• Өтмүшкә бир нәзәр
  • 28 Тамыз, 2019

Әлгә әмгиги сиңгән адәм

Һаят йоли уруқ-туққанлири билән әтрапидики адәмләргила әмәс, көпчиликкә үлгә-ибрәт болидиған адәмләр аримизда аз әмәс. Улар өз мәнпийитини ойлимайду, бар күч-ғәйритини җәмийәтниң тәрәққиятиға беғишлап, инсаний борчини әла дәриҗидә өтәшкә тиришиду. Нурғун жиллар давамида Уйғур наһийәлик мәркизий ағриқханиниң баш врачи, Алмута вилайәтлик мәслиһәтниң депутати болған, Қазақстан Җумһурийити Саламәтликни сақлаш саһасиниң әлачиси Ақжолтай Мәмбеталиев әйнә шундақ инсан еди. Чонҗида туғулуп-өскән Ақжолтай Турдалыоғли йезидики рус оттура мәктивини 1977-жили “Алтун медаль” билән тамамлап, Алмутидики Дөләт медицина институтиниң давалаш факультетиға оқушқа чүшиду. Уни әла баһаларға пүтирип, 1984-жили Уйғур наһийәлик мәркизий ағриқханиға хирург-врач болуп ишқа орунлишиду. Әмгәкчанлиғи вә жуқури уюштуруш қабилийити түпәйли хизмәт пәләмпәйлиридә тез көтирилип, мошу ағриқханиниң баш врачи болуп тайинлиниду. Әгәр өмри әтигән қийилмиғанда, бийил һаятиниң атмишинчи пәллисигә көтирилгән болар еди. Аддий ишчи аилисидә туғулған Ақжолтай балилиқ чағлиридила өзиниң әқиллик бала екәнлигини көрситишни билди. Болупму китап десә, әтрапидики һечнәрсә көзигә көрүнмәтти. Өзиниң тәңтушлири кәч киргичә оюндин баш көтәрмисә, у китаптин көз алматти. Ейтишларға қариғанда, у 1-синипқа барғанда, ата-анисиниң наразилиғиға қаримай, рус мәктивини таллавалған екән. Он жил бойи әлачилар қатарида болуп, җәмийәтлик ишларниң қайнимида жүрди. Мәктәпни тамамлап, һәрқандақ мутәхәссисликни әркин егиләш қабилийитигә егә Ақжолтай медицина саһасини таллавалиду. Униңға, мүмкин, Улуқ Вәтән урушиниң ветерани —дадиси Турдалыниң пат-пат ағрип йетип қалидиғанлиғи яки 100 яшниң үзини көрүп вапат болған аниси Тоқбаланиң тәсириму, әйтәвир, дохтур болуш униң балилиқ арминиға айланған еди. Алий оқуш орнини қизил диплом билән тамамлап, туғулуп-өскән йезисиға қайтип кәлди. Идрәклик вә зерәк жигитниң оқушини йәниму давамлаштурушқа мүмкинчилиги болсиму, ата-ана билән туғулған йәр алдидики пәрзәнтлик борч униң келәчигини Чонҗа йезиси билән мәккәм бағлаштурди. Мошу борчни һаятиниң мәзмуни дәп билгән у өз кәспиниң қир-сирлирини йетүк өзләштүрүш үчүн оқуш вә издиништин ялиқмиди. Әгәр бош вақти тепилип қалса, уни спорт билән сәнъәткә беғишлиди. Хизмитидә исим-шәрипи наһийә хәлқигә яхши тонуш атақлиқ врачлар Турарбек Төлендиев, Шынтай Асрандин, Өмирхан Садықов охшаш устазлиридин үгәнгини көп болди. Врачниң, җүмлидин һәрқандақ вақитта операция үстилидин нери кәтмәйдиған хирургниң иши наһайити җавапкәрлик екәнлиги һәммимизгә яхши мәлум. Әйнә шу җавапкәрликни чоңқур һис қилған Ақжолтай Турдалыоғли пәқәт ағриқханидики хизмитидә бемарларғила әмәс, шундақла әтрапидикиләргиму меһрини төкүп өтүшни билди. Өз паалийитини башлап, көп өтмәйла ағриқханиниң баш врачи лавазимиға тайинлинишиға униң әйнә шундақ алий инсаний хисләтлири асас болғанлиғи тоғрилиқ ейтиватқанларниң сөзигә толуқ қошулушқа болиду. Әнди униң Уйғур наһийәсидә саламәтликни сақлаш саһасини тәрәққий әткүзүшкә қошқан һәссиси инавәткә елинип, 2002-жили “Қазақстан Республикасы денсаулық сақтау саласының үздігі” бәлгүси билән мукапатланди. Өз ишиниң маһири болған уни мәркизий ағриқхана коллективи дайим һәртәрәплимә қоллап-қувәтләп кәлди. А.Мәмбеталиевни кәсипдашлири һелиму сеғиниш илкидә әскә алиду. Мәсилән, мошу ағриқханиниң хадими Гүлминәм Баратова “Ақжолтай Турдалыоғли врач болуп туғулған адәм. Нурғун жиллар давамида наһийәлик ағриқханиниң рәһбири болған у өзигиму, өзгиләргиму жуқури тәләп қоятти. Һәрбир бемарниң ағриқханидин пәқәт жуқури кәйпият илкидә чиқип кетишини халатти вә шундақ болушини һәм врачтин, һәм һәмшириләрдин тәләп қилатти. Шундақла мәрһум наһайити аддий, адәмләр билән оңайла тил тепишишни билидиған хисләткә егә еди” десә, йәнә бир кәсипдиши, хирург Бәхитҗан Тохтахунов Ақжолтай Турдалыоғлини өзиниң устази екәнлигини мәмнунийәт билән тилға елип, мундақ дәйду: “Он алтә жил давамида иккимиз биллә хизмәт қилип, ака-укидәк болуп кәткән едуқ. У наһайити кичик пейил, бемарларниң көңлини елишқа наһайити чевәр еди, әшу хисләтлирини бизгә үгитип кәтти. Икки сөзиниң биридә “Айналайын”, “Қарағым” дегән ибариләрни тилға алатти. Һазир мәнму Ақжолтай Турдалыоғлидин үгәнгән мошундақ иллиқ вә меһриванлиққа толуп-ташқан сөзләрни пат-пат тилға елишқа интилимән”. Биз сөзләшкән башқа кәсипдашлириму А.Мәмбеталиевниң һәқиқий кәспий мутәхәссис, адил рәһбәр, меһриван инсан болғанлиғини ейтти. У рәһбәрлик қилған пәйттә Уйғур наһийәлик мәркизий ағриқхана Алмута вилайити бойичә “Илғар наһийәлик мәркизий ағриқхана” аталди. Пәқәт мошу утуқниң өзила мәрһумниң тинимсиз әмгигиниң, коллективни бир мәхсәткә сәпәрвәрликкә кәлтүрүшни билгәнлигиниң нәтиҗиси екәнлиги ениқ. Қазақ хәлқиниң данишмән мутәпәккүри Абайниң “Адамзаттың бәрін сүй, бауырым деп” дегинидәк, һәммигә өзиниң меһир-муһәббитини төкүшни билгән, кәсипдашлири арисида аброй-инавити жуқури, “Адәм” дегән мунасип намға дағ чүширишни билмәй өткән Ақжолтай Турдалыоғлиниң һаят йоли билән хизмити тоғрилиқ қисқичә сөз әйнә шундақтур. Дина Имамбаева.

23 рет

көрсетілді

0

пікір
Алдыңғы мақала Дәсләпки билим дәргаһлириниң бири

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

23 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы