• 1-сентябрь — Билим күни
• 28 Тамыз, 2019

30-август — Конституция күни

Буниңдин 24 жил илгири, йәни 1995-жили һазир қоллиништики елимизниң Асасий Қануни – Конституция қобул қилинди. Әйнә шу Конституция бүгүн мустәқил Қазақстан Җумһурийитидә қелиплашқан сәясий турақлиқ билән җәмийәтлик разимәнликниң асасиға, елимиз һаятиниң барлиқ саһалириниң йеңилиниши билән тәрәққиятиниң рәмзигә айланди. Сөз йоқ, Конституция Қазақстанда истиқамәт қиливатқан барлиқ милләтләргә әркинлик билән тәңһоқуқлуқниң капалити болғанлиғини дуния әһли толуқ етирап қиливатиду. Җүмлидин, нәқ әйнә шу Конституция түпәйли, елимиздә миллий тилларни тәрәққий әткүзүшниң вә мәдәнийәтни қоллап-қувәтләшниң дөләтлик системиси толуқ шәкиллинип, у нәтиҗидарлиқ ишләватиду. Мәсилән, мәмликитимиз бойичә 88 мәктәптә оқутуш уйғур, өзбәк, таҗик вә украин тиллирида жүргүзүлүватиду, 108 мәктәптә 22 милләтниң тили мустәқил пән сүпитидә оқутулуватиду, 30 милләтниң тилини үгиниш бойичә 190 лингвистикилиқ мәркәз ишләватиду. 15 тилда 35 гезит вә журнал нәшир қилиниватиду вә һаказилар. Дунияда мундақ “көпхиллиқтики бирлик” принципи милләтләрара мунасивәтләр мәсилисидә асас қилип елинған дөләтләр санақлиқла. Әшуларниң бири бизниң мустәқил елимиз – Қазақстан Җумһурийити вә униң Асасий Қануни – Конституциядур. Әйнә шу Конституцияниң нәтиҗидарлиқ ишлиши түпәйли, һазир демократияниң тәмини тетип қалдуқ, өзимизни әркин-азадә һис қилидиған болдуқ, турмуш дәриҗимизму күн санап яхшилиниватиду. Бу елимиздә һечқандақ проблема йоқ дегән мәнани билдүрмәйду. Җәмийитимиз һаятида йеңи, бәзидә тамамән күтмигән һаләт-һадисиләргә дуч келидиған пәйтләрниң йүз бериши еһтималдин жирақ әмәс. Бирақ, ишәнчимиз камилки, у яки бу мәсилә, униң чоң-кичик яки аддий вә муһимлиғидин қәтъий нәзәр, һәммә нәрсә елимиз Конституцияси нормилири асасида һәл қилиниватиду вә кәлгүсидиму шундақ болиду.