• Йеңилиқлар
  • 04 Қыркүйек, 2019

ҚХА: 10 миң оқуғучиға 200 миллион тәңгилик ярдәм көрсәтти

Қазақстан хәлқи Ассамблеяси “Мәктәпкә — йол” җумһурийәтлик акция даирисидә тәминати төвән вә көпбалилиқ аилиләрниң, шундақла ата-ана ғәмхорлуғидин айрилған оқуғучиларға 200 миллион тәңгә көләмидә хәйрихаһлиқ ярдәм көрсәтти. ҚХАниң регионлуқ шөбилири һәр жили иҗтимаий тәминати төвән аилиләр балилириға ярдәм көрситишни әнъәнигә айландурмақта. Август ейидин башлинидиған бу акция сентябрьниң ахириғичә давамлишиду. Бийилму йеңи оқуш жили һарписида әйнә шундақ хәйрихаһлиқ акциягә қатнашқанларниң алдинқи сепидә Алмута шәһири болуватиду. 23-август күни Алмутидики “Достлуқ өйидә” өткән хәйрихаһлиқ акция давамида Қазақстан хәлқи Ассамблеяси Рәисиниң орунбасари Жансейит Түймебаев вә “Ахыска” түрк этномәдәнийәт бирләшмисиниң рәиси Зиятдин Касанов 100 балиға китап-дәптәр, кийим-кечәк соға қилди. Бу тәшәббусни “Қазақстан уйғурлири җумһурийәтлик этномәдәнийәт мәркизи” җәмийәтлик бирләшмисиму қоллап-қувәтлиди. ҖУЭМ бу мәхсәт үчүн 7 миллион 800 миң тәңгә бөлди. Мәсилән, 1300 балиға оқуш қураллири вә мәктәп формилири сетивелинди. Тиҗарәтчи Мизангүл Авамисимова Алмута вилайити Җ.Босақов намидики мәктәпкә парта, орундуқларни һәдийә қилди. Сахавәтлик инсан Модәнгүл Җүмәева Челәк регионидики Т.Кенжебеков намидики мәктәпниң ремонт ишлириға ярдәм бәрди. ҖУЭМ йенидики “Нураний анилар” кеңишиниң рәиси Гүлҗаһан Муратова Алмута шәһири вә Алмута вилайити даирисидә 107 балини мәктәпкә тәйярлиди. Әнди ҖУЭМниң Алмута шәһәрлик шөбиси рәисиниң орунбасари, сахавәтлик инсан Долқунтай Абдухелил 600 оқуғучиға оқуш қураллирини, 200 балиға мәктәп формисини соға қилди. “Мицва” еврей миллий тәшкилатлириниң бирләшмиси 22 балиға 248 600 тәңгилик, “Филия” Қазақстандики грек миллий тәшкилатлириниң бирләшмиси 10 балиға 60 миң тәңгилик, “Наири” әрмән мәдәний мәркизи 100 миң тәңгилик ярдәм көрсәтти. Умумән, Алмута шәһиридики миллий мәдәнийәт мәркәзлириниң көрсәткән хәйрихаһлиқ ярдими 81 миллион 108 миң тәңгини тәшкил қилди. Түркстан вилайитидики миллий этномәдәнийәт мәркәзлириниң бу хәйрихаһлиқ акциягә қошқан үлүшиму зор. Региондики миллий мәдәнийәт мәркәзлириниң вәкиллири 2 миң 68 балиға 30 миллион 560 миң тәңгилик, Қостанай вилайитидә 2 миң 889 балиға 28 миллион 450 миң тәңгилик, Қарағанда вилайитидә 713 балиға 18 миллион 258 миң тәңгилик ярдәм көрситилди. Җамбул вилайитиму бу хәйрихаһлиқ акциягә паал қатнашти. Вилайәт бойичә 928 оқуғучиға 8 миллион 100 миң тәңгилик ярдәм көрситилди. Җүмлидин вилайәтлик өзбәк миллий мәдәнийәт мәркизи, “Немислар җәмийити”, “Барбанг” курд мәдәнийәт мәркизи, “Вынхуа” туңган мәдәнийәт мәркизи, М.Қәшқәрий намидики вилайәтлик Уйғур этномәдәнийәт мәркизи вә башқилар өзлириниң ярдимини айимиди. Шундақла Алмута вилайити бойичә 8 миллион 250 миң тәңгилик, Нур-Султан шәһиридики 20 миллий мәдәнийәт мәркизи 52 балиға 7 миллион тәңгилик, Маңғыстав вилайити 1550 балиға 7 миллион 580 миң тәңгилик, Шәрқий Қазақстан вилайити 350 балиға 5 миллион 565 миң тәңгилик, Павлодар вилайити 1000 оқуғучиға 5 миллион тәңгилик соға қилди. Мошундақ акция Ақтөбә вилайитидиму уюштурулди. ҖУЭМниң Ақтөбә вилайитидики шөбиси 10 балиға 200 миң тәңгә көләмидә ярдәм көрсәтти. Хуласиләп ейтқанда, Қазақстан хәлқи Ассамблеяси мошу күнгә қәдәр “Мәктәпкә — йол” акцияси даирисидә җумһурийәт бойичә 10 миң оқуғучиға 200 миллион тәңгилик ярдәм көрсәтти. Хәйрихаһлиқ акция сентябрь ейиниң ахириғичә давамлишиду.

439 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы