• Асасий мақалилар
• 19 Қыркүйек, 2019

Президент Ақмола вә Шималий Қазақстан вилайәтлиридә болди

Ақмола вилайитигә иш бабидики сәпәр билән кәлгән Дөләт рәһбири Қасым-Жомарт Тоқаев Жақсы наһийәсидики “Айбат” ҖЧЙниң етизлиқлирини арилап, һосул жиғиш мәвсүминиң җәрияни билән тонушти. Қазақстан Президентиға вилайәтниң иҗтимаий-ихтисадий тәрәққиятиниң асасий көрсәткүчлири билән агросанаәт комплексиниң келәчиги тоғрилиқ мәлумат берилди. Дөләт рәһбири механизаторлар билән сөһбәтләшкәндә, йеза егилиги мәйданлирини нәтиҗидар пайдилинишниң әһмийитини тәкитләп, дөләт тәрипидин агросанаәт комплексини риваҗландурушқа алаһидә көңүл бөлүнүватқанлиғини ейтти. – Мәмликитимиз үчүн силәрниң әмгигиңларниң әһмийити зор. Һөкүмәт фермерларни һәртәрәплимә қоллап-қувәтләйду, йеза һаятиниң сүпитини ашуруш бойичә чарә-тәдбирләр қобул қилиниду, – деди Президент. Учришиш ахирида Қасым-Жомарт Тоқаев деханларға утуқлар тилиди. Дөләт рәһбири шуниңдин кейин Жақсы йезисидики Т.Уәлиев намидики спорт мәктивини зиярәт қилди. Қазақстан Президентиға күрәш, бокс вә футболға беғишланған заллар көрситилди. Дөләт рәһбири шундақла “Урожай” ҖЧЙниң агросанаәт комплексида болди. Президентқа бу йәрдә ширкәтниң паалийити, түгмән комплексиниң, элеваторниң, комбикором заводиниң вә нан-тоғач мәһсулатлирини чиқириш бойичә санаәт объектлириниң ишлири тонуштурулди. Дөләт рәһбири деханларға дөләт тәрипидин бөлүнгән йеза егилиги субсидиялирини нәтиҗидар пайдилинишниң әһмийитини тәкитлиди. *** Шу күни Президент Шималий Қазақстан вилайитигә келип, сәпирини Аққайын наһийәсиниң Рублевка йезисидики “Иван Зенченко” ҖЧЙдин башлиди. Қазақстан Президенти сүт мәһсулатлири чиқирилидиған ферминиң иши билән тонушуп, ашлиқ жиғиливатқан етизларни арилап чиқти вә механизаторлар билән учрашти. Сәпәр давамида Шималий Қазақстан вилайитиниң һакими Қумар Ақсақалов Дөләт рәһбиригә регионниң агросанаәт комплексиниң тәрәққияти һәққидә әхбарат бәрди. Санаәт орниниң мудири Геннадий Зенченко Президентқа ишләп чиқириливатқан мәһсулатлар, уларниң баһаси, шуниң ичидә Россиягә экспортқа чиқириватқанлиғи һәққидә ейтип бәрди. Шундақла ширкәтниң йезидики иҗтимаий саһани тәрәққий әткүзүшкә алаһидә көңүл бөлүватқанлиғиниму тәкитлиди. Қасым-Жомарт Тоқаев мәзкүр санаәт орниниң иши вә ихтисадий-иҗтимаий вәзипиләрни һәл қилишқа қошқан төһписини жуқури баһалиди. Дөләт рәһбири шу күни йезини вә агросанаәт комплексини тәрәққий әткүзүш бойичә кеңәшмә өткүзди. Президент агросанаәт комплексини тәрәққий әткүзүштә ениқ мәсилиләрниң бар екәнлигини тәкитләп, һөкүмәт вә йәрлик иҗраий органларниң алдиға бирқатар мәсилиләрни жүклиди. – Һөкүмәт агрохимия саһасини риваҗландуруш, гербицидларниң, минерал оғутларниң вә элитилиқ уруқларниң қолйетимликлигини тәминләш бойичә қарарларни қобул қилиши лазим, – деди Президент. Президент барлиқ йеза егилиги йәрлириниң һесавини елиш ишини аяқлаштурушниң, йәр кадастрини рәқәмләштүрүшниң вә йәрләрниң пайдилинишини космослуқ мониторинг қилиш арқилиқ ениқлашқа көчүшниң әһмийитигә алаһидә тохталди. Қасым-Жомарт Тоқаев елимизниң қайта ишлиниватқан мәһсулатлири ташқи базарларда тосалғуларға дучар болуватқанлиғини ейтти. Мошуниңға мунасивәтлик Дөләт рәһбири вәтәнлик товарларни мәхсәтлик рәвиштә илгирилитишни вә чәтәллик шерикләрдики өзгиришләргә дәрһал риайә қилишни тапшурди. Җумһурийәтлик кеңәшмә давамида Йеза егилиги министри Сапархан Омаров, “Зенченко и К” ҖЧЙ мудири Геннадий Зенченко, “Агрофирма “Родина” ҖЧЙниң баш мудири Иван Сауэр, “ҚазЭкспортАстық” акционерлиқ җәмийити мудирлар кеңишиниң рәиси Руслан Молдабеков, С.Сейфуллин намидики Қазақ агротехникилиқ университетиниң ректори Ақылбек Күришбай, “Bioperations” ҖЧЙниң асасчиси Әлихан Талғатбек докладлар оқуди. Президент вилайәткә болған сәпириниң ахирида С.Киров намидики заводни зиярәт қилди.