• Әхбаратлар еқими
• 03 Қазан, 2019

Әмгиги шагиртлирида намайән

Бу һаятта кәсип түрлири нурғун. Һәтта заман тәливигә мувапиқ күндин-күнгә йеңи мутәхәссисликләр пәйда болмақта. Шундиму, нәччә әсирләр өтсиму, заман йеңилансиму, өз қәдир-қиммитини йоқатмиған кәсипләрниң шаһи – устазлиқ. Чүнки әл башқурған ханму, саламәтлик сақчиси һесаплинидиған дохтурму, асман-пеләк беналарниң бәрпакари болған қурулушчиму, қисқиси, ким болушидин қәтъий нәзәр, һәммиси муәллимдин тәлим алиду. Йәни һәрқайсимизниң җәмийәткә ярамлиқ шәхс болуп йетилишимиз, асасән, мәктәптә берилидиған тәлим-тәрбийигә бағлиқтур. Шундақ екән, “Билим бағвини” һесаплинидиған устазларниң әҗри алдида һәммимиз баш егимиз. Сабирәм ӘНВӘРОВА, Уйғур авази Устазлар мәйрими йеқинлашқанда, әмгиги бебаһа кәсип егилириниң барлиғи һәққидә сөз қозғиғиң келиду. Чүнки уларниң хизмити һәқиқәтән мәдһийигә лайиқ. Лекин бир мақалә арқилиқ Уйғур наһийәсидики 33 билим дәргаһида тәр төкүватқан муәллимләрниң һәммиси һәққидә йезип чиқиш мүмкин әмәс. Амма бир устазниң әмгәк йолини мисалға елип, барчә муәллимләрниң җапалиқ хизмити һәққидә қәләм тәвритип, уларға һөрмәт көрситишкә болиду. Хош, бүгүнки мақалимизниң баш қәһримани – 33 жилдин буян маарип саһасида әмгәк қиливатқан устаз Турдибүви Әхмәтовадур. Турдибүви Һасанқизи 1963-жили Уйғур наһийәсиниң Ават йезисида көпбалилиқ аилидә дунияға кәлгән. Ата-аниси кичигидин тунҗисиниң устаз болушини халапту. Болупму, атиси Һасан қизиниң келәчәктә тарихчи болидиғанлиғиға камил ишинәттекән. Биринчидин, Алланиң хаһиши, иккинчидин, атиниң тилиги орунлинип, Турдибүви оттура мәктәпни әла баһаларға тамамлап, Хәшкиләң шәһиридики педагогларни тәйярлайдиған училищеға оқушқа чүшиду. Мәзкүр билим дәргаһини 1986-жили тамамлап, Ават йезисидики балилар бағчисида тәрбийичи сүпитидә дәсләпки иш-паалийитини башлайду. 1994-жилғичә бағчида әмгәк қилған яш мутәхәссис билимини техиму мукәммәлләштүрүш үчүн 2000-жили Яркәнт шәһиридики педагогика колледжини тамамлайду. Андин ата үмүтини йәрдә қоймаслиқ үчүн Қазақ миллий қизлар педагогика институтиниң «Тарих вә һоқуқ асаслири» факультетида тәһсил көриду. 2015 – 2017-жиллири Җәнубий Қазақстан педагогика университетини сирттин оқуп, психолог мутәхәссислигини егиләп чиқиду. Дәсләпки әмгәк паалийитини балилар бағчисидин башлиған Турдибүви Һасанқизи устазлиқ паалийитини Қирғизсай оттура мәктивидә давамлаштуриду. Оттуз үч жиллиқ иш-паалийитидә мол тәҗрибә топлиған педагог-психологниң әмгиги мунасип баһалинип, наһийәлик һәм вилайәтлик билим бөлүмлириниң вә Nur Otan партиясиниң пәхрий ярлиқлири билән тәғдирләнди. Тәкитләш керәкки, Турдибүви Һасанқизи җәмийәтлик ишларниң тәшәббускари сүпитидә көзгә чүшүп, жут ичидики мәдәний чарә- тәдбирләргә паал қатнишиду һәм у мәктәптики Nur Otan партияси башланғуч тәшкилатиниң кативи вәзиписини атқуриду. Әлвәттә, жилларни җүмлигә қачилап, қәғәзгә чүшәрмәк асан. Амма шу жилларға көмүлгән меһнәтни сөз билән йәткүзүш әсла мүмкин әмәс. «Алтунниң қәдрини зәргар билиду» демәкчи, устазниң әмгигини пәқәт устазларла яхши чүшиниду. Бор билән тахтини, қәләм билән қәғәзни гүлләйдиған билим саһасиниң бағвәнлириниң әмгиги арқилиқ пәқәт бир милләтниңла әмәс, бәлки пүтүн бир әлниң тәғдири һәл қилиниду әмәсму! Хулләс, мана шундақ қизиғиму, қийинчилиғиму мол кәсиптә тәр төкүп, шагиртлириниң иккинчи анисиға айланған Турдибүви Һасанқизи аилисидә икки пәрзәнтниң аниси. Уларни җәмийәткә ярамлиқ шәхс қилип тәрбийиләп, қатарға қошқан ана бүгүнки күндә 4 нәврә қучуп, бағриға бесипту. «Инсанниң нәччә жил ишлигәнлиги, қандақ лавазимларда әмгәк қилғанлиғи әтивалиқ әмәс, муһими, хәлиқ үчүн, әл үчүн төккән тәриниң мевә бериши» дәйду Турдибүви Һасанқизи.