• Йеңилиқлар
  • 23 Қазан, 2019

Қуш фабрикиси ишини қайтидин башлайду...

Сабирәм ӘНВӘРОВА, “Уйғур авази” Буниңдин бираз вақит илгири Уйғур наһийәсидә, ениғирақ ейтсақ, Чонҗа-Ғалҗат таш йолиниң бойиға селинған қуш фабрикиси толуқ ишқа қошулғанда тәвә аһалисиниң хошаллиқтин беши көккә йәткән еди. Бу, биринчидин, наһийәниң иҗтимаий-ихтисадий тәрәққияти үчүн муһим мәркәзгә айланған болса, иккинчидин, турғунларниң турақлиқ иш билән тәминлиниши түпәйли, наһийәдики ишсизлиқ дәриҗиси хелә төвәнлигән еди. Әпсуслинарлиғи, хәлиқниң хошаллиғи көпкә созулмиди. 2010-жили иш башлиған фабрика, арида төрт жил өтүп, йәни 2014-жили касатлиққа учрап, йепилип қалди. Өтмүшкә көз жүгәртсәк, фабрикидики қуш сани 2 миллион 327 миң 168гә йетип, жилиға 10 миллион 4 миң данә тухум берипту. Қисқиси, мәзкүр фабрика вилайәт бойичә алдинқи қатарлиқ карханиларниң бири болған. Әпсус, көп өтмәй фабрика мәлум сәвәпләргә бенаән өз паалийитини тохтитишқа мәҗбур болиду. Мана шуниңдин етиварән бош турған фабрика беналириға қарап, наһийә турғунлириниң ичи көйәтти. Чүнки өз вақтида қизғин иш қайниған бу объектта һөкүм сүргән тиничлиқ, гектарлиған йәрни егилигән қурулушниң пайдилинилмай, ичидики техника-аппаратларниң управатқанлиғи кимнила болса «хәп» дегүзмәй қойматти. Бирақ «Қуш фабрикиси қайтидин ишқа қошулидекән» дегән хәвәр тариғандин кейин наһийә рәһбәрлири көплигән инвесторларни җәлип қилди. Лекин инвесторлар юлтуздәк бир көрүнүп, ғайип болуш давамлишивәрди. Үмүтлүк хәлиқ шу күнни тәшналиқ билән күткән болсиму, бәш жил бойи һечқандақ өзгириш йүз бәрмиди. Хош, әндики әһвал тамамән башқичә. Шундақ, көпниң тилиги орунлинип, рәһбәрләрниң тиришчанлиғи нәтиҗә берип, наһийәдики әң чоң карханиларниң бири болған қуш фабрикисиниң иши қайтидин җанлинидиған болди. Қуш фабрикисини сетивалған «OTAN Green food» җавапкәрлиги чәкләнгән йолдашлиғи Россия вә Европидин йеңи қурулмиларни елип келип, заман тәливигә лайиқ иш жүргүзмәкчи. Һазирниң өзидә у фабрикини әслигә кәлтүрүш ишлирини башлавәтти. Фабрикида һазир 72 бролер, 16 анилиқ цех бар болса, келәчәктә саатиға 20 тонна йәм чиқиридиған төртқәвәтлик йеңи цехниң һули тикләнмәкчи. Бүгүнки күндә йәм чиқириш цехиниң қурулуши қолға елинип, объектта иш қизғин жүргүзүлүватиду. Йеқинда «2020-жилниң әтиязидин башлап фабрика толуғи билән өз ишини башлайду» дәп вәдә бәрди ширкәтниң баш мудири Нуғман Нурмухамет. Шундақла келәр жили баһарда җәми 869 адәмни турақлиқ иш билән тәминләйдиғанлиғини ейтти. Һазирчә ишниң башлиниши яман әмәс. Йәң түрүп ишқа киришкән йеңи инвесторлар келәчәктә қуш беқиш орунлирини селиш арқилиқ объектниң мәйданини техиму кәңәйтишни планлимақта. Әгәр бу қуш фабрикиси ишқа қошулса, Уйғур наһийәсидики йәнә бир бошлуқниң орни толуп, нур үстигә нур болар еди. Немила демәйли, өзимизниң мәһсулатини истимал қилғанға немә йәтсун?.. PS: «Қазақстан даласиниң үстиму байлиқ, астиму байлиқ. Елимиздә Менделеев кәштисидики элементларниң барлиғи тепилиду. Шундақ болсиму, немә үчүн техичә чәт әлниң буюмлириға муһтаҗ? Йәни биз өзимиздики хамәшияни чәт әлгә импортлап, кейин тәйяр болған мәһсулатни чәт әлдин қиммитигә сетивелип, пайдилинип келиватимиз. Бу әқилгә сиғмайдиған әһвал...». Кейинки вақитларда мошундақ параңларни хәлиқ еғизидин пат-пат аңлайдиған болдуқ. Қазақстан – яш һәм җошқун тәрәққий етип келиватқан дөләт. Мустәқилликкә еришип, та бүгүнгичә чоң мөҗүзиләрни яратти. Қисқа вақит ичидә дунияға тонулуп, зор утуқларни қолға кәлтүрди. Дәрһәқиқәт, һазирқи турмуш-тирикчилигимиз яман әмәс. Хәлиқниң турмуш сүпити жилдин-жилға яхшиланмақта. Аддий тил билән ейтқанда, “немә йәймән, немә кийимән” дегән вайимимиз йоқ. Әнди «Қазақстанда немә үчүн завод-фабрикилар йетишмәйду? Немә үчүн «Қазақстанлиқ бренд» яхши риваҗланмиған? Қачанғичә чәт әлгә алиқан яйимиз?» дегәнгә охшаш бир түркүм соалларниң җавави интайин аддий. Биз пәқәт тәйярға һәйяр болушқа адәтлинип қалдуқ, халас. «Өз алдимға иш башлаймән, завод-фабрика ачимән, тиҗарәт билән шуғуллинимән» дегән һечбир турғунға дөләт тәрипидин чәк қоюлуватқини йоқ. Әксичә, дөлитимиз тиҗарәтчиләрни һәртәрәплимә қоллап-қувәтләп, нурғунлиған имканийәтләрни яритип бәрмәктә. Кейинки жилларда йолға қоюлған дөләт программилириниң тәңдин-толиси тиҗарәткә мунасивәтликтур. Йәнә келип, Президентимиз Қасым-Жомарт Тоқаев техи йеқинда хәлиққә йоллиған Мәктүбидә елимиздики тиҗарәт саһасини техиму тәрәққий әткүзүш үчүн «Бизнесниң йеңи йол хәритиси» даирисидә алдики үч жил ичидә 250 миллиард тәңгә бөлүнидиғанлиғини тәкитлиди. Хуласиләп кәлгәндә, елимиздә тиҗарәтчи болушни халайдиғанлар йетәрлик. Лекин арминиға йетишниң йолини издәштүрүп, тәр төкүватқанлар аз болуватиду.

100 рет

көрсетілді

0

пікір
Алдыңғы мақала Тиқинчилиқтин зәрдап чекиватиду
Келесі мақала Пайтәхтимизгә – 22 жил

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

20 Қаңтар, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы