• Йеңилиқлар
• 04 Қыркүйек, 2019

Билим мәсилиси нәзәрдин сирт қалмиди

Дөләт рәһбири Қазақстан хәлқигә йоллиған Мәктүбидә бирқатар муһим мәсилини қараштуруп өтти. Уларниң бири – тил мәсилиси. Қасым-Жомарт Тоқаев Мәктүптә «Елимиздики этникилиқ топларниң тили билән мәдәнийитини тәрәққий әткүзүшкә шараит яритишни давамлаштуруверимиз. Қазақ тилиниң дөләт тили сүпитидики роли күчийип, милләтләрара мунасивәт тилиға айлинидиған дәври келиду дәп һесаплаймән. Бирақ мундақ дәриҗигә йетиш үчүн һәммимиз бирлишип иш елип беришимиз керәк. Шундақла тил чоң сәясәтниң қурали екәнлигиниму унтумиған тоғра», дәп атап өтти. Мәктүптә билим мәсилисиму нәзәрдин сирт қалмиди. Президент билим бериш сүпитини яхшилаш, мутәхәссис тәйярлашниң дөләт системисини йетилдүрүш тоғрилиқ атап өтти. Йеза йәрлиридики қабилийәтлик педагог кадрларниң тапчиллиғини ейтип, «Диплом билән – йезиға» программисиниң даирисини кәңәйтип, ишни йеңи дәриҗидә давамлаштуруш һаҗәтлигини қәйт қилди. Һөкүмәткә әндики жилдин башлап мәзкүр программини мәбләғ билән тәминләшни 20 млрд. тәңгигә йәткүзүшни тапшурди. Қасым-Жомарт Тоқаев шундақла дөләт органлириниң хизмитигә хәлиқ тәрипидин баһа берилиши һаҗәтлигини тәкитләп, йәрлик һакимийәтниң иш-паалийитини баһалаш системисини киргүзүш бойичә лайиһә тәйярлаш мүмкинчилиги тоғрилиқ тохталди. Җәмләп ейтқанда, жуқурида тәкитләнгән мәсилиләр – Мәктүпниң пәқәт азла қисми. Президент хәлиқкә бәргән вәдилирини җәзмән орунлайдиғанлиғиниму ейтип өтти. Демәк, алдимизда чоң өзгиришләр билән көплигән чарә-тәдбирләрниң әмәлгә ашурулуши күтүп турғини ениқ. Маһинур БАҚИЕВА, 101-мәктәп-гимназияниң муәллими. Алмута шәһири.