• Йеңилиқлар
  • 18 Шілде, 2019

Юбилейлиқ конкурс йәкүни чиқирилди

Nur Otan партияси Қазақстан журналистлири арисида һәр жили өткүзүлидиған “Nur Sungar” конкурсиниң йәкүнини чиқарди. Онинчи, юбилейлиқ конкурсқа беғишланған мәрасим елимиз пайтәхти Нур-Султандики Мустәқиллик Сарийида болуп өтти. Бу қетимқи конкурс илгәркидикилиридин уни жүргүзүш тәртиви, қаидилири, йеңи номинацияләр вә мукапатлири билән пәриқлиниду. Бийил униңға қатнишиш үчүн уюштуруш комитетиға 207 журналисттин миңдин ошуқ әмгәк қобул қилинди. Nur Otan партияси Рәисиниң биринчи орунбасари Бауыржан Байбек журналистларниң Қазақстан җәмийитини тәрәққий әткүзүшкә вә җипсилаштурушқа чоң һәссә қошуватқанлиғини тәкитлиди. – Бу наһайити қийин әмгәк, у өзигә җиддий диққәтни, чоң ишни, чоңқур билимни, кәспий риваҗлинишни тәләп қилиду, – деди Nur Otan партияси Рәисиниң биринчи орунбасари. У Қазақстанниң Тунҗа Президенти – Елбасы, Nur Otan партиясиниң Рәиси Нурсултан Назарбаевниң дана рәһбәрлигидә чоң нәтиҗиләрни қолға кәлтүргәнлигини тәкитлиди. Шуңлашқа хәлиқниң қандақ ишларниң әмәлгә ашурулғанлиғини, һазир немә қилиниватқанлиғини вә келәчәктә қандақ ишларниң әмәлгә ашурулидиғанлиғини билиши муһим. Аһали билән уттур алақини йолға қоюш зөрүр. Ишәнчә – партияниң асасий күчи. – Программилиқ һөҗҗәтләрниң, биринчи новәттә сайланған Президентниң, Nur Otan партияси намзитиниң сайлам алдидики платформисиниң әмәлгә ашурулуши үстидин сүпәтлик назарәтни тәминләш керәк. Шундақла әкси алақини күчәйтиш вә аһали тәләплирини һесапқа елиш зөрүр. Партия гражданларни тиңшиши вә һәр бир иҗтимаий топниң тәләплирини билиши керәк. Мана мошу җәһәттин журналистикиниң ролини баһалаш қийин, – дәп тәкитлиди Бауыржан Байбек. Әхбарат вә җәмийәтлик тәрәққият министри Дәурен Абаев өз сөзидә мәмликитимиздә һазир сөз әркинлигиниң толуқ тәминләнгәнлигини тәкитлиди. – Журналистлар иҗадий җәһәттин риваҗлиниш вә өзини көрситиш үчүн барлиқ имканийәтләрдин пайдилиниду. Амма мошу иҗадийәт вә өзини көрситиш әркинлигидә өз иш-һәрикәтлири һәм пикир-мулаһизилири билән адәмләргә зиян йәткүзмәслик үчүн сағлам әқилни ишқа қошуш керәк. Биз елимизни, мустәқиллигимизни сақлишимиз лазим, – деди министр. Қазақстан Җумһурийити Президентиниң мәтбуат кативи Берик Уәли конкурс ғалиби аталған журналистларни сәмимий тәбрикләп, аммивий әхбарат васитилириниң вәкиллирини мәмликәт мәнпийити, һәрбир гражданниң бәхит-саадити үчүн ишләшкә чақирди. Униң сөзичә, Президент Қасым-Жомарт Тоқаев һәрқачан журналистлар үчүн муамилигә тәйяр вә Қазақстанда сөз әркинлигини қәтъий тәминләватиду. Әнди конкурс лауреатлириға кәлсәк, уларни Парламент Мәҗлисиниң депутати Қуаныш Султанов рәислигидики комиссия он номинация бойичә таллавалди. Шундақ қилип, “ Nur Sungar” конкурси ғалиплириниң арисида Ғәбит Мүсиреп (“Egemen Qazaqstan” гезити), Игорь Прохоров (“Казахстанская правда” гезити), Нуртилеу Иманғалиулы (“Жетысу” телеканали), Талғат Есенов (“Литер” гезити), Базаркүл Отыншиева (“Астана” телеканали), Айгүл Кемелбаева (“Абай” журнали) кәби тонулған журналистлар бар. Умумән “ Nur Sungar” конкурси өткүзүлүватқан он жилда йүздин ошуқ журналист лауреат аталди.

390 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы