• Йеңилиқлар
• 11 Қыркүйек, 2019

Вәзипимиз ениқ, пәқәт ишләш керәк

Сабирәм ӘНВӘРОВА, «Уйғур авази» Мәлумки, Дөләт рәһбири Қасым-Жомарт Тоқаев Қазақстан хәлқигә «Конструктив җәмийәтлик диалог – Қазақстанниң турақлиқлиғи вә гүллинишиниң асаси» намлиқ дәсләпки Мәктүбини йоллиди. Шуниңға бағлиқ, йеқинда Уйғур наһийәлик һакимийәтниң мәҗлисләр залида актив жиғини болуп өтти. Униңға мәһкимә рәһбәрлири, наһийәлик мәслиһәтниң депутатлири, «Nur Otan» партияси наһийәлик шөбисиниң вәкиллири, йеза округлириниң һакимлири вә җәмийәтлик тәшкилатлар билән наһийә турғунлири қатнашти. Жиғинни Уйғур наһийәсиниң һакими Шөһрәт Нурахунов киришмә сөз билән ечип, Қазақстан Президенти Қасым-Жомарт Тоқаевниң Қазақстан хәлқигә йоллиған Мәктүбидә бәлгүләнгән тапшурмиларни әмәлгә ашуруш бойичә наһийәниң ижраий органлириниң хизмити тоғрилиқ тохталди. Натиқ Мәктүптә алға сүрүлгән ениқ вәзипиләрни атап өтүп, һәрбиригә айрим-айрим тохталди вә наһийәдә атқурулидиған ишларниң реҗиси билән тонуштурди. Ениғирақ ейтсақ, йеза һакимлириға иҗтимаий торларға тиркилип, турғунлар билән қоюқ мунасивәт орнитишни тапшурди. Шундақла наһийә һакими технологияләр тәрәққий әткән бүгүнки заманда, қолда бар имканийәтни дурус пайдилинип, иҗтимаий тордики хәлиқниң ой-пикригә җававән иш елип беришни җекиди. Наһийәниң ихтисадий әһвалини яхшилаш үчүн, умумән, мәһсулатниң көләмигә селинидиған инвестиция көләмини жилда 30 пайизға өстүрүш вә экспортлинидиған мәһсулатларға (гөш, абрикос, тоху гөши в.б) көпирәк көңүл бөлүш һаҗәтлигини ейтти. «Ауыл – ел бесігі» лайиһиси билән «Диплом билән йезиға», «Бәхитлик аилә» программилириниң маһийитигә тохталған наһийә һакими иҗтимаий ярдәмниң униңға һәқиқәтән муһтаҗ аилиләргила берилиши керәклигини әскәртти. Шөһрәт Турдахуноғли сөзиниң ахирида орунбасари А.Хусуровқа, тиҗарәтчиләр бөлүмигә вә йезилиқ округ һакимлириға тиҗарәтчиләрни қоллап-қувәтләшни; йәр мунасивәтлири бөлүмигә наһийәдә өзләштүрүлмигән йәрләрни қайтуруш үчүн тез-арида җиддий чариләрни қолға елишни тапшурди. Президент илгири «Педагог мәртивиси тоғрилиқ» Қанун асасида алдики төрт жилда муәллимләрниң мааши икки һәссигә өсидиғанлиғини ейтқан еди. Наһийә һакимидин кейин сөзгә чиққан М.Һәмраев намидики оттура мәктәпниң қазақ тили пәниниң муәллими Гүлнара Мансурова Мәктүптики билим саһасиға аит өзгиришләрни тилға алди. Хулләс, Мәктүпкә мунасивәтлик ой-пикри билән бөлүшкәнләр қатарида Қирғизсай йеза округи җәмийәтлик разимәнлик кеңишиниң рәиси Нурғалиқ Қисаев, наһийәлик ағриқхана баш врачиниң орунбасари Әнвәр Рашитов болди. У «Президент бу Мәктүбидә ана вә бала саламәтлигини яхшилаш һәққидә вә ана билән бала өлүмигә мунасивәтлик көрсәткүчләрниң регионлуқ тәңпуңсизлиғини, елимиздә ана вә бала өлүминиң тәрәққий әткән дөләтләр дәриҗисидин жуқури екәнлигини тәкитлиди. Демәк, биз, саһа мутәхәссислири, мошу мәсилиләрниң алдини елиш мәхситидә хизмәт қилишқа тегишликмиз», деди вә адәм һаятиға мәсъул медицина мутәхәссислириниң әл үмүтини ақлашқа күч-ғәйритини сәрип қилидиғанлиғиға ишәндүрди. Әнвәр Пидаҗаноғлиниң сөзидин кейин Чонҗа йезилиқ ақсақаллар кеңишиниң рәиси Сәйдәхмәт Қасимовтин «Тез ярдәм» хизмитиниң мәркәзләштүрүлгәнлигигә бағлиқ соал келип чүшти. Очуғини ейтсақ, наһийәләрдики «Тез ярдәм» хизмити вилайәтниң тәркивигә өткәнликтин, хизмәт көрситиш бойичә наһийәдә бирқатар қийинчилиқлар орун алған еди. Наһийә һакими турғунлар наразилиғиниң орунлуқ екәнлигини ейтип, мәркизий ағриқхана рәһбәрлиригә бу мәсилини тез арида һәл қилишни тапшурди. Шундақла бу мәсилә иҗабий һәл болғичә, наһийә турғунлириниң тез ярдәм хизмитини чақириш үчүн 2-24-04 номериға хәвәрлишәләйдиғанлиғини чүшәндүрди. – Һәқиқити шуки, Мәктүптин пәқәт пенсия билән маашниң өскәнлигини күтүп, шуниңға лайиқ хизмәттики җавапкәрлигимизниңму көпәйгәнлигини һис қилип кәтмәймиз. Һөкүмәткә алиқан йейиш үчүнму шуниңға әрзийдиғандәк хизмәт қилишимиз керәк, – деди наһийәлик мәслиһәтниң кативи Нурәким Есжан. Натиқ шундақла Мәктүптә ейтилған җәмийәтлик разимәнликни күчәйтиш, милләтләрара инақлиқни сақлаш мәсилилиригә әтраплиқ тохталди.