• Замандаш
• 15 Тамыз, 2019

Башланғуч синип муәллими

Хәлқимиздә “Яхшиниң яхшилиғини ейт, қәдри ашсун” дегән сөз бар. Яхшиларниң пәзилитидин аләм гүлстан, һаят көңүллүк екәнлиги шәк-шүбһисиз. Әпсус, көп вақитларда әшундақ яхши адәмләрниң йенидин бепәрва өтүп кетимиз. Униң һаят паалийитигә, сиңәргән әҗригә анчә көңүл бөлүп кәтмәймиз. Һә, буни аддий түрдә “инсанчилиқ” дәп қойимиз, халас. Әйнә шундақ тилға елишқа әрзийдиған, устаз-мәрипәтчи, 40 жиллиқ һаятини пәқәт маарип саһасиға беғишлиған, дәсләп гөдәкләргә қәләм тутқузуп, елипбәни үгәткән, қисқиси, өзиниң барлиқ аңлиқ һаятини өсмүрләр тәрбийисигә, шуларни оқутушқа сәрип қилған Гүлминәм Турдиеваниң әмгиги алаһидә. Әҗрини қанчә тәриплисиму әрзийдиған устазларниң бири. Билим асаси – башланғучта екәнлиги һәммимизгә мәлум. Шуңлашқа башланғучта яхши оқуған балиниң жуқарқи синипларға көчкәндиму һечбир қийналмай яхши оқуйдиғанлиғи өз-өзидин чүшинишлик. Бу җәһәттин Гүлминәм Турдиеваға шагиртлириниң ейтар алқиши чәксиз. Гүлминәм Турдиева илгәрки Челәк наһийәсигә қарашлиқ Ғәйрәт йезисида 1950-жили дунияға келиду. Челәк йезисидики Абай намидики оттура мәктәпни әла баһалар билән тамамлиғандин кейин һеч иккиләнмәй өзигә охшаш мәктәп тамамлиған 3-4 нәпәр дости билән Яркәнттики педучилищеға оқушқа бариду. Мәктәпни яхши пүтәргән қиз емтиһанлардин һеч қийналмай өтүп, студент атилиду. Яркәнт шәһириниң гөзәл мәнзириси сап һаваси студентлар үчүн илһам мәнбәси болди. Қисқиси, “һайт-һуйт” дегичә қийинчилиғи билән қизиқчилиғи мол студентлиқ һаят пүтүп, педучилищени қизил диплом билән тамамлиди. Алған билимини өзи туғулуп өскән Ғәйрәт йезисидики һазирқи И.Саттаров намидики мәктәптә башланғуч синипларға билим бериштин башлиди. Инавәтлик аилидә туғулуп өскән, мүҗәз-хулқи юмшақ, ақ көңүл яш педагог қисқа вақитниң ичидә балиларниң әң меһриван устазиға айланди. – Балилар билән ишләш бир йеқидин тәс болғини билән йәнә бир тәрипидин бәкму көңүллүк. Әйнә шулар билән “һәпилишип” жүрүп 40 жиллиқ һаятниң қандақ өтүп кәткинини, һәтта пенсия йешиға келип қалғинимниму сәзмәптимән, – дәйду Гүлминәм Турдиқизи әмгәк паалийити һәққидә қисқичә һекайә қилип. Гүлминәмниң өмүрлүк йолдиши Рәхмәт Имрәмзиевму мәхсус оттура билимлик агроном сүпитидә егилик тәрәққиятиға мунасип һәссә қошқан жигитләрниң бири. Йеши 70кә келип қалған болсиму, етиз-ериқ ишлиридин һели қол үзгини йоқ. Гүлминәм Турдиева иккиси беқип қатарға қошқан үч пәрзәнди җәмийәттин мунасип орнини тапти. Қизи Сәнәм аписиниң изи билән педагогика саһасини таллавалған болса, оғли Қудрәт ата изини бесип чиқти. У шәхсий дехан егилигини башқуриду. Кәнҗиси Қуяш Алмута технологиялик университетини тамамлап, өз мутәхәссислиги бойичә ишләватиду. Болупму Сәнәм Имрәмзиевани қанчә махтисиму әрзийду. Чүнки истедатлиқ қиз үч институтни қизил диплом билән тамамлиди. Атап ейтқанда, Қазақ миллий университетини, Алмута дөләт университетини вә Қизлар педагогика университетини әла баһалар билән тамамлиди. Биз жутдишимиз, тәҗрибилик устаз Гүлминәм Турдиқизиға саламәтлик, аилисигә хатирҗәмлик тиләймиз. Мәһәмәтҗан ҺАПИЗОВ. Әмгәкчиқазақ наһийәси.