• «Мейірімді жүрек»
• 28 Тамыз, 2019

Хәйрихаһлиқ концерт

Конституция күни һарписида Әмгәкчиқазақ наһийәси Тәшкәнсаз йеза округи һакимийитиниң қоллап-қувәтлиши билән Зульфира Ниязованиң рәһбәрлигидики «Дилназ» уссулчилар ансамблиниң хәйрихаһлиқ концерти уюштурулди. Концерт Яшлар жилиға беғишлинип, «Мейірімді жүрек» шиари астида өтти. Рашидәм РӘҺМАНОВА, «Уйғур авази» «Дилназ» ансамблиниң тәшкил қилинғиниға бирнәччә жил болди. Кичигидин уссулға иштияқ бағлиған Зульфира уни жутдашлириниң илтимаси билән қурған. Ансамбльниң тәркивигә башта 15 бала болса, һазир уларниң сани 70кә йәтти. Бийил Зульфира хошна Амангелди йезисидиму әшундақ топ қурди. Тәкитләш лазимки, һәр икки йезида йә Мәдәнийәт өйи, йә клуб йоқ. Шуңлашқиму ансамбльға бу йезилардики қабилийити бар балиларниң барлиғиниң қатнашқуси келиду. Зульфира – көрнәклик мәрипәтчи, мәрһум Һебибуллам Қаһаров намидики җумһурийәтлик XІV «Һошшәрә, яш талантлар!» фестивалиниң, А.Низиров намидики «Мән сеғинған баһаримға йетәлмидим» наһийәлик конкурсиниң, І җумһурийәтлик «Үмүт юлтузлири» балилар фестивалиниң лауреати. У Үрүмчи шәһиридики Шинҗаң педагогика университетида тәһсил көрди. Бийил оқушини тамамлап, жутиға қайтқан қиз һазирчә ансамбльдики балилар билән ишләп, кейинки жили оқушини йәнә давамлаштурмақчи. Зульфираниң шагиртлири өзлири билим еливатқан Һезмәт Абдуллин намидики вә Садир намидики оттура мәктәпләрдики һәм йезилардики барлиқ мәдәний чарә-тәдбирләргә қатнишип, көпчиликниң алқишиға сазавәр болуп кәлмәктә. Устази уларни келәчәктә чоң-чоң сәһниләргә елип чиқишни арман қилиду. «Дилназ» ансамблиниң хәйрихаһлиқ концерти йезидики мүмкинчилиги чәкләнгән 20 балиға ярдәм көрситиш нийитидә уюштурулди. Бу күни йезидики Улуқ Вәтән уруши қурванлириниң хатирисигә орнитилған ядикарлиқ йениға Тәшкәнсазниң барлиқ дегидәк турғунлири жиғилди. Уюштуруш ишлири билән асасән Зульфираниң ата-аниси шуғулланса, ансамбль тәркивидики балиларниң ата-анилири, җәмийәтлик ишларниң активистлири Разийәм Надирова вә Қурванбүви Шәрипованиң рәһбәрлигидә билетларни тарқитишта ярдәм бәрди. Һ.Абдуллин намидики оттура мәктәпниң муәллимлири Гүлнисәм Қасим концертниң сценарийини йезип, кәч риясәтчилигини өз зиммисигә алса, Рәпқәт Қурбанов 8 йешида йол һалакитидин қаза тапқан, «Ғунчә» фестивалиниң иштракчиси Шаһидәм Ширмуһәмәтоваға беғишлап нахшилар иҗра қилди. Икки сааттин ошуқ вақит мабайнида 70тин ошуқ омақ оғул-қиз қазақ, уйғур, рус, татар, түрк вә башқиму милләтләрниң уссуллирини орунлап, тамашибинларниң гүлдирас алқишлириға еришти. Яш талант егиси Эсмира Абдуллаеваму қазақ, уйғур вә рус нахшилиридин чачқа чачти. Кәчни Әмгәкчиқазақ наһийәлик Уйғур этномәдәнийәт мәркизи рәисиниң орунбасари Нурбүви Насирова вә Тәшкәнсаз йезиси Ханим-қизлар кеңишиниң рәиси Нурбүви Ғәзәмова йәкүнләп, «Дилназ» ансамблиға вә концертни уюштурғучиларға миннәтдарлиғини билдүрди. Тәшкәнсаз йеза округи һакимийитиниң яшлар ишлири бойичә хадими Шахноза Алиева округ һакими Эльвира Мәсүтованиң намидин Пәхрий ярлиқ тапшурди. Әмгәкчиқазақ наһийәси.