• Йеңилиқлар
  • 28 Тамыз, 2019

Алтундин қиммәт сөзләр

Пайтәхттә “Қазақ поэзиясының інжу-маржандары” антологияси тонуштурулди. Мәзкүр нәшир қазақ әдәбиятиға қизиққучилар үчүн бебаһадур. Он үч томниң һәрбири бир шаирға беғишланған. Бу түркүмгә Абай, Шәкәрим, Мағжан Жумабаев, Илияс Жансүгүров, Муқағали Мақатаев, Туманбай Молдағалиев, Олжас Сүлейменов, Фариза Оңғарсынова, Қадыр Мырза Әли, Жубан Молдағалиев, Қасым Аманжолов, Мухтар Шаханов вә Жумекен Нәжимединов охшаш сөз зәргарлириниң әсәрлири киргүзүлди. Лайиһә үч жилдин буян Елбасы – Тунҗа Президент Нурсултан Назарбаевниң тәшәббуси һәм Дөләт рәһбири Қасым-Жомарт Тоқаевниң қоллап-қувәтлиши билән утуқлуқ әмәлгә ашурулуватқан “Рухани жаңғыру” программиси даирисидә орунланди. Һәрбир китап Қазақстан Президенти Қасым-Жомарт Тоқаевниң киришмә сөзи билән ечилиду. Дөләт рәһбириниң мәтбуат кативи Берик Уәли Миллий академиялик китапханида өткүзүлгән тонуштуруш мәрасимиға қатнашқучиларға китапханға йолланған шундақ мураҗиәтләрниң бирини оқуп бәрди. Мәсилән, Дөләт рәһбири атисиниң шәхсий китапханисидики Абай, Илияс, Қадыр, Мағжан, Олжас китаплириниң уни қазақ поэзиясиниң дунияси билән тонуштурғанлиғини әскә алғач, әдәбиятниң шәхсни шәкилләндүрүштә алаһидә муһим роль ойнайдиғанлиғини тәкитләйду. Қазақстан Язғучилар иттипақиниң рәиси, әдәбиятчи Улықбек Есдәулет, атақлиқ язғучи, Дөләт мукапитиниң лауреати Әлибек Асқаров вә “Фолиант” нәшриятиниң мудири Нурлан Исабеков антологияниң идеявий илһамландурғучилири болди. – “Рухани жаңғыру” программиси түпәйли нурғун ишлар әмәлгә ашурулди. Әдәбиятни тәрәққий әткүзүш мәсилисигә чоң диққәт бөлүнүватиду. Қазақстан Язғучилар иттипақидики өзгиришләр әйнә шуниң испатидур, – дәп тәкитлиди тонуштуруш мәрасимида сөзгә чиққан әдәбиятчи Улықбек Есдәулет вә мәзкүр антологияниң бу хилдики ахирқи нәшир әмәс екәнлигигә ишәнчә билдүрди. Нәширни тәйярлаш хелә вақитни алди. Һәрхил жилларда иҗат қилған муәллипләрдин дәсләп 30 иҗаткар таллавелинди. Андин кейин шәхсән Президент әң яхши 13 муәллипни таллиди. Шундақ екән, антологиядә қазақ поэзиясиниң һәқиқәтәнму үнчә-маҗанлири жиғилди, дәп ишәшлик ейтишқа болиду. – Антология мәхсус келәр һәптидә Нур-Султанда өтидиған Азия язғучилириниң тунҗа форумиға тәйярланди. Униңға бирнәччә әвлат иҗаткарларниң талланма әсәрлири киргүзүлди. Топламларниң китапханларниң мунасип баһасиға еришидиғанлиғиға ишинимән, – деди язғучи Әлибек Асқаров. Китапларниң полиграфиялик җәһәттин сүпитиниң наһайити жуқури екәнлигини тәкитләш керәк. Бирақ, әлвәттә, уларниң қиммити әсәрләрниң мәзмунида, сөйүмлүк шаирларниң өлмәс мисралирида. Демәк, әң яхши муәллипләр әсәрлири топлиминиң “Қазақ поэзиясының інжу-маржандары” дәп атилиши тәсадипи әмәс.

436 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы