• Китап – билим булиғи
• 10 Қазан, 2019

Китап дуниясиға сәяһәт

«Яшлар жили» даирисидә җумһурийәт дәриҗисидә дәсләпки қетим «Китапхана дунияси – яшлар истиқбали билән әмәлгә ашурулидиған мүмкинчиликләр макани» мавзусида яш китапханичиларниң 1-слети болуп өтти. Шәмшидин АЮПОВ, «Уйғур авази» Мәзкүр чарә-тәдбирни Нака вә начар көридиғанларға беғишланған җумһурийәтлик китапхана уюштурди. Асасий мәхсәт – яш мутәхәссисләрниң иҗадий қабилийитини ениқлаш, ушба саһада йеңи услубларни өзләштүрүш, коллективта позитивлиқ иш тәртивини шәкилләндүрүш, китапханичиларниң өзара тәҗрибә алмаштуруп, билимини мукәммәлләштүрүш. Икки күн давамлашқан китапханичилар слетида вилайәтлик, шәһәрлик мәхсус китапханилар билән мәхсус бөлүмләрниң рәһбәрлири бирқатар мәсилиләрни муһакимә қилди. Мутәхәссисләрниң тәкитлишичә, Қазақстан бойичә накаларға 1 җумһурийәтлик, 9 вилайәтлик, 5 шәһәрлик китапхана билән 2 китапханилиқ бөлүм хизмәт көрситидекән. Мәрасим җәриянида «Җәмийәт трансформацияси – китапханилар трансформацияси», «Һазирқи җәмийәттики китапханиларниң инновациялик хизмити» мавзусида маһарәт дәрислири өткүзүлүп, «Китапхана – мәнавият макани» намлиқ көргәзмә уюштурулди. Слетқа қатнашқанлар накаларниң еһтияҗиға қарап пайдилиқ мәлуматларни топлап, билимини мукәммәлләштүрүшкә йеқиндин ярдәм көрсәтти. *** Мәлумки, китапханичиниң иши интайин еғир. Әтидин-кәчкичә топа-чаңниң ичидә жүриду. Бирақ алидиған мааши интайин аз. Шуңлашқа Президентимиз Қасым-Жомарт Тоқаев өзиниң қазақстанлиқларға йоллиған «Конструктив җәмийәтлик диалог – Қазақстанниң турақлиқлиғи вә гүллинишиниң асаси» намлиқ Мәктүбидә башқа саһалар билән биллә мәдәнийәт саһасиниң проблемилириғиму алаһидә тохталди. «Биз мәдәнийәт саһасида ишләватқан гражданларға йетәрлик дәриҗидә көңүл бөлмәйватимиз», деди Президент. – Бу – әң алди билән китапхана, мирасгаһ, театр хадимлириға мунасивәтлик мәсилә. Уларниң мааши кейинки жиллири тамамән көпәймиди. Шуниң ақивитидин мәдәнийәт хадимлири, болупму яш мутәхәссисләр йеникчилиги бар турушлуқ өй программилириға қатнишалмайду. Мошундақ әһвал мошу кәсипниң абройини чүширип, мунасип кадрларниң тапчиллиғи ениқ сезилмәктә. Келәр жилдин башлап Һөкүмәт мәдәнийәт хадимлириниң маашини көтириши лазим». Дәрһәқиқәт, қанчә мааш елишидин қәтъий нәзәр, мәдәнийәт хадими, җүмлидин китапханичи һәқиқәтәнму һөрмәткә лайиқ. Шуңлашқа Президент Мәктүбидә қәйт қилинғинидәк, мәҗбурий иҗтимаий йеникчиликләр мәдәнийәт саһасиниң вәкиллиригиму җәзмән берилиши керәк. Ойлаймизки, Мәктүптә ейтилған сөз ейтилған йеридила қалмайду.