• Әхбаратлар еқими
• 11 Қыркүйек, 2019

Гимназия меһманлири – ЕБҺТ вәкиллири

Шәмшидин АЮПОВ, «Уйғур авази» Алмута шәһиридики А.Розибақиев намидики 153-мәктәп-гимназия коллективи 2009 – 2010-оқуш жилидин башлап төрт тилда оқутуш услубини җарий қилди. Алаһидә қәйт қилидиған нәрсә, гимназиядә оқуғучилар өзиниң ана тилида сүпәтлик билим елиш билән биллә, қошумчә йәнә үч тилни мукәммәл өзләштүрүватиду. Мәктәп коллективи хелидин бери җумһурийәтлик муәллимләрниң билимини мукәммәлләштүрүш институти, ЕБҺТ вә униң тәркивидики мәктәпләр, шундақла Қазақстан, Қирғизстан, Таҗикстан вә башқиму көплигән мәмликәтләрниң илғар билим бериш мәһкимилири билән қоюқ мунасивәт орнитип, өзара тәҗрибә алмаштуруп келиватиду. Билим бериш сүпитини көтиришкә алаһидә диққәт бөлүнди. Мустәқиллик жиллири уйғур гимназиясидин 25 учумкарниң «Алтун бәлгүгә» еришиши, шәһәр бойичә уда үч қетим «Әң яхши мәктәп» атиғиға егә болуши, БМТ көрсәткүчлири бойичә, 2016-жили Алмута шәһири бойичә әң илғар бәш мәктәпниң қатариға кириши, ахирқи он жилда барлиқ учумкарларниң 70 пайизи алий оқуш орунлириға чүшүши, бу, әлвәттә, мәктәп коллективиниң иҗадий издинишиниң нәтиҗисидур. Мана мошу мәсилиләр әтрапида һәм көптиллиқ оқутуш услуби, мошу йөнилиштә елип берилгән илғар тәҗрибиләр һәм униң әвзәллиги вә башқиму маарип саһасиға аит түгүнлүк мәсилиләр өткән һәптидә мәзкүр билим дәргаһиға қәдәм тәшрип қилған ЕБҺТ делегацияси вә «Өрлеу» «Билимни мукәммәлләштүрүш миллий мәркизи» акционерлиқ җәмийитиниң вәкиллири билән болған учришиш җәриянида гимназия мудири Шавкәт Өмәров қисқичә чүшәнчә бәрди. Баш қошушта сөз новитини алған ЕБҺТ Азсанлиқ милләтләр ишлири бойичә Алий комиссари Ламберто Заньер өзлирини хуш чирай күтүвалған гимназия коллективиға вә ушбу учришишқа қатнишиватқан уйғур зиялилириға миннәтдарлиғини билдүрди. Андин натиқ көп тилда билим бериш алаһидиликлири, оқуғучиларниң билим елишқа болған интилиши, мошу йөнилиштә әмәлгә ашурулуватқан лайиһиләрниң нәтиҗидарлиғи вә әһмийити тоғрилиқ қисқичә тохтилип өтти вә гимназия коллективиниң кәлгүсидиму утуқлуқ паа­лийәт елип беришиға тиләкдашлиқ билдүрди. Шуниңдин кейин сөз тизгинини қолға алған гимназия йенида тәшкил қилинған Васийлиқ кеңишиниң рәиси, ихтисат пәнлириниң доктори Һакимҗан Арупов, «Уйғур авази» гезитиниң баш муһәррири, ҖУЭМ рәисиниң орунбасари Ершат Әсмәтов, «Туран дунияси» җәмийәтлик фондиниң мудири Карлин Мәхпиров вә «Өрлеу» «Билимни мукәммәлләштүрүш миллий мәркизи» акционерлиқ җәмийитиниң башқарма рәиси Гүльнас Ахметова бүгүнки учришишниң һәқиқәтәнму муһим әһмийәткә егә екәнлигигә тохталди вә 153-мәктәп-гимназияниң әмәлгә ашуруватқан ишлирини мәмнунийәт билән тилға елишқа әрзийдиғанлиғини алаһидә қәйт қилди. Өз новитидә чәтәллик меһманлар көптиллиқ билим бериш услуби, ана тилиниң қоллиниш даириси, уйғур тилида чиқиватқан дәрисликләргә болған еһтияҗ вә башқиму өзлирини қизиқтурған соалларни қоюп, лайиқ җавапларни алди. Учришиш ахирида гимназия мудири, Қазақстан маарип әлачиси, Алмута шәһәрлик мәслиһәтниң депутати Шавкәт Өмәров мәрасим иштракчилириға, коллективниң һәм шундақ­ла өзиниң намиға иллиқ тиләклирини изһар қил­ғанлиғи үчүн меһманларға миннәт­дарлиқ билдүрди.