• «Уйғур авазиниң» сәйилгаһи
• 25 Шілде, 2019

Электросамокатларда қәйәрдә қатнашқа болиду?

Қазақстан ички ишлар министрлиги Мәмурий полиция комитети рәисиниң орунбасари Әлибек Кенесбаев Астанада өткән брифингта электросамокатларниң мопедларға тәңләштүрүлидиғанлиғини хәвәр қилди. Шундақ екән, қанунға мувапиқ уларниң егилири адәмләр пиядә жүридиған зониларда қатнашқа һоқуқсиз. “Биз аддий тилда уларниң барлиғини “самокатлар” дәп атаймиз, әмәлиятта әгәр биз самокатларни ишләп чиқарғучиларниң техникилиқ характеристикисиға қарайдиған болсақ, уларниң барлиғи электр скутерлири сүпитидә чиқирилған. Бизниң йол қатнаш қанунида скутерларниң мопедларға тәңләштүрүлгәнлиги ениқ көрситилгән. Йол қатнаш қаидисигә мувапиқ, биздә мопедларниң қатнишиға тәләпләр қоюлған. Шундақ екән, көрситилгән қаидиләр электросамокатларни башқурғучиларғиму тарқилиду. Йол қатнаш қаидисигә мувапиқ, мопедларни, шу җүмлидин самокатларни башқурғучи шәхсләргә велосипед қатнайдиған йолда қатнаш рухсәт қилиниду. Әгәр велосипед йоли болмиса маршрутлуқ транспорт васитилири йолиниң четидә қатнашқа болиду. Қараңғу чүшкән вақитта мопед егилиригә нисбәтән қоюлидиған тәләпләр бар. Мәзкүр тәләпләр самокат егилиригиму тарқайду: һәр икки йол қатниғучиниң техникисиниң алди вә кәйни чирақлири яндурулуши керәк” – деди Әлибек Кенесбаев. Шундиму у әйнә шундақ самокатларни пайдилиниш җәриянида тәңшәш вә назарәт қилиш қисмида пәйда болуватқан мәсилиләргә умумән келишиду. “Һәқиқәткә кәлсәк, қанунға мувапиқ самокатларни вә мопедларни башқуруш үчүн мәхсус һөҗҗәт елиш тәләп қилинмайду. Биздә А1 категорияси мотоциклларни башқуруш үчүн берилиду. Самокатларниң конструкцияси вә техникилиқ әһвали үстидин назарәт қилинмайдиғанлиғи тәбиий. Мәзкүр қисимда биз чариләрни ишләп чиқимиз вә җәриянни тәңшәп турушқа һәрикәт қилимиз. Биз гәп болуватқан мәсилини хәлиқара тәҗрибини һесапқа алған һалда оқуп үгинимиз. Мәзкүр муәмма пәқәт Қазақстандила әмәс, башқа әлләрдиму моҗут. Мәсилән, Франциядә самокатларни пайдилинишни тәңшәш мәсилиси пәйда болған. Бу йәрдә самокатларни тиркәш вә уни башқурушқа гуванамә бериш чарилири қараштурулмақта. Биз болсақ мәзкүр мәсилини җамаәтчиликниң вә дөләт органлириниң пикрини һесапқа алған һалда, шундақла бажхана иттипақи техникилиқ регламентигә мувапиқ һәл қилидиған болимиз”, – дәп чүшәндүрди спикер. Әгәр йол қатнашниң башқа қатнашқучилири йол қатнаш қаидисигә хилаплиқ қилса – бу нәқ мопедларни вә самокатларни жүргүзгүчиләр – “икки айлиқ һесап көрсәткүчи миқдарида җәриман төләйдиған болиду”, дәп йәкүнлиди сөзини Ә.Кенесбаев.