• Яшлар жили
• 21 Тамыз, 2019

Спорт мәйданчиси ечилди

Рашидәм РӘҺМАНОВА, «Уйғур авази» Елимизниң ихтисадий тәрәққияти барлиқ саһаларни риваҗландуруш үчүн йол ечиватқанлиғи қазақстанлиқларниң парлақ келәчәккә дегән ишәнчисини ашурмақта. Җүмлидин үчсменилиқ мәктәпләрниң қисқирап, балиларниң һәртәрәплимә йетилиши үчүн билим дәргаһлирида һәрхил өмәкләр билән мәхсус синипларниң ечилиши келәчәк әвлатқа дегән ғәмхорлуқниң испатидур. Йеқинда әйнә шундақ хошаллиқ вақиә Әмгәкчиқазақ наһийәсиниң Саймасай йеза округидики Амангелди йезисида йүз бәрди. Ениғирақ ейтсақ, «Яшлар жилиға» бенаән Елбасыниң «Келәчәккә нишан: мәнивий йеңилиниш» программиси даирисидә йезидики Садир намидики оттура мәктәп йенида мини-спорт мәйданчиси тәнтәнилик рәвиштә ечилди. Тәкитләш лазимки, ушбу мәйданчә «Өңірлерді дамыту» программиси бойичә селинип, униң қурулуши үчүн дөләттин 10 миллион тәңгә аҗритилди. Тәнтәнигә Саймасай йеза округи һакимийитиниң вәкиллири, жут мөтивәрлири, Садир намидики оттура мәктәпниң оқуғучилири вә муәллимлири қатнашти. Саймасай йеза округи һакиминиң вәзиписини атқурғучи Динара Төлебаева, Ақсақаллар кеңишиниң рәиси Жантайлақ Қасенов, мәктәп мудири Қурванҗан Тайиров вә йезиниң жигитбеши Тудахун Бақиев йеза турғунлирини ушбу хошаллиғи билән сәмимий тәбрикләп, мәктәп йенидики спорт мәйданчисиниң йезидики қабилийәтлик балиларниң мүмкинчиликлирини ашуридиғанлиғини тәкитләшти. Натиқлар мини-спорт мәйданчисиниң ечилиши – спорт вә сағлам һаят тәризини тәрғип қилишниң әң илғар йоли, болупму балилар вә яшлар арисида спортниң аммибаплиққа егә футбол, мини-футбол охшаш түрлиригә дегән қизиқишини өстүрүшниң әң утуқлуқ йоли екәнлигини, әнди йеза яшлириниң бош вақтини үнүмлүк пайдилинип, онлиған қабилийәтлик спортчиларниң йетилип чиқишиға ишинидиғанлиғини билдүрди. Тәнтәнә ахирида йеза яшлири кеңишиниң әзаси, спорт җанкөйәри Шатлиқ Адиловниң уюштурушида яшлар арисида мини-футбол бойичә мусабиқә өтти. Әмгәкчиқазақ наһийәси.