• Йеңилиқлар
• 11 Қыркүйек, 2019

Йеңи вәзипиләр ениқланди

Президент Қасым-Жомарт Тоқаевниң Қазақстан хәлқигә йоллиған «Конструктив җәмийәтлик диалог — Қазақстанниң турақлиқлиғи вә гүллинишиниң асаси» намлиқ Мәктүби елимиз тәрәққиятиниң йеқинқи келәчәктики асасий йөнилишлирини ениқлап бәргән муһим сәясий һөҗҗәттур. Дөләт рәһбири Мәктүптә тәрәққиятниң асасий әвзәлликлирини бәлгүләп, дуниядики ихтисадий, сәясий вә мәнивий боһран дәвридә елимизниң келәчигиниң ениқ йоллирини көрситип бәрди. Бу муһим һөҗҗәттә мәмликитимизниң ихтисадий тәрәққиятила әмәс, шундақла иҗтимаий әһвални яхшилаш, дөләт органлириниң паалийитиниң сүпитини көтириш, билим вә илим-пәнни тәрәққий әткүзүш, мәнивий йеңилиниш вә башқиму әһмийәтлик мәсилиләрниң көтирилгәнлиги хошал қилиду. Президент билим вә илим-пәнгә алаһидә көңүл бөлмәктә. «Биринчи новәттә, билим бериш системисиниң ролини өзгәртиш лазим. Бизниң вәзипимиз — оқуғучилар қабилийитини ениқлап, кәспий йөнилиш бериш сәяситигә көчүшимиз керәк. Оқуш программилирини тәнқидий ойлаш қабилийитини вә өз алдиға издиниш маһаритини тәрәққий әткүзүшкә қаритилиши лазим. Шуниң билән биллә ІТ-саһасидики билимни, малийә саватини қелиплаштурушқа, милләтпәрвәрлик һис-туйғуда тәрбийиләшкә алаһидә көңүл бөлүш керәк. Шәһәр билән йеза мәктәплири арисидики билим бериш сүпитиниң жирақлиғини азайтиш лазим», дәп тәкитлиди. Дөләт рәһбириниң «Дипломмен — ауылға» программиси даирисини кәңәйтип, мәбләғ билән тәминләшни ашуруп, уни йеңи дәриҗигә көтириши билим саһасини йеңилашқа йеңи сүръәт бериватқанлиғини көрситиду. Мәзкүр программа йеза турғунлирини қоллап-қувәтләштә муһим роль ойнайдиғини ениқ. Демәк, Мәктүптә сөз болған вәзипиләр елимизниң билим вә илим-пән саһасини тәрәққий әткүзүшкә йеңи имканийәтләрни яритиду. Меһирдин ХОҖАЕВ, Түгмән оттура мәктивиниң мудири. Уйғур наһийәси.