• Спорт
• 17 Қазан, 2019

Яркәнтлик спортчиларни тәбриклиди

Мәшүр САСИҚОВ,«Уйғур авази»/ Йеқинда җумһурийәтлик Уйғур этномәдәнийәт мәркизи йенидики Спорт комитетиниң рәиси Әкрәм Нурдинов рәһбәрлигидики бир топ шәхсләр Яркәнт тәвәсигә берип, «Жаркент» спорт клубида мәшиқлиниватқан һәм буниңдин бираз вақит илгири Чимкәнт шәһиридә өткән джиу-джитсу вә грепплинг бойичә дуния чемпионатида утуқ қазанған өсмүрләрни тәбрикләп, уларға мәркәз намидин Пәхрий ярлиқлар тапшурди.Яркәнттики бразилиялик джиу-джитсу академиясиниң мәшиқләндүргүчилири Үсүпҗан Вәлиев билән Бәхтияр Талипов 200гә йеқин шагирт тәрбийилимәктә. Уларниң көпчилиги ушбу спорт түри бойичә көплигән турнир-чемпионатларда алдинқи орунлардин көрүнүп, устазлириниң бешини көккә йәткүзүватиду. ҖУЭМ йенидики Спорт комитети мошундақ өсмүрләрни сағлам һаят тәризигә башлиған шәхсләр билән уларниң шагиртлирини бираз болсиму рәғбәтләндүрүш мәхситидә бирқатар көзгә көрүнәрлик ишларни әмәлгә ашуруп келиватиду. Бу болсиму, яш әвлат вәкиллирини роһий җәһәттин қоллап-қувәтләшкә вә уларниң спортқа болған қизиқишини техиму ашурушқа қаритилған муһим амил екәнлиги ениқ. Комитет әзалири бу қетимқи сәпиридә утуқ қазанған яркәнтлик спортчиларни қизғин тәбрикләп, иллиқ ләвзини билдүрүш билән биллә елимизниң Тунҗа Президенти — Елбасы Нурсултан Назарбаев һәр жили қазақстанлиқларға йоллиған һәрбир Мәктүбидә сағлам һаят тәризи тоғрилиқ алаһидә тәкитлигәнлигини тилға алди. Шундақла улар ХХІ әсир яшлириниң сағламлиғиниң парлақ келәчигимизниң капалити екәнлигини қәйт қилғач, спортчиларниң мошу тутқан йолидин қайтмайдиғанлиғиға ишәнчә билдүрди. Ахирида спортчилар өзлиригә һөрмәт көрситип жирақтин кәлгән меһманларға чәксиз миннәтдарлиғини изһар қилди.