• Йеңилиқлар
• 04 Қыркүйек, 2019

Китапхана мутәпәккүр шаир намида аталди

Бийил мурәккәп җөндәш вә сейсмикилиқ күчәйтиштин өткән А.Розибақиев намидики 153-мәктәп-гимназия бенаси өз шагиртлирини йоруқ вә йеңи бенада қизғин күтүвалди. Йеңи оқуш жил башланғанда тәнтәнилик сәп түзүштин кейин мәзкүр гимназиядә йәнә бир чоң мәрасим өтти. Улуқ мутәпәккүр шаир, дөләт әрбаби Йүсүп Хас Һаҗипниң 1000 жиллиқ тәвәллуди һарписида мәктәп китапханиси «Йүсүп Хас Һаҗип намидики китапхана» дәп аталди. Мәрасимға жут мөтивәрлири, зиялилар вә оқуғучилар қатнашти. Китапханиниң рәмзлик лентисини қийиш һөрмити көрнәклик шаир Илахун Җәлиловқа вә классик шаирлиримизниң әсәрлирини кирилл йезиғиға көчәргән милләтпәрвәр инсан Садиқҗан Юнусовқа берилди. Өз новитидә шаир И.Җәлилов өзиниң «Уйғур қирғини» намлиқ йеңи әсәрини соға қилса, С.Юнусов М.Қәшқәрийниң «Дивану луғәтит түрк», Йүсүп Хас Һаҗипниң «Қутадғу билик» әсәрлириниң кирилл йезиғида көчирилгән электронлуқ вариантини вә йеқин-арида нәширдин чиққан, техи тонуштурулуп үлгәрмигән «Қутадғу билик» дастаниниң кирилл йезиғидики уйғурчә нусхисини йеңи китапханиға һәдийә қилғач, миллитиниң келәчиги, җүмлидин оқуғучиларниң пухта билим елиши үчүн кечә-күндүз әмгәк қилишқа тәйяр екәнлигини тәкитлиди. Мәрасим меһманлириға миннәтдарлиқ билдүргән гимназия мудири Шавкәт Өмәров китапханиниң заманивий түс алидиғанлиғини, оқуғучиларниң китапларни электронлуқ түрдә оқуп тәйярлинидиғанлиғини һәққидә ейтип бәрди. Мәрасим ахирида меһманлар Зия Сәмәди намидики вә Мәсүмҗан Зулпиқаров намидики уйғур тили вә әдәбияти кабинетлирини, шундақла мәктәпниң йеңиланған бенасини зиярәт қилди. Гүлминәм ДУГАНОВА, А.Розибақиев намидики 153-мәктәп-гимназияниң муәллими. Алмута шәһири.