- Йеңилиқлар
- 17 Қазан, 2019
Һәмкарлиқ кеңишиниң саммитиға иштрак қилди
Қазақстан Җумһурийитиниң Тунҗа Президенти – Елбасы Нурсултан Назарбаев Түркийтиллиқ дөләтләр һәмкарлиқ кеңишиниң Бакуда болуп өткән 7-саммитиға қатнашти.
Әзәрбәйҗан пайтәхтидә болуп өткән саммит Түркийтиллиқ дөләтләр һәмкарлиқ кеңишини (ТДҺК) қуруш тоғрилиқ Нахчыван декларациясиниң қобул қилинғиниға 10 жил толушиға тоғра кәлди. Саммитта Түрк кеңишиниң тәркивигә Өзбәкстанни қобул қилиш җәрияни аяқлашти. Шундақла ТДҺКта йеңи лавазим – мәңгү Пәхрий Рәис лавазими тәсис қилинди. Бу лавазим Қазақстан Президенти лавазимини сақит қилған Нурсултан Назарбаевниң өзи қурушқа һәм тәрәққий әткүзүшкә ярдәм қилған қурулум паалийитигә актив қатнишишни давамлаштуруши үчүн берилди.
Саммит ғоҗайини – Әзәрбәйҗан Президенти Илхам Әлиев Елбасыни нәқ мошундақ йеңи сүпәттә тонуштурди.
– Қазақстанниң Тунҗа Президенти – бизниң ақсақилимиз Нурсултан Әбишоғли Назарбаев саммитқа Түрк кеңишиниң Пәхрий Рәиси мәртивисидә қатнишиватиду. Мундақ лавазим һөрмәтлик Нурсултан Әбишоғлиға Түркия Президенти Реджеп Эрдоғанниң тәшәббуси вә Түрк кеңишигә әза дөләтләр рәһбәрлириниң бирләшкән қарари билән берилди. Нурсултан Назарбаев Түркий дунияда мунасивәтләрни тәрәққий әткүзүш вә Түркийтиллиқ дөләтләр кеңишини қуруш ишида нурғун хизмәт қилди, – дәп тәкитлиди Илхам Әлиев.
Әзәрбәйҗан Президенти Елбасыға ТДҺК тәсис қилған йеңи мукапатни – Түрк дуниясиниң Алий Орденини тапшурди. Нурсултан Назарбаев буниңдин кейин Түрк дуниясидики бебаһа хизмити вә хәлиқләр оттурисидики пикирдашлиқ һәм достлуқни күчәйтишкә алаһидә күч чиқарғанлиғи үчүн хизмәт көрсәткән әрбапларға берилидиған мукапатниң тунҗа саһиби болди.
Нурсултан Назарбаев сөзидә Түрк кеңишигә әза дөләтләр рәһбәрлиригә өзиниң Түркий интеграцияни күчәйтиш вә илгирилитиш йолидики әмгигини умумйүзлүк етирап қилғанлиғи үчүн миннәтдарлиқ билдүрди.
– Буниңдин кейинму силәр билән йеңи чоққиларни егиләйдиғанлиғимизға үмүт қилимән. Мән буниңда силәргә ярдәм қилишқа һәрқачан тәйяр, – дәп тәкитлиди Қазақстанниң Тунҗа Президенти.
Түркийтиллиқ дөләтләр кеңишиниң 7-Саммитиға ТДҺКқа әза болған Әзәрбәйҗан, Қирғизстан, Өзбәкстан, Түркия Президентлири Илхам Әлиев, Сооронбай Жээнбеков, Шавкәт Мирзияев, Реджеп Тайип Эрдоған, байқиғучи мәмликәт Венгрияниң Премьер-министри Виктор Орбан, шундақла Түркмәнстан Премьер-министриниң орунбасари Пурли Агамурадов, ТДҺК баш кативи Бағдат Әмреев қатнашти.
Бакудики учришишта Қирғизстанниң Түрк кеңишигә рәһбәрлик қилиш мәсъулийити аяқлашти. Бу вәзипини атқуруш 2019 — 2020-жилларда Әзәрбәйҗанға жүкләнди.
Саммитниң йәкүни бойичә бирқатар һөҗҗәтләр, җүмлидин ТДҺК 7-Саммитиниң декларацияси, Түрк дуниясиниң Алий Орденини тәсис қилиш вә мошу мукапатни биринчи болуп Елбасы Нурсултан Назарбаевқа тапшуруш тоғрилиқ, Түркийтиллиқ дөләтләр һәмкарлиғи органлириниң уйғунлаштуруш комитетини қуруш тоғрилиқ қарарлар қобул қилинди.
Илхам Әлиев учришиш йәкүнини чиқирип, ТДҺКниң новәттики Саммитини Түркиядә өткүзүш тәкливиниң берилгәнлигини хәвәрлиди.
417 рет
көрсетілді0
пікір