• Әхбаратлар еқими
• 25 Шілде, 2019

Ишләш үчүн бирлишиш керәк

ҚХА Тиҗарәтчиләр ассоциацияси “аддий нәрсиләрни ихтисат қилишни” тәрәққий әткүзүшкә вә йеңи иш орунлирини вуҗутқа кәлтүрүшкә өз һәссисини қошуши керәк. Қазақстан хәлқи Асамблеяси кеңишиниң пайтәхттә болуп өткән кәңәйтилгән мәҗлисидә Тунҗа Президент – Елбасы Нурсултан Назарбаевниң ҚХА Тиҗарәтчиләр ассоциациясиниң паалийитини җанландуруш бойичә тапшурмилириниң орунлинишиниң кетип бериши вә мошу қурулумниң Дөләт рәһбири Қасым-Жомарт Тоқаевниң “аддий нәрсиләрни ихтисат қилишни” тәрәққий әткүзүш бойичә қойған вәзипилирини орунлаштики роли муһакимә қилинди. ҚХА Рәисиниң орунбасари – Президент Мәмурийити ҚХА Кативатиниң мудири Жансейит Түймебаевниң мәҗлистә тәкитләп өтүшичә, Ассамблеяниң Тиҗарәтчиләр ассоциацияси гражданларниң иҗтимаий- ихтисадий паравәнлигини ашуруш вәзипилирини һәл қилиш үстидә турақлиқ ишләватиду. – Бүгүн биз, миллитидин қәтъий нәзәр, тиҗарәтчиләрни җипсилаштуруватимиз. Милләтләр келип чиққан мәмликәтләрдин инвестицияләрни, йеңи технологияләрни вә идеяләрни җәлип қиливатимиз. Бизниң мәхситимиз – “аддий нәрсиләрни ихтисат қилиш” вә кичик һәм оттура тиҗарәтни тәрәққий әткүзүш. Бу реал иш орунлирини вуҗутқа кәлтүриду. Иҗтимаий проблемиларни һәл қилиду. Бүгүнки таңда ассоциация бизнесни тәрәққий әткүзүш институти сүпитидә өсүп йетилди, – дәп тәкитлиди Жансейит Түймебаев. Униң сөзичә, һазир ассоциация 200дин ошуқ кархана вә бизнес-бирләшмини җипсилаштуриду, барлиқ регионларда вакаләтханилириға һәм пайтәхттә бирпүтүн идаригә егә. Яшларниң бизнес-тәшәббуслирини қоллап-қувәтләш, инновацияләрни тәрәққий әткүзүш бойичә ишлар жүргүзүлүватиду. ҚХА Рәисиниң орунбасари буниңдин үч ай илгири болуп өткән ҚХАниң XXVII сессиясидә Елбасыниң мошу қурулумни тәрәққий әткүзүш бойичә мәркизий дөләт органлириға бирқатар ениқ тапшурмиларни бәргәнлигини әслитип өтти. Җүмлидин, ҚХА Тиҗарәтчиләр ассоциацияси арқилиқ чәтәл инвесторлири билән ихтисадий һәмкарлиқни кәңәйтишниң, ҚХАниң чәтәллик достлири клубини қурушниң вә Ассамблея вәкиллири болған тиҗарәтчиләрни чәтәлләр билән иккитәрәплимә кеңәшләргә җәлип қилишниң зөрүр екәнлиги тоғрилиқ сөз болған еди. Амма, Жансейит Түймебаевниң сөзичә, бу иш һазирчә планлар вә нийәтләр сүпитидә қеливатиду. Ташқи ишлар министрлиги Инвестицияләр комитети рәисиниң орунбасари вәзиписини орунлиғучи Тимур Жайиқовниң әхбарат беришичә, идарә ҚХА Тиҗарәтчиләр ассоциациясиниң вәкиллирини алдимиздики инвестициялик чарә-тәдбирләргә қошуш үстидә ишләватиду. Бу, униң пикричә, қурулумниң чәтәллик инвесторлар билән ихтисадий һәмкарлиқни кәңәйтишигә асас салиду. У шундақла Қазақстан Ташқи сода палатисиниң ҚХА тиҗарәтчилирини делегацияләр тәркивигә қошуш үчүн алдики чарә-тәдбирләрдин хәвәрдар қилиш, шундақла ассоциация әзалириниң иккитәрәплимилик ишчанлиқ кеңәшлиригә қатнишишини тәминләш вәзиписини өз үстигә алалайдиғанлиғини тәкитлиди. – Елбасыниң тапшурмилирини орунлаш үчүн компанияләрниң саһалиқ йөнилишини вә мәһсулатиниң экспортқа нишан қилинишини көрситип, ҚХА тиҗарәтчилириниң тизимини министрликкә әвәтишни илтимас қилимиз. Шундақла биз инвесторларға тәклип қилидиған ениқ инвестициялик лайиһиләр вә тәшәббусларни тәйярлаш, керәк, – дәп тәкитлиди Тимур Жайиқов. Жансейит Түймебаев бу ишниң әһмийәткә егә екәнлигини тәкитләп, униңға җәлип қилинған идариләр вә қурулумларниң бир-бири билән қоюқ өзара һәрикәт қилиши керәклигини атап көрсәтти. ҚХА Рәисиниң орунбасари шундақла ҚХА Тиҗарәтчиләр ассоциациясиниң әзалирини “Атамекен” Миллий тиҗарәтчиләр палатисиниң бизнесни тәрәққий әткүзүшкә ярдәм қилиш программисиға вә ениқ лайиһиләрни ишләшкә җәлип қилишниң зөрүр екәнлигини ейтти. Ассамблея Рәисиниң орунбасари ҚХА Тиҗарәтчиләр ассоциацияси әзалирини Дөләт рәһбириниң “аддий нәрсиләрни ихтисат қилишни” тәрәққий әткүзүш бойичә тапшурмилирини әмәлгә ашурушқа актив җәлип қилиш керәклигини тәкитлиди. ҚХА Тиҗарәтчиләр ассоциациясиниң рәһбири Думан Қыдырбаевниң хәвәр қилишичә, һазир мошу паалийәткә қандақ қилип нәтиҗидарлиқ қатнишиш үлгиси, яндишишлири үстидә иш кетип бариду. Кеңәшмә йәкүни бойичә Жансейит Түймебаев бир айлиқ қәрәлдә Тунҗа Президентниң Қазақстан хәлқи Ассамблеясиниң XXVII сессиясидә бәргән тапшурмилирини әмәлгә ашуруш бойичә “йол хәритисини” ишләп чиқишни тапшурди. Униң сөзичә, ташқи ишлар, миллий ихтисат министрликлири Елбасыниң тапшурмилирини орунлаш вә ҚХА Тиҗарәтчиләр ассоциацияси билән ишләш үчүн беваситә җавапкәр болған министр орунбасаридин төвән әмәс лавазимлиқ шәхсни бәлгүлиши керәк. Униңдин ташқири ҚХА Рәисиниң орунбасари бу ишниң һәм мәркәздә, һәм җайларда актив жүргүзүлүши керәклигини тәкитләп, октябрьниң биринчи декадисида барлиқ регионларниң қатнишиши билән ҚХА Тиҗарәтчиләр ассоциациясиниң җумһурийәтлик кеңәшмисини тәйярлашни тапшурди. Учришиш ахирида Жансейит Түймебаев ҚХА Тиҗарәтчиләр ассоциациясиниң ишиға һәссә қошқан тиҗарәтчиләргә тәшәккүрнамиларни вә “Мейірім” хатирә бәлгүсини тапшурди. Уларниң арисида ҖУЭМ Алмута шәһәрлик шөбиси рәисиниң орунбасари, ҚХА әзаси “МеталлПромГрупп” ҖЧЙниң баш мудири Долқунтай Абдухелилму бар.

Мукапат мубарәк

«МеталПромГруп» ширкитиниң баш мудири ҖУЭМ Алмута шәһәрлик шөбисиниң рәиси, Қазақстан хәлқи Ассамблеясиниң әзаси. Долқунтай Абдухелилни биз сахавәтлик инсан сүпитидә яхши тонуймиз. Долқунтай кейинки бәш жил ичидә хәйрихаһлиқ ишларға йүз миллион тәңгидин ошуқ мәбләғ хәшлиди. Өткән роза ейида 1000 тәминати начар аилигә озуқ-түлүк вә башқиму нәрсиләр билән ярдәм қолини сунди. Техи йеқиндила Арыс шәһиридә паҗиә йүз бәргәндиму, униңдин зәрдап чәккүчиләргә ярдәм қилиш ишлирида алаһидә паалийәтчанлиқ көрсәтти. Бурнакүн Долқунтай Абдухелил елимиздики җәмийәтлик разимәнлик вә умуммилий бирлик ишиға қошқан үлүши үчүн Қазақстан хәлқи Ассамблеясиниң «Мейірім» төш бәлгүси билән мукапатланди. Шу мунасивәт билән биз гезитимизниң садиқ дости Долқунтай Абдухелилни қизғин тәбрикләймиз һәм ишида утуқлар тиләймиз.