• Йеңилиқлар
• 11 Қыркүйек, 2019

Меһриван жүрәкләр ениқланди

Панфилов наһийәлик Мәдәнийәт өйидә болуп өткән мәрасимда «Жомарт жүрек» лайиһиси бойичә лауреатлар мукапатланди. Тәкитләш керәкки, елимизниң Тунҗа Президенти — Елбасы Нурсултан Назарбаевниң «Келәчәккә нишан: мәнивий йеңилиниш» мақалиси даирисидә бу лайиһә регионларниң тәрәққиятиға үлүш қошуватқан һамийларни, тиҗарәтчиләрни, пидаийларни рәғбәтләндүрүшниң бир шәкли. Гөһәрбүви ИСМАЙИЛҖАНОВА, «Уйғур авази» Шундақ екән, Панфилов наһийәсидә бу мәхсәттә паалийәт жүргүзүватқан тиҗарәтчиләр аз әмәс. Улар тоғрилиқ наһийә һакими Темирлан Бектасов алаһидә тохтилип, хәйрихаһлиқ паалийитигә жуқури баһа берип, мундақ деди: – Наһийәдики тиҗарәтчиләрниң һамийлиқ, хәйрихаһлиқ паалийитиниң нәтиҗисидә 20дин ошуқ көпбалилиқ, аз тәминләнгән аилиләр әзалириға турушлуқ өйләр селинип, соға қилинди. Йеза-авулларға мечитлар селинди. Өсмүрләр мәктәпкә берип оқуши үчүн керәклик кийим-кечәк, оқуш қураллири билән тәминләнди. Бу ишта тәвәдики тиҗарәтчиләрниң, тәдбирчан ханим-қизларниң тапқининиң бир қисмини муһтаҗларға сәрип қилип, қол учини берип, дайим яр-йөләк болуватқанларниң исмини аташқа һәқлиқмиз. Уларға миннәтдарлиғимиз чәксиз. Чүнки улар яхшилиқ қилишқа яралған. Шуниңдин кейин тиҗарәтчиләр һәрхил номинацияләр бойичә мукапатланди. Уларниң арисида «Ернар» дехан егилигиниң рәһбири Тасқын Жапарқүл, Алмута вилайәтлик мәслиһәтниң депутати Закирҗан Қузиев рәһбәрлик қиливатқан «Универсал» ҖЧЙ, «Ғоҗамбәрдиев» дехан егилигиниң рәиси, наһийәлик мәслиһәтниң депутати Адилҗан Ғоҗамбәрдиев бар. Әнди тиҗарәтчиләр Гүлнар Ақсубаева билән Сүрийәм Һезимова болса, Пәхрий ярлиқ билән мукапатланди. Меһриван жүрәкләрни тәбрикләш мәрасиминиң ахири наһийә сәнъәткарлириниң концертиға улашти. Панфилов наһийәси.