• Җәмийәтлик тәшкилатларда
  • 04 Қыркүйек, 2019

Президент Мәктүби муһакимә қилинди

Бурнакүн Алмута шәһиридики «Достлуқ өйидә» җумһурийәтлик Уйғур этномәдәнийәт мәркизиниң башқарма әзалири, Алмута шәһири вә униң әтрапидики йеза-мәлиләрниң жигитбашлири, ханим-қизлири билән бирқатар җәмийәтлик ишларниң активистлири елимиз Президенти Қасым-Жомарт Тоқаевниң Қазақстан хәлқигә йоллиған «Конструктив җәмийәтлик диалог – Қазақстанниң турақлиғи билән гүллинишиниң асаси» намлиқ Мәктүбини муһакимә қилди. Мәшүр САСИҚОВ, «Уйғур авази» Баш қошушта дәсләп ҖУЭМ рәисиниң биринчи орунбасари, җумһурийәтлик «Уйғур авази» гезитиниң баш муһәррири Ершат Әсмәтов көпчиликкә Мәктүптә көтирилгән мәсилиләр тоғрилиқ әтраплиқ чүшәнчә берип, униңда Президентниң аһалиниң турмуш-тәминатини яхшилашқа алаһидә әһмийәт бәргәнлигини тәкитләп өтти. Болупму натиқ өз сөзидә Мәктүптә елимизниң һәртәрәплимә тәрәққий қилишиға кашила болуватқан айрим һакимийәт орунлиридикиләрниң өз ишиға җавапкәрсизлик билән қариши, җәмийитимиздә «сақаймас ағриқ» аталған парихорлуқ, сот системисидики тәңсизликләр вә башқиму ихтисадий яки иҗтимаий тәрәққиятимизни гиҗиңлаштуруватқанларниң йолини кесишкә қаритилған көплигән мәсилиләрниң көрситилгәнлигини қәйт қилди. Шундақла у Президентниң җумһурийитимиздә илгәркидәкла милләтләрара разимәнликни сақлап қелиш үчүн барлиқ шараитларни яритиш керәклиги һәққидиму ейтқанлиғини тәкитләп, буниң бизгә беридиған пайдисиниң, болупму мәдәнийитимиз билән сәнъитимизни, мәтбуатимиз билән анатиллиқ мәктәплиримизни сақлап қелишимизға яритилған йәнә бир яхши пурсәт екәнлигиниму ейтип өтти. – Демәк, Президентимиз Қасым-Жомарт Кемелоғлиниң кәлгүсидә жүргүзидиған сәясити бизниң миллийлигимизни техиму риваҗландуруп, уни келәчәк әвлатлиримизға тапшурушимизға яритилған тепилмас имканийәт – деди Ершат Моллахуноғли. – Әнди биз пәрзәнтлиримизни ана тилимизда оқутуш, гезит-журналлиримизға муштири болуш, шаир-язғучилиримизниң әсәрлирини сетивелиш вә шуниңға охшаш миллитимиз тәғдиригә мунасивәтлик ишлардин баш тартсақ, мошу пурсәтни қолдин бәргән билән баравәр екәнлиги чоқум. Буниңдин ташқири, Мәктүптә көтирилгән мәсилиләр қазақстанлиқларға пәқәт яхшилиқлар елип келидиғанлиғи ениқ. Чүнки кичик вә оттура тиҗарәт билән шуғуллиниватқанларни мәхсус органларниң кәлсә-кәлмәс тәкшүрүшлири билән айрим селиқлардин азат қилишиға тапшурма бәргәнлигиниң өзи Президентни аддий хәлиқниң әһвали көпирәк ойландуридиғанлиғиниң испати болса керәк. Әнди Мәктүптә аһали өзлирини ойландуридиған яки көңли су ичмәймидиған ишларни очуқ изһар қилиши үчүн Конституциягә мувапиқ, течлиқ намайишларни әркин өткүзүшигә һоқуқи барлиғи тоғрилиқ ейтқанлири демократик дөләтниң асаси екәнлиги ениқ. «Билим сүпитини яхшилаш, йеза егилигини тәрәққий әткүзүш, йеза билән шәһәр арисидики, болупму билим дәргаһлиридики пәриқни йоқитиш бизниң асасий вәзипимиз» деди Президент өз Мәктүбидә. Бу дегинимиз, йеқин-арида елимиздә бу чоң өзгиришләрниң йүз беридиғанлиғини көрситиду. Шуңлашқа бизму өзимиз яшаватқан әлниң қайси тәрәптин болсун, бир қәдәм алға илгирилиши үчүн биркишилик һәссимизни қошушимиз шәрт – деди Ершат Әсмәтов сөзиниң ахирида. Новәттә сөзгә чиққан ҖУЭМ йенидики Қазақстан Уйғур Яшлири Бирлигиниң рәиси Рустәм Хәйриев Мәктүптә көтирилгән яшлар һаятиға мунасивәтлик мәсилиләргә тохтилип, униңда қазақстанлиқ яшларниң өсүп-өрлишигә көплигән йеңилиқларниң моҗут екәнлигини ейтти. У Мәктүптики билим саһасиға қаритилған мәсилиләрниң толиму орунлуқ екәнлигини тәкитләп, буниңдин уйғур яшлириниңму истисна әмәслигини қәйт қилди. Шундақла натиқ беваситә уйғур яшлири билән иш елип бериватқанлиқтин, уларниң арисида Президент Мәктүбини тәшвиқат-тәрғибат қилишқа барлиқ күчини салидиғанлиғиниму тәкитлиди. Умумән, бу күни баш қошуш қатнашқучилири Мәктүп бойичә өзлириниң пикир-мулаһизилири билән ортақлишип, аһали арисида тоғра тәрғибат елип беришкә келишти. Баш қошушқа Алмута шәһәрлик Қазақстан хәлқи Ассамблеяси рәисиниң орунбасари Казбек Мамсуров билән «Достлуқ өйи» мудириниң орунбасари Нурлан Мауленов қатнашти.

66 рет

көрсетілді

0

пікір
Алдыңғы мақала Муһим мәсилиләр қаралди
Келесі мақала Анилар мәйрими

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *