• Йеңилиқлар
  • 05 Қазан, 2012

Шагирт билән баһалинар устаз әмгиги

Малик Хәйруллин Челәк йезисидики 7-кәспий билим бериш лицейида узун жиллардин бу ян яш әвлатқа тарих вә җәмийәтшунаслиқ пәнлири бойичә билим берип келиватиду. У шундақла бош вақтини үнүмлүк пайдилинип, җәмийәтлик асаста халиғучиларни спортниң бокс түри бойичә мәшиқләндүрүп кәлмәктә. У спорт йолиниң бу түригә оттура мәктәптә оқуп жүргән чағлиридин тартипла иштияқ бағлиған еди. Балтиқ бойида һәрбий хизмитини өтигән вә Қазақстан Миллий университетида тәһсил көргән мәзгиллиридиму мәшиқлиништин ялиқмиди. Әксичә, у Балтиқ деңизи бойида өткүзүлгән мусабиқиларға қатнишип, яш деңизчилар арисида бир нәччә дүркүн чемпион аталған болса, әнди студент жиллири Қазақстан чемпиони, Пүткүл иттипақлиқ турнирларниң ғалиби атилип, «СССР спорт маһири»  болди. Маликниң мошу лицей бенасида өзиниң барлиқ билими билән тәҗрибисини сәрип қилған һалда, мәшиқләндүрүватқан шагиртлири — наһийә, вилайәт, һәтта җумһурийәт даирисидә муваппәқийәт қазинип, устаз әҗрини ақлимақта. Җүмлидин у тәшкил қилған команда 1982-жили Павлодар шәһиридә өткән 19 вилайәт вә Алмута шәһириниң спортчилири бәс-бәскә чүшкән кәспий-техникилиқ билим бериш саһалириниң ІІІ спартакиадиси  командилиқ һесапта 4-орунни егиләйду. Әнди Қостанай шәһиридә өткән оқуғучилар спартакиадисида М.Хәйруллинниң шагиртлири Қ.Саматов ІІ вә В.Шихиди ІІІ орунни егиләп, устазини чәксиз рази қилди. Реһимҗан Мәмиров болса, җумһурийәтлик ІІІ яшлар мусабиқисиға қатнишип, ІІІ орунни йеңивалди вә Москва шәһиридә өткән дуния йүзлүк Яшлар фестивалиға йолланма алған еди. Тәҗрибилик боксчидин тәлим алған ака-ука Адилҗан вә Юнус Мухтаев, Сидиқ вә Садиқ Терликбаев, Әзиз, Һезимҗан, Шавкәт Һезбақиевлар билән Айдос Әкимбеков вә Рустәм Батталов бу күнләрдә җумһурийәтлик, хәлиқара турнирларниң ғалиплири. Шагиртлириниң муваппәқийәтлиридин илһамланған устаз бу күнләрдә өзиниң 60 яшқа келип қалғанлиғиға қаримай, йеза яшлирини мәшиқләндүрүш ишини техиму җанландурмақчи. Униң өмүрлүк җүпти Гүлнарә Һашимова тиббий хадим. Улар икки оғулни чоң қилип, қатарға қошуватиду. Чоң оғли Данияр Алмутидики бенакарлиқ-қурулуш академиясини қизил диплом билән тамамлап, шәһәрлик һакимийәтниң мемарчилиқ бөлүмидә баш мутәхәссис болуп ишләватиду. Кәнҗә оғли Бәхтияр оттура мәктәпни тамамлаш алдида туриду. Пурсәттин пайдилинип, биз униңға шагиртлириң көпийивәрсун, чиқар пәллиләр техиму йүксәк болсун, демәкчимиз.

Бәкрәм САБИТОВ.

Әмгәкчиқазақ наһийәси.   

179 рет

көрсетілді

0

пікір
Алдыңғы мақала Ата-аниларға ейтарим бар
Келесі мақала Салаһийитиңларни сақлап қелиңлар

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *