• Әхбаратлар еқими
• 08 Тамыз, 2019

Үч адәм қаза тапти

Гөһәрбүви ИСМАЙИЛҖАНОВА, «Уйғур авази» Өткән шәнбидә Панфилов наһийәсиниң Талди йеза округиға қарашлиқ тағлиқ йәрдә от кәтти. «Өрт тилсиз йеға» дегини шу болса керәк, бу тағлиқ йәрдә 500 гектар мәйдан отниң ичидә қалди. Уни өчириш үчүн МИ-8 вертолети җәлип қилинди. Тәкитләш керәкки, Яркәнт орман егилиги мәһкимисиниң хадимлири билән Лесновка йезисиниң турғунлири тилсиз йеға билән җиддий күрәшти. От өчириш вақтида 3 адәм қаза болуп, 7 адәм зәрдап чәкти. Зәрдап чәккәнләр вертолет билән наһийәлик ағриқханиға йәткүзүлди. Һәр хил дәриҗидә җараһәт алған бәши давалинип, өйлиригә қайтурулди. Икки өрт өчәргүчиниң тени 30-35 пайиз көйгән. Уларниң бири реанимация бөлүмидә. Йәнә бири хирургия бөлүмигә ятқузулди. Вақиә йүз бәргән йәрдә Алмута вилайәтлик Пәвқуладдә әһваллар бөлүмидин, полициядин барлиғи болуп 59 адәм, 13 һәр хил техника, шундақла Яркәнт орман чарвичилиғи мәһкимисиниң хадимлири иш елип бериватиду. Өрт билән күрәш ишлири давамлишиватиду. Вақиә йүз бәргән йәрни «Қазавиақұтқару» мәһкимиси вертолет билән назарәт қиливатиду. Ички ишлар министрлиги, Алмута вилайәтлик, Панфилов наһийәлик һакимийити қаза болған вә зәрдап чәккәнләрниң аилилиригә көңүл ейтип, уларға маддий ярдәм көрситилидиғанлиғини тәкитлиди. Панфилов наһийәси.