• Әхбаратлар еқими
• 31 Қазан, 2019

«Яхшиниң яхшилиғини ейт...»

Сабирәм ӘНВӘРОВА, «Уйғур авази» Күндилик турмушта биз анчә көңүл бөлүп кәтмәйдиған бәзибир кичик мәсилиләр бар. Әгәр шу “кичик мәсилиләрни” чоңқур тәһлил қилидиған болсақ, вәзийәтниң биз ойлиғандәк аддий әмәс екәнлигини чүшинимиз. Мәсилән, тапқан тапавитимизни орунсиз хәшләшниң өзи – һәрқайсимизниң һаятида йүз бериватқан, амма нурғунимиз етивар берип кәтмәйдиған мәсилә. Бүгүнки күндә җәмийитимиздә қанат яйған бу дәртни аддий тилда «исрапчилиқ» дәп атисақ, Тунҗа Президентимиз – Елбасы Нурсултан Әбишоғли Назарбаев өзиниң «Келәчәккә нишан: мәнивий йеңилиниш» намлиқ мақалисида буни «прагматизм» дәп қараштурди. «Прагматизм – өзәңниң миллий вә шәхсий байлиғиңни ениқ билиш, уни үнүмлүк пайдилинип, шуниңға лайиқ келәчигиңни планлаш, исрапчилиқ, мәнмәнчилик билән көрәңликкә йол қоймаслиқ дегән сөз. Һазирқи җәмийәттә һәқиқий мәдәнийәтниң бәлгүси – орунсиз той-тамашә әмәс, әксичә, шүкричилик, қанаәт даналиқни көрситиду», дәп чүшәндүрди Елбасы. Хош, бизниң бәзидә мана шу прагматизмни бойимизда қелиплаштуралмай келиватқанлиғимиз кишини әпсусландуриду. Той-төкүнләрдә, өрүм-чөрүмгә кәлгәндә мәртлигимиз тутуп, маарип вә мәтбуатқа бағлиқ миллий мәсилиләр сөз қилинса, бирдин қапиғимиз түрүлүп, «йоқтин» башқини ейтмаймиз. Әқилгә сиғмайдиғини, миллитимиз үчүн сәрип қилишқа қиймиған төрт тәңгимизни, исрапчилиққа хәшлигинимизгә ечинмайдиғанлиғимизда. Әлвәттә, һәммигә бирдәк күйә йеқишқа болмайду. Бирақ аримизда мәнивий байлиқтин маддий байлиқни, хәлиқ тәғдиридин өз ғәм-муңини жуқури қойидиған қериндашлиримиз бар болғачқа, хәлқимиз келәчигигә мунасивәтлик миллий мәсилиләр күн тәртивидин чүшкән әмәс. Лекин өз ғемини чәткә қайрип қоюп, хәлиқ ғемида пайпетәк болуп яшаватқан милләтпәрвәр қериндашлиримизниң әмгиги – даваси тепилмайватқан миллий дәрт-қайғумизниң көләңгисидә қалса болмайду. У болсиму, жигитбашлири вә ханим-қизлар кеңиши тәрипидин атқурулуватқан изгү ишлар. Улар ана тилимизни, анатиллиқ мәктәплиримизни, гезит-журнал, нәширлиримизни сақлап қелиш үчүн бар күчини салмақта. Лазим болса, өйму-өй меңип, хәлиқниң уйқиға кәткән аң-сәвийәсини ойғитип, мәнавият йолиға башлимақта. Бир сөз билән ейтқанда, миллий мәсилиләргә алаһидә көңүл бөлүп, көплигән изгү ишларни әмәлгә ашурмақта. Хулләс, хәлқимизниң келәчиги үчүн ғәм йәйдиған қериндашлиримиз ана тилимизниң сақлинип қелиши үчүн қолидин келишичә, қизғин паалийәт елип бармақта. Җүмлидин мана шундақ милләтпәрвәр инсанлиримизниң арқисида бийилқи оқуш жилида Илия Бәхтия намидики 3-Чонҗа уйғур оттура мәктивиниң 1-синипиға 60 оқуғучи қобул қилинип, 3 синип ечилғанлиғи сөзүмизгә испат болалайду. Ениғирақ ейтсақ, йеқинда бу хәвәрдин сөйүнгән Чонҗа йезисиниң жигитбашлири вә наһийәлик Уйғур этномәдәнийәт мәркизи йенидики «Нураний анилар» кеңишиниң әзалири җим ятмай, ана тилимизда билим еливатқан қаракөзлиримизгә 110 миң тәңгилик соға тапшурди. «Аз болсиму, саз болсун» демәкчи, улар 67 нәпәр оқуғучиға оқуш қураллири, Һөснихәт вә галстук һәдийә қилди (сүрәттә). Бу изгү ишниң бешида болған һамийлар – жигитбашлири Аристан Имиршаев, Илахун Арипов, Абдусемәт Абдулхамитов, Олалим Тохтахунов, Абдуһим Қурбанов, Нурмәһәмәт Арипов, Үсака Халметов, Марат Һетбақиев, Адил Һевуллаев, Полат Һевуллаев, Исмайил Искәндәров, Халмурат Зайитов, Зилавдун Бавдинов, Валерий Данахунов, Зиләхәм Җәлиловқа, Гүлминәм Тохтаева, Фатима Анайәтова, Адаләтхан Иминова, Селимәм Өмәроваға мәктәп мәмурийити чәксиз миннәтдарлиғини йәткүзди. Милләт тәғдирини төрт тәңгисидин үстүн қойидиған бу алийҗанап инсанлар өз новитидә ана тилимизда билим еливатқан яш әвлатниң келәчигидин зор үмүт күтидиғанлиғини бир еғиздин тәкитләшти. Бу миллитимизни сақлап қелиш йолида атқурулуватқан ишларниң бир тамчиси, халас. Шүбһисизки, миллитимиз җанкөйәрлириниң бебаһа әмгиги һәққидә ейтар болсақ, бир мақалә азлиқ қилиду. Милләт тәғдири тоғрилиқ сөз болуватқанда, мәсилиниң ачқучи һәрбиримизниң қолида екәнлигини унтумайли. Сәвәви, һәр адәм мәнивий йеңилинишни өзидин башлиши һаҗәт.