• «Уйғур авазиниң» сәйилгаһи
• 25 Шілде, 2019

«Rakhat boxіng Club» чемпионларни тәрбийиләйду

Йеқинда бокстин хәлиқара дәриҗидики АИБА судьяси Тилек Манап Рахат йезиси җәмийәтлик ишлириниң активисти Арман Әбилдаев билән бирликтә «Nur Otan» партиясиниң кубоги үчүн яш өсмүр оғул вә қизлар арисида турнир уюштурди. Турнир Рахат оттура мәктивиниң мудири Анар Қожақованиң қоллап-қувәтлиши билән мәктәпниң спорт залида өтүп, у  «Яшлар жилиға» беғишланди. Рашидәм РӘҺМАНОВА, «Уйғур авази» Тилек – өзи әсли рахатлиқ. Мәктәптә оқуп жүргинидин, йәни 2002-жилдин тартип бокс билән шуғуллинип, наһийәлик, вилайәтлик вә җумһурийәтлик турнирларға қатнашти. Мукапатлиқ орунлардин көрүнүп, Әмгәкчиқазақ наһийәсидики әң илғар яш боксчиси аталди. 2006-жили Спорт вә туризм академиясигә оқушқа чүшти. Алий оқуш дәргаһида оқуп жүрүп, хәлиқара мусабиқиләрдә тәлийини синиди. Алмута шәһәрлик студентлар арисидики чемпионатта, Қазақстан чемпионатида йеңип чиқти. Бокстин башқа тай-бокс билән шуғуллинип, Қазақстан яшлар кубогиниң ғалиби аталди. Спорт маһири унваниға егә болди. Академияни тамамлап, Елбасыниң «Болашақ» программиси бойичә Россия хәлиқара олимпиада университетиниң магистратурисида «Спорт-менеджмент» мутәхәссислиги бойичә тәһсил көрди. Кейин үч жил арилиғида Қазақстан Җумһурийити миллий таланма командисида қизларни мәшиқләндүриду. Һазир Қазақстан бокс федерациясидә ишләйду. 2012-жили Тилек Рахат йезисида мәктәп оқуғучилири үчүн бокс секциясини ачиду. Жиллар өткәнсири у чоң клубқа айлинип, «Rakhat boxіng Club» дәп аталди. Қазақстан яшлирини сағлам һаят тәрзигә аммивий җәлип қилип келиватқан «Qaz Sport Development» клубиниң қатариға кирди. Тилекниң шагиртлири устазиниң үмүтини ақлап, егиз чоққилардин көрүнүп кәлмәктә. Мисалға, Надира Маратова төрт дүркүн Қазақстан чемпиони болди. Меруерт Қонысбай Қазақстанда чемпионатиниң қизлар арисидики күмүч медальниң ғалиби аталди, 2019-жили Универсиада чемпиони болди. Йеқинда Тилек Арман Әбилдаев билән һәмкарлиқта йезида җәмийәтлик фонд қурди. У йеза балилирини көпирәк сағлам һаят тәрзигә җәлип қилидиған болиду. Шуниң билән ушбу турнирға елимизниң регионлиридин, Қирғизстан вә Өзбәкстандин барлиғи болуп 12 команда, йәни 26 салмақ категориясидики 150 яш боксчи оғул һәм қиз қатнашти. Яшлар жилиға беғишланған турнирниң рәсмий ечилишиға Әмгәкчиқазақ наһийәлик мәслиһәтниң кативи Бекет Ахметов, «Alash Prіde» кәспий клубиниң президенти Данияр Қасқаров, Лондонда өткән Олимпиада оюнлириниң ғалиби, хәлиқара спорт маһири Саида Хасанова, кәспий боксчи Айдос Ербосын-улы, икки дүркүн Азия чемпиони, Дуния Чемпионатиниң күмүч медаль саһиби Қанат Орақбаев, бокс бойичә ҚҖ адил қазилар корпусиниң рәиси Ермек Сүйениш, Рахат йезиси ақсақаллар кеңишиниң рәиси Өскенбай Бөкенов вә башқилар қатнашти. Турнирда адил қазиларни алий категориялик судья Бекнур Акимқожа башқурса, Уганда дөлитиниң жуқури дәриҗилик судьяси Поль Тузинда арбитрлиқ қилди. Турнирни ҚҖ Бокс федерациясиниң тонулған спорт комментатори Аманбай Әжибаев елип барди. Турнир йәкүни бойичә, Тилек Манапниң шагирти, ҚҖ бокс бойичә миллий командисиниң әзаси, Бекбосын Еркинулы “Әң яхши боксчи” намиға егә болди. Қизлар арисида Мақпал Ерболат, Мина Жумабай әң яхши оюн үлгисини көрсәтти. Шундақла, ишиктилик Андрей Кокорин (мәшиқләндүргүчиси – Юсуп Алиев) вә палтивайлиқ Илияр Һаширов (мәшиқләндүргүчиси – Пәрһат Розибақиев) турнир чемпиони аталди. Ушбу турнирда бизниң диққитимизни ака-ини Рустәм вә Мәңсүр Нурамбәковлар җәлип қилди. – Бу жигитләр – келәчигидин чоң үмүт күткүзиватқан шагиртлирим, – деди Тилек бизниң Нурамбәковларға бағлиқ қоюлған соалимизға җававән. –Рустәм – спорт маһирлиғиға намзат. У һазир Талдиқорған шәһиридики балилар вә яш өсмүрләрниң спорт мәктивидә оқуйду. Арман Әбилдаев турнирға «Kazakh boxіng» спорт мәктивиниң, «АКФ» мәһкимисиниң, йезиниң сахавәтлик инсанлири Ришат Һакимахунов, Кеңес Оразалиев, Саят Жылқыбай қатарлиқ жигитләрниң һамийлиқ қилғанлиғини атап, сәмимий миннәтдарлиғини билдүрди. Биз Рустәм билән униң иниси Мәңсүрни сөһбәткә җәлип қилмақчи болуведуқ, улар кам сөзлүк болуп чиқти. Сөһбитимизгә уларниң атиси Шамәшрәп билән аписи Мадина Велибаевлар қошулди. Уларниң аилисидә бәш бала тәрбийилиниветипту. Велибаевларниң чоң қизи Надира оттура мәктәптин кейин һәмширә мутәхәссислиги бойичә билим елип, ишләветипту. Кейинки оғли Алишер мәктәпни тамамлаш алдида туриду. Кичигидин саламәтлиги анчә яхши болмиғанлиқтин, ата-аниси уни күрәш секциясигә бәргән екән. Бала чоң қизиқиш илкидә спорт билән шуғуллинишқа башлайду. Үч айниң ичидә у мусабиқиләрдә мукапатлиқ орунлардин көрүниду. Рахатта турнир болған күниму Алишер мусабиқигә кәткән екән. Кейинки оғли Рустәм 9 яшқа кәлгәндә момиси Селимәм уни өзи қолидин йетиләп апирип, мәктәптики бокс секциясигә яздурупту. Рустәм акисидин һеч қелишмай, спортқа барлиқ ихласи билән киришип кетипту. Селимәм ана балиниң ата-анисини аварә қилмай, нәврисиниң барлиқ чиқимини өз һөддисигә апту. Униң кийим-кечигини елип берип, наһийәлик, вилайәтлик вә җумһурийәтлик турнирларға қатнишишини өзи тәминләпту. Әйнә әшундақ қоллап-қувәтләш, һәртәрәплимә әмгәк нәтиҗисидә өткән жили ноябрьда Рустәм спорт маһирилиғиға намзат атилиду. Балиниң қабилийитини байқиған талантлиқ балилар вә яш өсмүрләрниң спорт мәктивиниң рәһбәрлиги уни оқушқа тәклип қилиду. Ата-анисиниң ейтишичә, январьда Тилек Манап шагиртини өзи Лепсигә апирип, оқушқа киргүзүпту. Рустәм бийил 10-синипқа көчти. Келәчәктә устази Тилеккә охшаш егиз чоққиларни беқиндурушни арман қилиду. Әпсус, Рустәмниң бу утуқлирини момиси көрәлмәй кәтти. Аилиниң кәнҗә оғли Мәңсүр 9 яшта. Акилириға қарап, мәктәптики секциядә бокс билән мәшиқләнмәктә. Уму тиришчан. Ушбу турнирда ака-ини Нурамбәковларниң һәр иккилиси финалға чиқти. Велибаевларниң кәнҗиси Альмира төрт яшта. Акилири рингқа чиққанда, у улардин көзини үзмәй, оюнни тамашә қилди. Келәчәктә уму боксчи боламдекән, дегән ой кәлди бизгә. Ака-ини боксчиларни аилисиниң түгәл келип, қоллап-қувәтлиши бизни хошал қилди, әлвәттә. Бирнәччә күнгә созулған турнир аяқлашқанда яш чемпионларни мукапатлаш рәсими болди. Униңға «Nur Otan» партиясиниң Әмгәкчиқазақ наһийәлик шөбиси рәисиниң биринчи орунбасари Қуат Байғоджаев қатнашти. У йеза спортиниң риважлиниши үчүн тәр төкиватқан барлиқ жанкөйәрләргә миннәтдарлиғини билдүрүп, рахатлиқларни башқиларға үлгә қилип көрсәтти. Әмгәкчиқазақ наһийәси.