• Яшлар жили
• 08 Тамыз, 2019

Тәдбирчан жигит

«Чоң болғанда ким болисән?» дегән соалға гөдәкләрниң 70 пайизи немишкә «Башлиқ болимән!» дәп җавап қайтуриду? Сәвәви, ата-анилар балилирини кичигидин «Мениң балам чоң болғанда башлиқ болиду...» дәп махтап, әнди әқил киришкә башлиған гөдәкләрниң еңиға «башлиқ болушум керәккән», дегән ойни сиңдүрүп қойиду. Шуңа, мәктәп тамамлиған яшларниң тәңдин-толиси «башлиқ» болидиған кәсипни издәйду. Қолиға диплом елип, бирдин юмшақ креслода олтиришни арман қилиду. Сабирәм ӘНВӘРОВА, «Уйғур авази» Бүгүн биз кичигидин башлиқ болушни әмәс, бәлки атиси Бавдунға охшаш яғашчи болушни арман қилған Меһирдин Шаваев һәққидә сөз қозғимақчимиз. Меһирдин Бавдуноғли 1991-жили Уйғур наһийәсиниң Түгмән йезисида дунияға кәлгән. У 2008-жили Түгмән оттура мәктивини тамамлап, Алмута йеңи технологияләр колледжиниң «техник-механик» факультетиға оқушқа чүшиду. – Әслидә, балилиқ арминим дадамға охшаш яғашчи болуш еди, – дәйду Меһирдин сөһбәтара. – Лекин заман тәливигә мувапиқ бу кәсипни таллашниң анчә зөрүрийити қалмиди. Технологияләр тәрәққий әткән заманда һаҗәтлик кәсипләрниң бири автоэлектрик болғачқа, һеч ойланмай мошу мутәхәссисликни таллидим. Раст, йезидин шәһәргә берип, коллежда оқуп жүргән пәйтимдә бираз қийналдим. Бирақ аста-аста өз кәспимниң қир-сирлирини чүшинишкә башлиғандин кейин, мутәхәссислик таллашта хаталашмиғанлиғимни чүшәндим. Мәзкүр билим дәргаһини тамамлап тәҗрибә топлаш мәхситидә икки жил Алмутидики техника җөндәш мәркәзлириниң биридә һәқ алмай ишлидим. Әлвәттә, шәһәрдә бекарға ишләп җан беқиш мүмкин әмәсқу. Шуңа, кечиси күзәтчилик қилип, әйтәвир, қолумдин кәлгән еғир-йеник оқәтниң һеч қайсисидин баш тартмидим. Немисини йошурай, йолумға ахча тепиш үчүн һәтта әхләт жиғишта ишлигән күнлиримму болди. Шундақ қилип, билимимни мукәммәлләштүрүш мәхситидә алий оқуш орнида икки жил сирттин оқуп, 2014-жили қолумға «инженер-механик мутәхәссиси» дегән диплом алдим. Һәқсиз хизмәт қилған иш орнум икки жилдин кейин мени рәсмий ишқа қобул қилди. У йәрдә йәнә үч жил әмгәк қилип, көп нәрсә үгәндим. Меһирдин Шаваевниң гәплирини аңлап, әмгәксөйгүч жигитниң сунмас ирадисигә қайил болдуқ. Сөзниң расти, һазир ундақ тиришчан һәм ирадилик яшлиримиз йоқниң орнида. Чүнки бүгүнки яшлар бирәр ишқа кириштин авал, алидиған маашини сорайду. Һә, Меһирдинниң тәҗрибә топлаш мәхситидә икки жил һәқсиз ишлигини қәһриманлиқ әмәсму! Бәш-алтә жиллиқ иш-тәҗрибисидин кейин Алмутидики техника җөндәш мәркәзлириниң бирини иҗаригә елип, өз алдиға иш башлиған Меһирдин Шаваев 2018-жилниң ахириғичә шәһәрдә хизмәт қипту. Кейин өйиниң кәнҗиси болғачқа, ата-анисини ғәмхорлиғиға елиш үчүн ана жути Түгмән йезисиға қайтип кәпту. Андин Гүлбаһар Шаваева билән турмуш қуруп, кәспини давамлаштуруш мәхситидә 2019-жилниң март ейидин башлап Чонҗа йезисидики техника җөндәш мәркәзлириниң биридә наһийә хәлқигә әстаидил хизмәт көрсәтмәктә. Машина җөндәш – һәркимниң қолидин келидиған иш әмәс. Бу кәсипниң өз маһирлири болиду. Мана шуларниң бири – Меһирдин Шаваев десәк, ашуруп ейтқанлиқ болмас. Дохтурлар адәм давалиса, Меһирдин Бавдуноғли төмүр тулпарларниң дохтуридур. – Мән өз кәспимни яхши көримән. Техникиниң бузулған йерини тепип, җөндәп, егисигә тапшурғанда, херидарим ишимдин рази болса – бу мениң үчүн әң чоң утуқ, – дәйду Меһирдин һаяҗанлинип. Елимиздә махташқа лайиқ яшлар йетәрлик. Қара майға милинип, қара тәргә чүшүп, әмгәк қиливатқан яш автоэлектрик Меһирдин Шаваевни әйнә шуларниң қатариға ятқузушқа әрзийду. Меһирдин Бавдуноғлиниң келәчәктә шәхсий тиҗаритини тикләп, өз алдиға техника җөндәш мәркизини ишқа қошуш армини бар. Хәйрият, тәдбирчан жигитниң көзлигән мәхситигә йетидиғанлиғиға ишәнчимиз камил.