап, вилайәт һакими өз қоли билән ветеранниң өйигә газ қошуп, мөтивәрниң дугасини алди.

459 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы