• Яшлар жили
  • 08 Тамыз, 2019

Ата-аниға қарап пәрзәнт өсиду

Миллитимиз вәкиллири арисида уссул шәйдалири йетәрлик, амма балет артистлири наһайити аз. «Алмута гөзили – 2019» конкурсида мукапатлиқ орунларниң бирини егилигән уйғур қизи Сабина Қурбанованиң нәқ шу сәнъәт түригә мунасивитиниң бар екәнлигини аңлиғинимда, мениңдә униң билән сөһбәтлишиш истиги пәйда болди. Бәхтимизгә, Сабина Алмута шәһириниң Султанқорған мәһәллисидики уйғур җамаәтчилигигә яхши тонуш, йеқиндила «Әла-Султанқорған» җәмийәтлик бирләшмисиниң рәиси болуп сайланған Кәримҗан Қурбановниң қизи болуп чиқти. Кәримҗан Қурбанов бокс бойичә Кеңәш Иттипақиниң хизмәт көрсәткән мәшиқләндүргүчиси, спортқа чәксиз муһәббәт бағлиған инсан. Физкультура институтида тәһсил көрүватқан өткән әсирниң 80-жиллири Иттипақ даирисидә бокс бойичә түрлүк-түмән мусабиқиләргә турақлиқ қатнишип кәлгән Кәримҗан Қурбанов өз салмақ категорияси бойичә Қазақстан чемпиони атиғиға еришкән екән. Кәримҗан Қурбанов билән болған дәсләпки учришишимиз өзи салған спорт залида өтти. – Башқа милләт вәкиллиридин болған достлирим: «Адәмләр заманға яриша кафе, ресторан, дуканларни селиватқан чағда бизниң Кәримҗан спортзалини тиклигән уйғурдә» дәп һәзиллишиду. Мән уларға: «Спортсиз һаятимни қияс қилалмаймән» дәп җавап беримән. Мана бу залда һазир 30ға йеқин яш өсмүр мәшиқлиниватиду. Өмүрлүк җүптүм Рисаләт билән Мадина, Дилмурат, Сабина исимлиқ икки қиз бир оғул тепип, уларни җәмийәткә ярамлиқ инсанлардин қилип тәрбийилидуқ. Сабина – аилимизниң кәнҗиси. Һелиму ядимда, 5–6 яш вақитлирида уни фортепьяно үгитидиған мәктәпкә бәрдим. Өзәм спортчи болғанлиқтин, бир күнүмму һәрикәтсиз өтмәйду. Шуңлашқа қизим 9 яшқа толғанда, униңму көп һәрикәт қилишини халидим. Ағинәм, тонулған хореогроф Тайир Баратовни өйгә тәклип қилип, өз ара мәслиһәтлишип, Сабинани Алмута хореография мәктивидә оқутушни қарар қилдуқ. Кейин қизим өз күчи билән хореография учелищесиға оқушқа чүшүп, мәзкүр билим дәргаһини муваппәқийәтлик тамамлиди. Балет дуниясида ишәшлик қәдәм ташлиған Сабинаниң мәнивий дуниясиға бир нәзәр ағдурмақчи болуп, униңға бир нәччә соал билән мураҗиәт қилдуқ: – Сабина һаятниң мәзмун-мәниси немидин ибарәт дәп ойлайсиз? – Мениңчә, ата-анамниң, йеқинлиримниң аман-есән йенимда жүргини вә өзәм сөйгән кәспим билән шуғуллинишим – шәхсән мениң үчүн һаятимниң мәзмуни болуп һесаплиниду. Мән хореография училищесиниң 2-курсида оқуватқан вақтимдила «Астана балет» театри ишқа тәклип қилди. Ойлап көрүң, өйдин жираққа кәтмигән 16 яшлиқ қиз үчүн ата-анисидин жирақ, натонуш шәһәрдә туруп ишләш қанчилик мәшәқәтлик. Униң үстигә елимиз пайтәхтидә бизниң һеч қандақ уруқ-туққанлиримизму йоқ еди. Әтигәндин кәч киргичә театрда – қоюлумлар үстидә ишләш, репетиция һәм мәшиқлиниш билән күнимиз өтәтти. Кәч киргәндә бирақла өйгә келәттуқ. Алмутида болған вақтимдиму кәчқурун задила кочиға чиқматтим. Чүнки вақитни бош өткүзүшни өзәмму, ата-анамму халиматти. Астанада туруп ишләватқан чағда мән дунияда һәммидин әзиз ата-анамниң, қом-қериндашлиримниң қәдир-қиммитини техиму чоңқур һис қилдим. Дадам билән апам мени дайим йоқлап туратти. Һәтта биз гострольлуқ сәпәргә чиққан шәһәрләргиму берип, мән иштрак қилған қоюлумларниң тамашибини болуп, көңүллүк кәйпиятта Алмутиға қайтатти. Һелиму ядимда, театр коллективи Чимкәнт, Тараз шәһәрлиридә гастрольда болғинида тамашибинлар олтарған залда ата-анамни көрүп бешим көккә йәткән еди. Қизи қатнишиватқан балет қоюлумини көрүш үчүн Қазақстанниң һәрқандақ шәһиригә йетип келип, маңа роһий мәдәт берәтти. Мән мундақ пәйтләрдә қанатлинаттим. Сиз соримақчи болған һаятниң мәзмун-маһийити әйнә шундақ есил дәқиқиләрдин турса керәк. – Сиз һаятта даңлиқ бирәр шәхсниң ихласмәниму яки, чүшинишлик қилип ейтқанда, қайси атақлиқ шәхскә охшиғиңиз келиду? – Мән өзәм үчүн ата-анамдәк даңлиқ шәхс бу дунияда йоқ дәп һесаплаймән. Әгәр ата-анамғила охшалиған болсам, шуниң өзи мениң үчүн купайә. Улар маңа тәрбийә бәрди, оқутти. Мән өзәмни заманға яриша тәрбийә көргән, билим алған шәхс дәп һесаплаймән. Бу, әлвәттә, ата-анамниң бала тәрбийиләштики бебаһа әҗриниң нәтиҗиси. – Андақда ата-аниңизниң қандақ хисләтлири сиздә муҗәссәмләнгән? – Байқишимчә, дадамниң спортчиға хас қәтъийлиги, ирадиси мениңда бардәк. Чүнки мәнму алдимға қойған мәхситимгә йәтмигичә, шу нишанни беқиндурмиғичә һәргиз артқа қайтмаймән. Чекинишни турақсизлиқ билән ирадисизликниң көрүнүши дәп билимән. Әнди апамниң меһриванлиғи билән силиқ-сипайилиғиниму маңа сиңгән дәп ейтишқа болиду. – Спортниң қайси түрини яқтурисиз? – Балетқа охшашлиғи бар элементларни өз ичигә алғини үчүнму бәдиий гимнастика көңлүмгә бәк йеқин. – Дәсләпки устазиңиз ким? – Хореография училищесида билим еливатқан чағда Гүлзира Ашимовадин хореографияниң қир-сирлирини үгәндим. Гүлзира Акимқизи наһайити тәҗрибилик вә тәләпчан устаз сүпитидә шагиртлиқ қәлбимдә алаһидә орунни егиләйду. – Сизниң йешиңизни нәзәрдә тутуп, муһәббәт һәққидә соални айлинип өткинимиз тоғра болмас. – Муһәббәт – кәң даирилик сезим, нисбий чүшәнчә. Дунияға яратқан инсанларға, туғулған диярға, таллиған мутәхәссисликкә вә өмүрлүк ярға болған муһәббәтниң һәрбирини алайтән қараштурған дурусмекин дәп ойлаймән. Сизгә мону бир вақиәни ейтип берәй. Мән хореография вә балет дуниясиға қәдимимни 9 йешимда ташлидим. Мана 13 жил мабайнида шу дунияниң нәпәси билән яшаватимән. Буниңдин бир аз вақит илгири Түркиядин келип, балеттин тамамән қол үзмәкчи болдум. Әтималим, азирақ җисманий вә роһий чарчаш тәсиридин мошундақ ойға кәлгән болсам керәк. Бир аз дәм елиштин кейин ички дунияримда бир бошлуқ пәйда болуватқинини һис қилишқа башлидим. Сезимимға қулақ салсам, бу балетқа болған муһәббәтниң авази екән. Балет – мениң һаятимниң маһийитигә, өмрүмниң мәзмуниға айланғачқа, униңға болған муһәббәт мени һәргизму башқа яққа қоюп бәрмәтти. Шу чағдила балетсиз һаятимни тәсәввур қилалмайдиғанлиғимға ениқ көз йәткүздүм. – Бош вақтиңизда немә билән шуғуллинишни яқтурисиз? – Рәсим сизишни бәк яқтуримән. Өзиңиз көргән дадам мәшиқләндүридиған спорт залидики рәсимләр – мениң фантазиямниң мәһсулати. Андин түрк сериаллирини яхши көримән. – Ахирқи әнъәнивий соал: арзу-арманлириңиз һәққидә ейтип бәрсиңиз? – Мениңчә, инсандики арзу-арманларниң чеки һәргиз болмайду. Мениң бирла арминим – ата-анамниң үмүт-ишәнчисини ақлалайдиған пәрзәнт болуш. – Сөһбитиңизгә рәхмәт. Сөһбәтләшкән Азнат ТАЛИПОВ.   Тәрҗимиһал сәһипилиридин Сабина Қурбанова 1997-жили 8-август күни Алмутида дунияға кәлди. Шәһәрдики А.В.Селезнёв намидики хореография учелищесида оқуветип, елимиз пайтәхтидики «Астана балет» театрида үч йерим жил, Қазақстан җумһурийитиниң дөләт академиялиқ уссул театрида бир жилдин көпирәк вақит әмгәк қилди. Кәспий балет артисти сүпитидә өзи паалийәт елип бериватқан иҗадий коллектив билән йеқин вә жирақ чәт әлләрдә, җүмлидин Россия, Франция, Австрия, АҚШ, Корея, Япония, Венгрия, Әзәрбәйҗан әллириниң чоң-чоң шәһәрлиридә өз һүнәрлирини намайиш қилип, сәнъәтниң гүлтаҗиси һесаплинидиған балет дуниясида йеңи тонушларни тепиш билән биллә, кәспий тәҗрибисиниму йетилдүрди. Сабинаниң талантини байқиған даңлиқ хореогроф вә балетмейстер Болат Аюханов уни өзиниң театр коллективида көрүшни халиған екән. 2019-жили «Мисс Алматы – 2019» конкурсида «Вице-мисс» номинациясигә еришкән Сабина Қурбанова бүгүнки күндә Т.Жүргенов намидики Сәнъәт академиясидә хореогроф-педагог мутәхәссислиги бойичә тәлим алмақта.

28 рет

көрсетілді

0

пікір
Алдыңғы мақала Мәхситигә йәткән Меһриниса
Келесі мақала Тәдбирчан жигит

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

23 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы