• Спорт
  • 10 Қазан, 2019

Кәрим ғалибийәт билән қайтти

Йеқинда Орал шәһиридә «OCTAGON PROMOTІON» промоутер ширкити Ғәрбий Қазақстан вилайити һакимийитиниң қоллап-қувәтлиши билән спортниң арилаш йәкму-йәк түри (MMA) бойичә хәлиқара турнир болуп өтти. Униңға «BLSG ROUP» ширкити һамийлиқ қилди. Рашидәм РӘҺМАНОВА, «Уйғур авази» Орал шәһири күнигә беғишланған турнирниң тәнтәнилик ечилиш мәрасимиға шәһәр һакими Абат Шыныбеков иштрак қилип, спортчиларға утуқ тилиди һәм бу оюнларниң башқиму көплигән яшларниң сағлам һаят тәризини бойиға сиңдүрүшигә сәвәп болушидин үмүтлинидиғанлиғини ейтти. Мәзкүр турнирға Россия, Украина, Әрмәнстан, Қирғизстан, Өзбәкстан вә Қазақстандин палванлар, җүмлидин Алмута вилайитидин Әмгәкчиқазақ наһийәсигә қарашлиқ Әмгәк йезисиниң турғуни Кәрим Розибақиевму қатнашти. Арилаш йәкму-йәк һүнири һәртәрәплимә тәйярлиқ вә җисманий чиниқишни тәләп қилиду. Өзини «Бейбарыс» дәп атиған 19 яшлиқ Кәрим 93 кг. салмақ категорияси бойичә ғәрбийқазақстанлиқ Евгений Назаров билән финалда күч синашти. 12 йешидин спорт билән үзмәй шуғуллинип келиватқан уйғур жигити рәқивини нокаутқа чүширип, ғалибийәт қазанди. Мана мошундақ утуқ билән йезиға қайтқан Кәримни момиси Разийәм, ата-аниси Пәрһат вә Нафиса билән биллә устазлири вә жутдашлири күтүвалди. Әмгәк оттура мәктивиниң илмий мудири Мәди Қағазбаев, Кәримниң устазлири Болат Нурғазиев вә Алтын Атантаева, жутниң жигитбеши Ташмәһәмәт Һүсәйинов, Ханим-қизлар кеңишиниң рәиси Турсунай Сопиева, «Нур-Агро» җавапкәрлиги чәкләнгән йолдашлиғиниң мудири Кәрим Худайбәрдиев, мәшиқләндүргүчиси Муқан Яшманов вә башқилар жутдишини новәттики ғалибийити билән тәбрикләп, униңға атиған соғилирини тапшурди. Кәрим – бовиси Һезиз билән момиси Разийәмниң қолида чоң болди. Бала туғулғанда униң дадиси Пәрһат «Нур-Агро» ҖЧЙда ишлигән екән. Йолдашлиқниң мудири, физик-алим Кәрим Қурваноғли аилиниң бу хошаллиғиға чин жүригидин хошал. Чүнки балиниң исмини Балтабай йеза округида 20 жил ошуқ вақит деханчилиқ қиливатқан, йезиға һәрдайим һамийлиқ қилип келиватқан Кәрим акиниң һөрмитигә “Кәрим” дәп атапту. Бова һәм моминиң тәрбийисини алған бала мәктәптиму яхши оқуйду. Кәрим Розибақиев 12 йешидин спорт билән шуғуллинишқа башлайду. Яш чеғида чаңғу спорти билән шуғуллинип, Кеңәш Иттипақи командисиниң тәркивидә хәлиқара мусабиқиләргә қатнишип, чемпион аталған Кәрим Худайбәрдиев бу қетимму аилиниң йенидин тепилиду. Кичик Кәримгә йол-йоруқ көрситип, таллиған йолидин қайтмаслиғиға мәслиһәт бериду. Тиришчан бала икки жилниң ичидә спорт маһирлиғиға намзат атилиду. Үч мәртә Әмгәкчиқазақ наһийәсиниң чемпиони, Алмута вилайитиниң чемпиони, җумһурийәтлик вә хәлиқара турнирларниң, «Арстан» турнириниң икки мәртә чемпиони атилиду. Кәрим Розибақиев Ишиктә гуманитарлиқ-ихтисадий колледжиниң тәнтәрбийә муәллимлирини тәйярлайдиған факультетиниң ІІІ курсида оқуйду. У шәхсий утуқлири биләнла чәклинип қалмай, келәчәктә өзи охшаш чемпион балиларни тәрбийиләшни арман қилиду. Әмгәкчиқазақ наһийәси.

117 рет

көрсетілді

0

пікір
Алдыңғы мақала Шагиртлар устазини йәргә қаратмиди
Келесі мақала GGG – чемпион!

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

24 Ақпан, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы