• Йеңилиқлар
• 23 Қазан, 2019

Тиқинчилиқтин зәрдап чекиватиду

Алмутилиқлар шәһәрдики машинилар тиқинчилиғидин (пробка) көптин бери зәрдап чекиватиду. Һазирқи күндә мегаполиста йерим миллиондин ошуқ автомобиль тиркәлгән болса, йәнә 250 миңдин ошуқ “төмүр тулпар” шәһәр әтрапидики аһалилиқ пунктлардин кириду. Алмутидики бирнәччә саатқа созулидиған автомобиль тиқинчилиқлири әң муһим муәммаларниң бири болуп һесаплиниду. Йәрлик һакимийәт тиқинчилиқларни йоқитишқа қарши һакимийәт тиқинчилиқларни йоқитишқа қарши күришиватқанлиғи һәққидә хәвәрлимәктә. Шәһәрдә бирнәччә йол айрилмилири вә айлинип өтүш йоллири селинди. Әпсус, һечқандақ илгириләш байқалмайватиду. Әнди мегаполисниң аһалиси әтраптики йезилардин келиватқан адәмләрни қошуп һесаплиғанда, үч миллионға йәтти. Экспертларниң пикричә, Алмутиму дунияниң көплигән пайтәхтлири баштин кәчүрүватқан проблемилиридин истисна әмәс. Адәмләр көп вақтини машинилар тиқинчилиғида өткүзмәктә. Шуниң үчүнму дунияниң көплигән тәрәққий әткән дөләтлиридә йәрасти метролириға вә җәмийәтлик транспортларға алаһидә диққәт ағдурмақта. Илгири шәһәрдә рельссиз транспорт линиялири җарий қилинған. Мошуниңға бағлиқ шәһәрниң көплигән аһалиси шәхсий автотранспортларниң орниға автобуслардин пайдилинишқа көчкән еди. Бу жили Жандосов кочисида рельссиз транспорт линияси ишқа қошулуши керәк еди. Лекин униң қурулушиму кейингә қалдурулди. Алмутилиқларниң бираз қисми автомобиль тиқинчилиғидин қутулуш мәхситидә велосипедларға вә электросамокатларға көчти. Уларниң қолайчилиғи үчүн шәһәрниң мәркизидики бәзи кочиларға велосипед йоллири селинди. Лекин үстимиздики жилниң август ейида бу йолларни елип ташлаш қарар қилинди. Әмәлдарларниң мәзкүр қарарини алмутилиқлар һәрхил қобул қилди. Экспертларниң пикричә, велоишқивазлириниң йоллирини қисқартмай уни техиму кәңәйтиш керәк еди. Дунияниң көплигән тәрәққий әткән әллиридә нәқ велосипед йоллири шәһәрниң экологиялик әһвалини яхшилашқа ярдәмләшкән. Йәни шу экспертларниң пикричә, Алмута шәһириниң һакимийитигә Лондон вә Москва шәһәрлиридин үлгә елиш керәк еди. Һазирчә Алмута шәһириниң йоллирида машинилар азияр әмәс. Әксичә, чоң автомобиль йоллирила әмәс, бәлки шәһәрдики барлиқ автомобиль турақлири толуп кәткән. Әгәр бу проблема вақтида һәл қилинмиса, пат-йеқинқи жилларда шәһәр автомобиль тиқинчилиғиға тунҗиқиши мүмкин.